Īśvarapratyabhijñāvimarśinī · Chapter 1.5

vartamānāvabhāsānāṃ bhāvānāmavabhāsanam /
antaḥsthitavatāmeva ghaṭate bahirātmanā //

prāgivārtho'prakāśaḥ syātprakāśātmatayā vinā /
na ca prakāśo bhinnaḥ syādātmārthasya prakāśatā //

bhinne prakāśe cābhinne saṃkaro viṣayasya tat /
prakāśātmā prakāśyo'rtho nāprakāśaśca siddhyati //

tattadākasmikābhāso bāhyaṃ cedanumāpayet /
na hyabhinnasya bodhasya vicitrābhāsahetutā //

na vāsanāprabodho'tra vicitro hetutāmiyāt /
tasyāpi tatprabodhasya vaicitrye kiṃ nibandhanam //

syādetadavabhāseṣu teṣvevāvasite sati /
vyavahāre kimanyena bāhyenānupapattinā //

cidātmaiva hi devo'ntaḥsthitamicchāvaśādbahiḥ /
yogīva nirupādānamarthajātaṃ prakāśayet //

anumānamanābhātapūrve naiveṣṭamindriyam /
ābhātameva bījāderābhāsāddhetuvastunaḥ //

ābhāsaḥ punarābhāsadbāhyasyāsītkathaṃcana /
arthasya naiva tenāsya siddhirnāpyanumānataḥ //

svāminaścātmasaṃsthasya bhāvajātasya bhāsanam /
astyeva na vinā tasmādicchāmarśaḥ pravartate //

svabhāvamavabhāsasya vimarśaṃ viduranyathā /
prakāśo'rthoparakto'pi sphaṭikādijaḍopamaḥ //

ātmāta eva caitanyaṃ citkriyācitikartṛtā /
tātparyeṇoditastena jaḍātsa hi vilakṣaṇaḥ //

citiḥ pratyavamarśātmā parā vāksvarasoditā /
svātantryametanmukhyaṃ tadaiśvaryaṃ paramātmanaḥ //

sā sphurattā mahāsattā deśakālāviśeṣinī /
saiṣā sāratayā proktā hṛdayaṃ parameṣṭhinaḥ //

ātmānamata evāyaṃ jñeyīkuryātpṛthaksthiti /
jñeyaṃ na tu tadaunmukhyātkhaṇḍyetāsya svatantratā //

svātantryāmuktātmānaṃ svātantryādadvayātmanaḥ /
prabhurīśādisaṃkalpairnirmāya vyavahārayet //

nāhantādiparāmarśabhedādasyānayatātmanaḥ /
ahaṃmṛśyatayāivāsya sṛṣtestiṅvācyakarmavat //

māyāśaktyā vibhoḥ saiva bhinnasaṃvedyagocarā /
kathitā jñānasaṃkalpādhyavasāyādināmabhiḥ //

sākṣātkārakṣaṇe'pyasti vimarśaḥ kathamanyathā /
dhāvanādyupapadyeta pratisaṃdhānavarjitam //

ghaṭo'yamityadhyavasā nāmarūpātirekiṇī /
pareśaśaktirātmeva bhāsate na tvidantayā //

kevalaṃ bhinnasamvedyadeśakālānurodhataḥ /
jñānasmṛtyavasāyādi sakramaṃ pratibhāsate //