Jātakamālā, 1-8, 11-12, 19-20, 22, 24, 26, 32, 35 · Chapter 11

tṛṇam iva jīvitam iṣṭaṃ karuṇānugatāḥ parārtham ujjhantaḥ /
kaṭhinamanasām api mano nayanti mṛdutāṃ mahātmānaḥ //

kṣīrodaphenadhavalena tanūdareṇa pṛṣṭhena ca bhramarasaṃhatimecakena
tārāvilāsaśabalasphuritāgrapakṣmā reje kaṭākṣa iva yo gahanāntabhūmeḥ //

tābhyām adhipatibhyāṃ te pālite tṛṇam aśnatī
śaṅkāviyogaviśrabdhaṃ mṛgayūthe viceratuḥ //

atha vilokya camūṃ dhṛtakārmukāṃ calakhalīnasamucchritanisvanām
aśaraṇāḥ paribhinnakadambakā bhayavaśena mṛgāḥ paridudruvuḥ //

avalokya samantataḥ parītān nṛpasainyena mṛgān sa bodhisattvaḥ
śaradheḥ śaram uddharantam ārād avanīśaṃ samupetya saṃbabhāṣe //

yugapan mṛgasaṃkṣayāya kasmād dhanur etat kriyate tvayā sabāṇam
divase divase mahānasaṃ te mṛgam ekaikam ahaṃ visarjayiṣye //

nijagāda mahīpatis tatas taṃ yadi satyaṃ mṛga tat tathā kariṣye
na kariṣyasi ced imāṃ vyavasthāṃ prahariṣyāmi tato mṛgeṣu bhūyaḥ //

pratipadya gate 'tha bhūmipāle dhavalacchattranivāritārkatāpe
nijagāda sametya bodhisattvo hariṇāṃs tān punar ekatām upetān //

yugapat samupāgate vināśe yadi labhyeta punaḥ kramaḥ sa sādhuḥ
kramam etya cirāya śāntihetuṃ bhavitā nāma kadācid anyad eva //

gajakumbhavibhedapaṇḍitānāṃ balināṃ kesariṇām api dviṣantaḥ
kṣapayanti śarair asūn narendrāḥ kim u darbhāgrabhujāṃ vane mṛgāṇām //

sitamaṇiśucibhis tamo vibhindañ jagad avabhāsya marīcibhiḥ śaśāṅkaḥ
patati vigatakāntir astaśailāt kṣaṇaviśarārava eva sarvabhāvāḥ //

salilam urutaraṅgaṃ raṃhasā kṣobhayitvā harati jaladhimadhyāt pannagaṃ vainateyaḥ
atipatati na kaścit karmaṇāṃ kovido 'pi prathitagurubalo 'pi prāktanānāṃ vipākam //

iti karmagatiṃ jñātvā vijñānapaṭavo budhāḥ
prāṇātyaye 'pi nāyānti viṣādaṃ dhīracetasaḥ //

mama yūthapate vāraḥ prāpto gantuṃ nṛpālayam
āsannaprasavā cāsmi tad enaṃ rakṣa śāvakam //

prasūtamātram ālīnam avalihya ca jihvayā
stanaṃ ca pāyayitvāhaṃ śāvaṃ cañcalanetrakam //

vanānte śaṅkhaśakalac chāyair daśanakuḍmalaiḥ
spṛśantaṃ śādvalaśikhāṃ vilokya ca puraḥsthitam //

mama yūthapate yūthe bhaginy asti kanīyasī
gamiṣyāmi kṛtārthāhaṃ tasyāṃ nikṣipya putrakam //

iti putralālasāṃ tāṃ hariṇīm abhidhāyinīṃ samālokya /
yūthapater ārūḍhaṃ sutarām anukampayā hṛdayam //

aparicite 'py anukampā duḥkhini sutarāṃ vivardhate sādhoḥ /
jalasiktamūlajālā lateva vṛkṣaṃ samālambya //

yasyaivāsty anukampā dīnaṃ śaraṇāgataṃ samālokya
tadvyasanabhaṅgahetuṃ sa eva kurute paraṃ yatnam //

tām ūcivān atha mṛgīṃ mṛgayūthanātho bhadre parityaja śucaṃ manasi sphurantīm
tvaṃ tiṣṭha nirvṛtim upetya vane carantī yāsyāmy ahaṃ narapateḥ svayam eva veśma //

bālaṃ śirīṣaharitaṃ tṛṇam ādaśantaṃ candrāṃśujālavimalaṃ salilaṃ pibantam
saṃkrīḍamānam iha putrakam eṇaśāvaiḥ sārdhaṃ ciraṃ samavalokaya cañcalākṣam //

āśvāsya tām iti mṛgīṃ sa jagāda dhīras trātā yathādya hariṇī maraṇān mayeyam
duḥkhāt punarbhavakṛtāj janatāṃ tathaiva trāyeya mārajayinīṃ samavāpya bodhim //

vikośapuṣpās tam athākulākulāḥ kalair alīnāṃ virutair visāribhiḥ
vidhūtaśākhāgrakarā nabhasvatā nivartayāmāsur ivācaladrumāḥ //

vimucyamānaṃ suhṛdeva tena tan mṛgeṇa vātāhatalolapallavam
visāricīrīvirutaṃ samantato vanaṃ rurodeva samutsukotsukam //

athābhāṣata taṃ rājā hariṇaṃ hariṇekṣaṇaḥ
aparikṣīṇayūthas tvaṃ vada kiṃ svayam āgataḥ //

garbhiṇī hariṇī deva śaraṇaṃ mām upāgatā
putradarśanakāṅkṣiṇyās tasyā vāre 'ham āgataḥ //

putrakaṃ draṣṭum icchantyāḥ pūrayitvā manoratham
eṇyās tasyāḥ paraṃ prīto manye 'haṃ mṛtyum utsavam //

hariṇīṃ hariṇaṃ cātra yātum ālokya mṛtyave
yan me samabhavad duḥkhaṃ tad adya na bhaviṣyati //

tasmāt pramāpaya nareśvara mām idānīm aurabhrikaiḥ kathaya deva vilambase kim
atyāyatena karuṇākavacena baddhaṃ ceto bhinatti na viṣādaśaro mamedam //

parārthaniṣpattinibaddhacetā mṛgākṛtis tvaṃ puruṣapradhānaḥ
paropaghātāya nibaddhayatnā vayaṃ khalu vyālamṛgaiḥ samānāḥ //

śaraṇam upagataṃ kṛtāparādhaṃ ripum api pāsi kila vyudasya kopam
kathaya katham anāgasāṃ mṛgāṇām upari patanti taveṣavo niśātāḥ //

prahṛtaṃ na tvayā yuddhe dviṣaty api parāṅmukhe
nihaṃsi bhayavitrastān hariṇān naśyataḥ katham //

jahīhi mṛgayākrīḍām asatsaṃkalpavardhitām
narakāgneḥ sphuraddīpter bhavitrī yeyam āhutiḥ //

subhāṣitaprītir anunnatiḥ śriyā parārthaniṣpattipaṭīyasī kriyā
guṇeṣv atṛptir guṇavatsu cādaro virūḍham etac caritaṃ mahātmanām //

nitāntam āviṣkṛtatuṅgatejasī ubhe manuṣyasya manuṣyalakṣmaṇī
adainyam āpatsv api cittagauravād apatrapā cāryapathaprakāśinī //

khalāḥ prakṛtyaiva malīmasāśayā vṛthā pareṣām ayaśaḥsu jāgrati
svacittaśuddhau viniviṣṭabuddhayo budhāḥ punas teṣu bhṛśaṃ dayālavaḥ //

nareṣu tulyodayapauruṣeṣv api kriyā na sarvasya paropakāriṇī
parisphurajjyotiṣi nirghane nabhasy agastya evāmbu karoti nirviṣam //

vicintyamāno 'pi karoti vismayaṃ visāriṇā saccaritena sajjanaḥ
yadā tu cakṣuḥpatham eti dehināṃ tadāmṛteneva manāṃsi siñcati //

yasyāyāmi paropakārasalilasroto na vicchidyate dhīcakṣuś ca viyogi yasya tamasā dvāv eva tau jāgrataḥ
anyeṣāṃ paśudharmaṇāṃ parahitavyāpāradurmedhasāṃ tulye rātryahanī pramattamanasām ajñānanidrāvatām //

saṃsāre bhramato mahāndhatamase saṃtiṣṭhamānasya vā sādhoḥ sādhuphale nitāntamahatī dve eva te māṃ prati
yatra projjhya gṛhaṃ tapovanam abhiprasthīyate śreyase yasmin vā kriyate vivekapaṭubhiḥ sākaṃ kathā sūribhiḥ //

bhujyante svagṛhasthitā iva sukhaṃ yasyārthibhiḥ saṃpadaḥ paṭvī yasya ca dhīs tamaḥprahataye dvāv eva tau prāṇitaḥ
yas tv ātmaṃbharir unnate 'pi vibhave hīnaś ca vidvattayā tasyālekhyamaṇer ivākṛtibhṛtaḥ sattāpy asattā nanu //

kṛcchrāl labdham api krameṇa bhavati prabhraṃśi bhūyaḥ sukhaṃ tadbhraṃśe paritāpam eti puruṣaś cittānalaṃ jvālayan
duḥkhasyāsya bhavānubandhajananī hetuḥ śaṭhā jālinī te 'tyantaṃ sukhino manaḥsu nihitā yaiḥ samyag alpecchatā //

mohacchedi subhāṣitaṃ vinayati dravyaṃ vinaiva śramād adravye tu bhavanty api sphuṭapadā vyarthopadeśā giraḥ
karmāreṇa paṭīyasāpi vighanavyomendranīlacchaviḥ śrīgarbhaḥ kriyate kalaṅkaparuṣād ghaṇṭīkṛtān nāyasaḥ //

utpāde sati loka eṣa maraṇavyādhiśramair bādhyate tṛṣṇātantunibandhanasya jagato bhūyas ta evādhayaḥ
ity acchinnapunarbhavapratibhayaḥ saṃsāra ā nirvṛter yuṣmatsaṃgamahetur ity avamato nāyaṃ sadoṣo 'pi naḥ //

mayā vinā nṛvara viṣaṇṇamānasaṃ samākulaṃ hariṇakulaṃ bhaviṣyati
akaṇṭakāṃ ciram anuśādhi medinīṃ vrajāmy ahaṃ tvaritapadaṃ tadantikam //

atha yūthapatiṃ vilokya dūrān muditaṃ tan mṛgayūtham utsukākṣam
daśanāgragṛhītaśaṣpadarbhaṃ tvaritaṃ pratyudiyāya baddhapaṅkti //

vinimīlitalocaneva yāsīd dhariṇī yūthapatau gate vanāntāt
samupeyuṣi saiva tatra dhīre punar unmīlitalocaneva jātā //

āgamya sātha hariṇī hariṇapradhānam itthaṃ jagāda muditā calitāyatākṣī
prahlādayan mama manaḥ śiśur eṣa dāve saṃkrīḍate hariṇanātha tava prasādāt //