ईश्वरप्रत्यभिज्ञाकारिका · अध्याय 3.1

एवम् अन्तर्बहिर्वृत्तिः क्रिया कालक्रमानुगा
मातुर् एव तदन्योन्या -वियुक्ते ज्ञानकर्मणी ॥

किं त्व् आन्तरदशोद्रेकात् सादाख्यं तत्त्वम् आदितः
बहिर्भावपरत्वे तु परतः पारमेश्वरम् ॥

ईश्वरो बहिर् उन्मेषो निमेषो ऽन्तः सदाशिवः
सामानाधिकरण्यं च सद्विद्याहमिदंधियोः ॥

इदंभावोपपन्नानां वेद्यभूमिम् उपेयुषाम्
भावानां बोधसारत्वाद् यथावस्त्ववलोकनात् ॥

अत्रापरत्वम् भावानाम् अनात्मत्वेन भासनात्
परताहन्तयाच्छादात् परापरदशा हि सा ॥

भेदधीर् एव भावेषु कर्तुर् बोधात्मनो ऽपि या
मायाशक्त्य् एव सा विद्येत्य् अन्ये विद्येश्वरा यथा ॥

तस्यैश्वर्यस्वभावस्य पशुभावे प्रकाशिका
विद्याशक्तिः तिरोधान करी मायाभिधा पुनः ॥

भेदे त्व् एकरसे भाते ऽहंतयानात्मनीक्षिते
शून्ये बुद्धे शरीरे वा मायाशक्तिर् विजृम्भते ॥

यश् च प्रमाता शून्यादिः प्रमेये व्यतिरेकिणि
माता स मेयः सन् काला -दिकपञ्चकवेष्टितः ॥

त्रयोविंशतिधा मेयं यत् कार्यकरणात्मकम्
तस्याविभागरूप्य् एकं प्रधानं मूलकारणम् ॥

त्रयोदशविधा चात्र बाह्यान्तःकरणावली
कार्यवर्गश् च दशधा स्थूलसूक्ष्मत्वभेदतः ॥