Īśvarapratyabhijñākārikā with Vṛtti · Chapter 3.1

evam antarbahirvṛttiḥ kriyā kālakramānugā
mātur eva tadanyonyā -viyukte jñānakarmaṇī //

kiṃ tv āntaradaśodrekāt sādākhyaṃ tattvam āditaḥ
bahirbhāvaparatve tu parataḥ pārameśvaram //

īśvaro bahir unmeṣo nimeṣo 'ntaḥ sadāśivaḥ
sāmānādhikaraṇyaṃ ca sadvidyāhamidaṃdhiyoḥ //

idaṃbhāvopapannānāṃ vedyabhūmim upeyuṣām
bhāvānāṃ bodhasāratvād yathāvastvavalokanāt //

atrāparatvam bhāvānām anātmatvena bhāsanāt
paratāhantayācchādāt parāparadaśā hi sā //

bhedadhīr eva bhāveṣu kartur bodhātmano 'pi yā
māyāśakty eva sā vidyety anye vidyeśvarā yathā //

tasyaiśvaryasvabhāvasya paśubhāve prakāśikā
vidyāśaktiḥ tirodhāna karī māyābhidhā punaḥ //

bhede tv ekarase bhāte 'haṃtayānātmanīkṣite
śūnye buddhe śarīre vā māyāśaktir vijṛmbhate //

yaś ca pramātā śūnyādiḥ prameye vyatirekiṇi
mātā sa meyaḥ san kālā -dikapañcakaveṣṭitaḥ //

trayoviṃśatidhā meyaṃ yat kāryakaraṇātmakam
tasyāvibhāgarūpy ekaṃ pradhānaṃ mūlakāraṇam //

trayodaśavidhā cātra bāhyāntaḥkaraṇāvalī
kāryavargaś ca daśadhā sthūlasūkṣmatvabhedataḥ //