Scripture Library

Īśvarapratyabhijñāvimarśinī · Chapter 1.4

1.4.1

sa hi pūrvānubhūtārthopalabdhā parato'pi san /
vimṛśansa iti svairī smaratītyapadiśyate //

1.4.2

bhāsayecca svakāle'rthātpūrvābhāsitamāmṛśan /
svalakṣaṇaṃ ghaṭābhāsamātreṇāthākhilātmanā //

1.4.3

na ca yuktaṃ smṛterbhede smaryamāṇasya bhāsanam /
tenaikyaṃ bhinnakālānāṃ saṃvidāṃ veditaiṣa saḥ //

1.4.4

naiva hyanubhavo bhāti smṛtau pūrvo'rthavatpṛthak /
prāganvabhūvamahamityātmārohaṇabhāsanāt //

1.4.5

yogināmapi bhāsante na dṛśo darśanāntare /
svasaṃvidekamānāstā bhānti meyapade'pi vā //

1.4.6

smaryate yaddṛgāsīnme saivamityapi bhedataḥ /
tadvyākaraṇamevāsyā mayā dṛṣṭamiti smṛteḥ //

1.4.7

yā ca paśyāmyahamimaṃ ghaṭo'yamiti vāvasā /
manyate samavetaṃ sāpyavasātari darśanam //

1.4.8

tanmayā dṛśyate dṛṣṭo'yaṃ sa ityāmṛśatyapi /
grāhyagrāhakatābhinnāvarthau bhātaḥ pamātari //

Original text: Īśvarapratyabhijñāvimarśinī · Edition: Īśvara-pratyabhijñā-Vimarśinī of Abhinavagupta : doctrine of devine recognition, Sanskrit Text with the commentary Bhāskarī. vol.1-2 / edited by K.A. Subramania Iyer and K.C.Pandey. Delhi, etc. : Motilal Banarsidass , 1986 (repr.) (First Edition: The Princess of Wales Saraswati Bahvana , 1938(text no. 70) and 1950 (text no. 83). · Data entry Masahiro Takano · GRETIL (Göttingen) · CC BY-NC-SA 4.0