ઈશ્વરપ્રત્યભિજ્ઞાકારિકા · અધ્યાય 3.1

એવમ્ અન્તર્બહિર્વૃત્તિઃ ક્રિયા કાલક્રમાનુગા
માતુર્ એવ તદન્યોન્યા -વિયુક્તે જ્ઞાનકર્મણી ॥

કિં ત્વ્ આન્તરદશોદ્રેકાત્ સાદાખ્યં તત્ત્વમ્ આદિતઃ
બહિર્ભાવપરત્વે તુ પરતઃ પારમેશ્વરમ્ ॥

ઈશ્વરો બહિર્ ઉન્મેષો નિમેષો ઽન્તઃ સદાશિવઃ
સામાનાધિકરણ્યં ચ સદ્વિદ્યાહમિદંધિયોઃ ॥

ઇદંભાવોપપન્નાનાં વેદ્યભૂમિમ્ ઉપેયુષામ્
ભાવાનાં બોધસારત્વાદ્ યથાવસ્ત્વવલોકનાત્ ॥

અત્રાપરત્વમ્ ભાવાનામ્ અનાત્મત્વેન ભાસનાત્
પરતાહન્તયાચ્છાદાત્ પરાપરદશા હિ સા ॥

ભેદધીર્ એવ ભાવેષુ કર્તુર્ બોધાત્મનો ઽપિ યા
માયાશક્ત્ય્ એવ સા વિદ્યેત્ય્ અન્યે વિદ્યેશ્વરા યથા ॥

તસ્યૈશ્વર્યસ્વભાવસ્ય પશુભાવે પ્રકાશિકા
વિદ્યાશક્તિઃ તિરોધાન કરી માયાભિધા પુનઃ ॥

ભેદે ત્વ્ એકરસે ભાતે ઽહંતયાનાત્મનીક્ષિતે
શૂન્યે બુદ્ધે શરીરે વા માયાશક્તિર્ વિજૃમ્ભતે ॥

યશ્ ચ પ્રમાતા શૂન્યાદિઃ પ્રમેયે વ્યતિરેકિણિ
માતા સ મેયઃ સન્ કાલા -દિકપઞ્ચકવેષ્ટિતઃ ॥

ત્રયોવિંશતિધા મેયં યત્ કાર્યકરણાત્મકમ્
તસ્યાવિભાગરૂપ્ય્ એકં પ્રધાનં મૂલકારણમ્ ॥

ત્રયોદશવિધા ચાત્ર બાહ્યાન્તઃકરણાવલી
કાર્યવર્ગશ્ ચ દશધા સ્થૂલસૂક્ષ્મત્વભેદતઃ ॥