Scripture Library

Īśvarapratyabhijñāvimarśinī · Chapter 1.6

1.6.1

ahaṃpratyavamarśo yaḥ prakāśātmāpi vāgvapuḥ /
nāsau vikalpaḥ sa hyukto dvayākṣepī viniścayaḥ //

1.6.2

bhinnayoravabhāso hi syādghaṭāghaṭayordvayoḥ /
prakāśasyeva nānyasya bhedinastvavabhāsanam //

1.6.3

tadatatpratibhābhājā mātraivātadvyapohanāt /
tanniścayanamukto hi vikalpo ghaṭa ityayam //

1.6.4

cittattvaṃ māyayā hitvā bhinna evāvabhāti yaḥ /
dehe buddhāvatha prāṇe kalpite nabhasīva vā //

1.6.5

pramātṛtvenāhamiti vimarśo'nyavyapohanāt /
vikalpa eva sa parapratiyogyavabhāsajaḥ //

1.6.6

kādācitkāvabhāse yā pūrvābhāsādiyojanā /
saṃskārātkalpanā proktā sāpi bhinnāvabhāsini //

1.6.7

tadevaṃ vyavahāre'pi prabhurdehādimāviśan /
bhāntamevāntararthaughamicchayā bhāsayed bahiḥ //

1.6.8

evaṃ smṛtau vikalpe vāpy apohanaparāyaṇe /
jñāne vāpyantarābhāsaḥ sthita eveti niścitam //

1.6.9

kiṃtu naisargiko jñāne bahirābhāsanātmani /
pūrvānubhavarūpastu sthitaḥ sa smaraṇādiṣu //

1.6.10

sa naisargika evāsti vikalpe svairacāriṇi /
yathābhimatasaṃsthānābhāsanādbuddhigocare //

Original text: Īśvarapratyabhijñāvimarśinī · Edition: Īśvara-pratyabhijñā-Vimarśinī of Abhinavagupta : doctrine of devine recognition, Sanskrit Text with the commentary Bhāskarī. vol.1-2 / edited by K.A. Subramania Iyer and K.C.Pandey. Delhi, etc. : Motilal Banarsidass , 1986 (repr.) (First Edition: The Princess of Wales Saraswati Bahvana , 1938(text no. 70) and 1950 (text no. 83). · Data entry Masahiro Takano · GRETIL (Göttingen) · CC BY-NC-SA 4.0