Hatha Ratnavali · Chapter p3

haṭharatnāvalī
dvitīyopadeśaḥ
aṣṭānāṃ kumbhakānāṃ tu lakṣaṇaṃ lakṣyate mayā /
apūrvādhikasiddhyarthaṃ kumbhakānabhyasetsudhīḥ

athavā -
vidhivat prāṇasaṃyāmaiḥ nāḍīcakre viśodhite /
suṣumnāvadanaṃ bhitvā sukhādviśati mārutaḥ

mārute madhyame jāte manaḥsthairya prajāyate /
manasaḥ susthirībhāvaḥ saivāvasthā manonmanī

tatsiddhaye vidhānajñaḥ sadā kurvīta kumbhakān /
vicitrakumbhakābhyāsādvicitrāṃ siddhimāpnuyāt

bhastrikā bhrāmarī sūryabhedojjāyī ca śītalī /
mūrchānāmakasītkāraṃ kevalaścāṣṭakumbhakāḥ /
bhujaṃgakaraṇī ceti kumbhakā navasaṃkhyakāḥ

athavā -
sūryabhedanamujjāyī tathā sītkāraśītalī /
bhastrikā bhrāmarī mūrchā kevalaścāṣṭakumbhakāḥ

pūrakānte tu kartavyo bandho jālandharābhidhaḥ /
kumbhakānte recakādau kartavyastūḍḍiyānakaḥ

adhastātkuñcanenāśu kaṇṭhasaṃkocane kṛte /
madhye paścimatānena syātprāṇo brahmanāḍigaḥ

apānamūrdhvamutthāpya prāṇaṃ kaṇṭhādadho nayet /
yogī jarāvimuktaḥ syāt ṣoḍaśo vayasā bhavet

atha sūryabhedanaṃ nāma kumbhakaḥ
dakṣanāḍyā samākṛṣya bahiḥsthaṃ pavanaṃ śanaiḥ /
yathā lagati kaṇṭhāttu hṛdayāvadhi sasvanam

yatheṣṭaṃ kumbhayedvāyuṃ recayediḍayā tataḥ /
kapālaṃ śodhanaṃ cāpi recayetpavanaṃ śanaiḥ

ālasyaṃ vātadoṣaghnaṃ kṛmikīṭaṃ nihanti ca /
punaḥ punaridaṃ kāryaṃ sūryabhedākhyakumbhakam

athojjāyī -
mukhaṃ saṃyamya nāḍībhyāmākṛṣya pavanaṃ śanaiḥ /
yathā lagati hṛtkaṇṭhaṃ hṛdayāvadhi sasvanaḥ

pūrvavatkumbhayetprāṇaṃ recayediḍayā tataḥ /
gale śleṣmaharaṃ proktaṃ dehānalavivardhanam

nāḍījālodarādhātugatadoṣavināśanam /
gacchatā tiṣṭhatā kāryamujjāyyākhyaṃ hi kumbhakam

atha sītkāraḥ -
sītkāṃ kuryāttathā vaktre ghrāṇenaiva visarjayet /
evamabhyāsayogena kāmadevo dvitīyakaḥ

yoginīcakrasaṃsevyaḥ sṛṣṭisaṃhārakārakaḥ /
na kṣudhā na tṛṣā nidrā naivālasyaṃ prajāyate

bhavetsvacchandadehastu sarvopadravavarjitaḥ /
anena vidhinā satyaṃ yogīndro bhāti bhūtale

atha śītalī -
jihvayā vāyumākṛṣya pūrvavatkumbhakādanu /
śanairaśītiparyyantaṃ recayedanilaṃ sudhīḥ

gulmaplīhodaraṃ doṣaṃ jvarapittakṣudhātṛṣāḥ /
viṣāṇi śītalī nāma kumbhako'yaṃ nihanti ca

atha bhastrikā -
recakaḥ pūrakaścaiva kumbhakaḥ praṇavātmakaḥ /
recako'jasraniḥśvāsaḥ pūrakastannirodhakaḥ /
samānasaṃsthito yo'sau kumbhakaḥ parikīrtitaḥ

yathaiva lohakārāṇāṃ bhastrī vegena cālyate /
tathaiva svaśarīrasthaṃ cālayetpavanaṃ sudhīḥ

yathā śramo bhaved dehe tathā sūryeṇa pūrayet /
yathodaraṃ bhavetpūrṇaṃ pavanena tathā laghu

dhārayennāsikāṃ madhyātarjanībhyāṃ vinā dṛḍham /
kumbhakaṃ pūrvavatkṛtvā recayediḍayānilam

vātapittaśleṣmaharaṃ śarīrāgnivivardhanam /
brahmanāḍīmukhesaṃsthakaphādyargalanāśanam /
viśeṣeṇaiva kartavyaṃ bhastrākhyaṃ kumbhakaṃ tvidam

/25/
atha bhrāmarī -
vegodghoṣaṃ pūrakaṃ bhṛṃganādaṃ bhṛṃgīnādaṃ recakaṃ mandamandam /
yogīndrāṇāṃ nityamabhyāsayogācitte jātā kācidānandalīlā

atha mūrchā -
pūrakānte gāḍhataraṃ baddhvā jālandharaṃ śanaiḥ /
recayenamūrcchanākhyo'yaṃ manomūrchā sukhapradā

atha kevalaḥ -
recakaṃ pūrakaṃ muktvā sukhaṃ yadvāyudhāraṇam /
prāṇāyāmo'yamityuktaḥ sa vai kevalakumbhakaḥ

kevale kumbhake siddhe recapūrakavarjite /
na tasya durlabhaṃ kiñcit triṣu lokeṣu vidyate

śaktaḥ kevalakumbhena yatheṣṭaṃ vāyudhāraṇam" /
etādṛśo rājayogo kathito nātra saṃśayaḥ

atha bhujaṃgīkaraṇama -
kaṇṭhena pūrayedvāyuṃ recayetkaṇṭhanālataḥ /
bhujaṃgīkaraṇaṃ ceti kumbhako'yaṃ navamaḥ smṛtaḥ

mahāmudrā mahābandho mahāvedhastṛtīyakaḥ /
uḍḍiyānaṃ mūlabandho bandho jālandharābhidhaḥ

karaṇī viparītākhyā vajrolī śakticālanam /
sampradāyā khecarī sā daśa mudrāḥ prakīrtitāḥ

ādināthoditā mudrā aṣṭaiśvaryapradāyakāḥ /
vallabhāḥ sarvasiddhānāṃ durlabhā mahatāmapi

iti mudrā daśa proktā ādināthena śambhunā /
ekaikā tāsu mukhyā syānmahāsiddhipradāyinī

atha mahāmudrā -
mahāmudrāṃ pravakṣyāmi vaśiṣṭhenoktamādarāt

pādamūlena vāmena yoniṃ sampīḍya dakṣiṇam /
pādaṃ prasāritaṃ kṛtvā karābhyāṃ pūrayenmukham /
kaṇṭhe bandhaṃ samāropya pūrayedvāyumūrdhvataḥ

yathā daṇḍāhataḥ sarpo daṇḍākāraḥ prajāyate /
ṛjvībhūtā tathā śaktiḥ kuṇḍalī sahajā bhavet

tathā sā maraṇāvasthā jāyate dvipuṭīsthitā

na hi pathyamapathyaṃ vā rasāḥ sarve'pi nīrasāḥ /
api bhuktaṃ viṣaṃ ghoraṃ pīyūṣamiva jīryate

kṣayakuṣṭhagudāvartagulmājīrṇapurogamāḥ /
doṣāḥ sarveḥ kṣayaṃ yānti mahāmudrāṃ tu yo'bhyaset'

kathiteyaṃ mahāmudrā jarāmṛtyuvināśinī /
gopanīyā prayatnena na deyā yasya kasyacit

atha mahābandhaḥ -
pārṣṇiṃ vāmasya pādasya yoni-sthāne niyojayet /
vāmorūpari saṃsthāpya dakṣiṇaṃ caraṇaṃ tathā

pūrayenmukhato vāyuṃ hṛdaye cibukaṃ dṛḍham /
nibhṛtya yonimākuñcya mano madhye niyojayet /
recayecca śanairevaṃ mahābandho'yamucyate

ayaṃ yogo mahābandhassarvasiddhipradāyakaḥ /
savyāṃge ca samabhyasya dakṣiṇāṃge samabhyaset

ayaṃ ca sarvanāḍīnāmūrdhvagativibodhakaḥ /
triveṇīsaṃgamaṃ dhatte kedāraṃ prāpayenmanaḥ

rūpalāvaṇyasampannā yathā strī puruṣaṃ vinā /
mahāmudrāmahābandhau niṣphalau vedhavarjitau

atha mahāvedhaḥ
mahābandhasthito yogī kṛtvā pūrakamekadhīḥ /
vāyūnāṃ gatimākṛṣya nibhṛtaṃ kaṇṭhamudrayā

aṣṭadhā kriyate caitat yāme yāme dine dine /
puṇyasaṃghātasandhāyī pāpaughabhiduraḥ sadā

samyak śraddhāvatāmeva sukhaṃ prathamasādhane /
vahnistrīpathasevāṃ ca prathamaṃ parivarjayet

samahastayugo bhūmau sphicau santāḍayecchanaiḥ /
ayameva mahāvedhaḥ siddhido'bhyāsato bhavet

etattrayaṃ mahāguhyaṃ jarāmṛtyuvināśanam /
vahnivṛddhikaraṃ caiva hyaṇimādiguṇapradam

athoḍyānabandhaḥ -
baddho yena suṣumnāyāṃ prāṇastūḍḍiyate yataḥ /
tasmāduḍḍiyānākhyo'yaṃ yogibhiḥ samudāhṛtaḥ

uḍḍīnaṃ kurute yasmādaviśrāntaṃ mahākhagaḥ /
uḍḍiyānaṃ tadeva syāt tatra bandho'bhidhīyate

udare paścimaṃ tānaṃ nābherūrdhvaṃ ca dhārayet /
uḍḍiyāno hyasau bandho mṛtyumātaṃgakesarī

guruṇā sahajaṃ proktaṃ vṛddho'pi taruṇo bhavet /
bāhyoḍyāṇaṃ ca kurute bāhyālaṃkāravardhanam

nābherūrdhvamadho vāpi tānaṃ kuryāt prayatnataḥ /
ṣaḍmāsabhyasenmṛtyuṃ jayatyeva na saṃśayaḥ

atha mūlabandhaḥ -
pārṣṇibhāgena sampīḍya yonimākuñcayed gudam /
apānamūrdhvamākuñcya mūlabandho'yamucyate

adhogatimapānaṃ vai ūrdhvagaṃ kurute balāt /
ākuñcanena taṃ prāhurmūlabandhaṃ hi yoginaḥ

gudaṃ pārṣṇyā ca sampīḍya vāyumākuñcayed balāt /
vāraṃ vāraṃ yathā cordhva samāyāti samīraṇaḥ

prāṇāpānau nādabindū mūlabandhena caikatām /
gatau tadā yogasiddhiṃ prāpnotyeva na saṃśayaḥ 161 //
apānaprāṇayoraikyaṃ kṣayo mūtrapurīṣayoḥ /
yuvā bhavati vṛddho'pi satataṃ mūlabandhanāt

apāne cordhvage jāte prayāte vahnimaṇḍale /
tathānalaśikhādīptirvāyunā preritā yathā

yātāyātau vahnyapānau mūlarūpasvarūpakau /
tenābhyantaḥ pradīptastu jvalano dehajastathā

daṇḍāhatā bhujaṃgīva niścitaṃ ṛjutāmiyāt /
bilaṃ praviṣṭeva tato brahmanāḍyantaraṃ vrajet /
tasmānnityaṃ mūlabandhaḥ kartavyo yogibhiḥ sadā

atha jālandharaḥ
kaṇṭhamākuñcya hṛdaye sthāpayeccibukaṃ dṛḍham /
bandho jālandharākhyo'yaṃ jarāmṛtyuvināśakaḥ /
badhnāti hi śirājālaṃ nādho yāti nabhojalam

tato jālandharo bandhaḥ kaṇṭhasaṃkocane kṛte /
na pīyūṣaṃ patatyagnau na ca vāyuḥ prakupyati

bandhatrayamidaṃ śreṣṭhaṃ mahāsiddhaiśca sevitam /
sarveṣāṃ yogatantrāṇāṃ sādhanaṃ yogino vidhuḥ

adhastātkuñcanenāśu kaṇṭhasaṃkocane kṛte /
madhye paścimatānena syātprāṇo brahmanāḍigaḥ

mūlasthānaṃ samākuñcya uḍḍiyānaṃ tu kārayet /
iḍāṃ ca piṃgalāṃ baddhvā vāhayet paścimaṃ patham

anenaiva vidhānena prayāti pavano layam /
tato na jāyate mṛtyurjarārogādikaṃ tathā

atha viparītakaraṇī -
yatkiñcit sravate candrādamṛtaṃ divyarūpi ca/
tatsarvaṃ grasate sūryastena piṇḍaṃ vināśi ca

tatrāsti divyaṃ karaṇaṃ sūryasya mukhabandhanam /
gurūpadeśato jñeyaṃ na tu śāstrārthakoṭibhiḥ

ūrdhvaṃ nābhiradhastālurūrdhvaṃ bhānuradhaḥ śaśī /
karaṇī viparītākhyā guruvākyena labhyate

karaṇī viparītākhyā sarvavyādhivināśinī /
nityamabhyāsayuktasya jaṭharāgnivivardhinī

āhāro bahulastasya sampādyaḥ sādhakena vai /
alpāhāro yadi bhaveddehamagnirdahet" kramāt

adhaśiraścordhvapādau kṣaṇaṃ syātprathame dine /
kṣaṇācca kiñcidadhikamabhyasecca dine dine

valitaṃ palitaṃ caiva ṣaṇmāsānna tu dṛśyate /
yāmamātraṃ tu yo nityamabhyaset sa tu kālajit

svasthaṃ yo vartamāno'pi yogoktairniyamairvinā /
karaṇī viparītākhyā śrīnivāsena lakṣitā

atha vajrolī -
vajrolīṃ kathayiṣyāmi gopitāṃ sarvayogibhiḥ /
atīva tadrahasyaṃ hi na deyaṃ yasya kasyacit

svamānaistu samo yasmāt tasyaiva kathayed dhuvam /
putrasyāpi na dātavyaṃ guruśiṣyakrama vinā

kuṇḍalībodhanaṃ samyak nāḍīnāṃ pariśodhanam /
apānaprāṇayoraikyaṃ kāryaṃ vajrolikarmaṇā

abhyāsasya kramaṃ vakṣye sampradāyānusārataḥ /
kāminī vā naro vātha vajrolīṃ buddhimānnayet

phūtkārocitaṃ liṃgaṃ randhrāgre bahiḥ sthāpyamekaṃ liṃgarandhramadhye sthāpyamaparaṃ militvā nāladvayanirūpaṇamādau kriyate // tayormadhye phūtkārocitaṃ nālasvarūpaṃ pradarśyate /
kāñcanasya ca rūpasya tāmrasyāpyathavā'yasaḥ /
nālaṃ kuryātprayatnena phutkārakaraṇocitam"

viṃśatyaṃguladīrghamānaruciraṃ tvādau suvṛttālpagam
phūtkārocitakālarūpasadṛśaṃ nālaṃ haṭhābhyāsibhiḥ /
proktaṃ tādṛśameva liṃgavivare yatnena saṃsthāpayet
phūtkāraṃ tadanantaraṃ prakurutāṃ vāyuryathā sañcaret

haṭhapradīpikākārastu -
yatnataḥ śaranālena phūtkāraṃ vajrakandhare /
śanaiḥ śanaiḥ prakurvīta vāyusañcārakāraṇāt

haṭhapradīpikākāramataṃ haṭhayogābhyāse'jñānavilasitamityupekṣaṇīyam //
yadi syāccharanāle hi bhṛśaṃ vāyurna sañcaret /
vāyusañcāraṇe tyājye śaranālādikaṃ matam

liṃgarandhramadhye' sthāpanīyanālasvarūpaṃ liṃgarandhravistārārtha nirūpyate /
tantuvat kanakaṃ nālaṃ nāgaṃ tāmrātinirmalam /
nāladravyamidaṃ proktaṃ śrīnivāsena yoginā

nirmitaṃ tripalairnāgairdvādaśāṃguladīrghakam /
chatrākāraṃ prakurvīta nālaṃ snigdhaṃ sitaṃ mṛdu

niyojyaṃ liṃgarandhre ca nirbhītaḥ sthāpayet kṣaṇam /
liṃgasthairyaṃ liṃgadārḍhyaṃ bahuvīryavivardhanam

nālaṃ kāñcananirmitaṃ mṛdutaraṃ sāṃgaṃ ca nāgaiḥ kṛtam /
chatrākāramataḥ palatrayayutaṃ dairghyaṃ vitastairmitam

nālaṃ tādṛśameva liṃgavivare yatnena saṃsthāpayet

vistāraṃ tadanantaraṃ dṛḍhataraṃ liṃgaṃ tato jāyate /
vāyusañcāraṇe jāte ūrdhvamākṛṣyate balāt

nārīṃ ramyāmadhaḥsthāpya rahasye tu digambarām /
svayaṃ digambaro bhūtvā uttānāyāstathopari /
śayitvā kumbhakaṃ kṛtvā kiñcinnārī svayaṃ ca hi

anyo'nyaṃ gāḍhamāliṃgya yonau liṃga niropayet /
mithastvadharapānaṃ ca kuryāt galaravādikam

vilikhecca nakhenaiva dhārayetsvedasambhavam /
nāryā bhagāt patadbindumabhyāsenordhvamāharet

calitaṃ ca nijaṃ bindumūrdhvamākṛṣya rakṣayet /
evaṃ saṃrakṣayed binduṃ mṛtyuṃ jayati yogavit

maraṇaṃ bindupātena jīvitaṃ bindudhāraṇāt /
cittāyattaṃ nṛṇāṃ śukraṃ śukrāyattaṃ ca jīvitam /
tasmācchukraṃ manaścaiva rakṣaṇīyaṃ prayatnataḥ

evaṃ yo bhajate nārī tāmeva manasā smaret

sindūrasadṛśaṃ yonau strīṇāmāsthāyikaḥ rajaḥ /
ṛtumatyā rajo'pyevaṃ rajo binduṃ ca rakṣayet

ṛtukāle yathā śukraṃ nirdoṣaṃ yonisaṃgatam /
tathā tanmārutenaiva strīraktenaikatāmiyāt

āyuḥ karma ca vittaṃ ca vidyā caiva catuṣṭayam /
ādhānakāle likhitaṃ garbhasthasyaiva dehinaḥ

yāvadyāvadayaṃ deho dhṛyate garbhaśāyinaḥ /
tāvattāvadabhivyaktirliṃgasyāsya prajāyate

āyuṣyaṃ vardhate nityaṃ yadi binduḥ sthiro bhavet /
utpattisthitisaṃhāre bindureko hi kāraṇam

tato bhavedrājayogī nāntarā bhavati dhruvam /
na cinmātreṇa siddhiḥ syādabhyāsāt pavanasya vai

abhyāsasya kramaṃ vakṣye nārīṇāṃ ca śanaiḥ śanaiḥ

liṃgaṃ karābhyāmākuñcya maṇiṃ cāntaḥ praveśayet /
yāvanmaṇipraveśaḥ syāttāvadabhyāsamācaret /
tataḥ paraṃ samarthā cedūrdhvamākuñcayedrajaḥ

tasyāḥ śarīre nādastu bindutāmeva gacchati /
sa bindustadrajaścaiva ekīkṛtya svadehajau

vajrolyabhyāsayogena yogasiddhiḥ kare sthitā /
ajñātayogaśāstreṇa vajrolīṃ strī tu nābhyaset

ayaṃ yogaḥ puṇyavatāṃ dhanyānāṃ tattvaśālinām /
nirmatsarāṇāṃ sidhyeta na tu matsaraśālinām

sarveṣāmeva yogānāmayaṃ yogaḥ śubhaṃkaraḥ /
tasmādayaṃ variṣṭho'sau bhuktimuktiphalapradaḥ

sugandhiryogino dehe jāyate bindudhāraṇāt

atha sahajoliḥ -
sahajolī cāmarolī vrajolyā eva bhedataḥ

jale subhasma nikṣipya dagdhagomayasambhavam /
vajrolī maithunādūrdhvaṃ strīpuṃsoścāṃgalepanam

āsīnayoḥ sukhenaiva muktavyāpārayoḥ kṣaṇam /
sahajoliriyaṃ proktā kartavyā yogibhiḥ sadā

athāmarolī -
vihāya nityāṃ prathamāṃ ca dhārāṃ
vihāya niḥsāratayāntyadhārām /
niṣevyate śītalamadhyadhārāṃ
kāpālikaiḥ khaṇḍamatairanarghyām

amarīṃ yaḥ pibennityaṃ nasyaṃ kuryāddine dine /
vajrolīmabhyasennityamamarolīti kathyate

atha śakticālanam -
pucche pragṛhya bhujagī suptāmudbodhayedabhīḥ /
nidrāṃ vihāya sā ṛjvī ūrdhvamuttiṣṭhate haṭhāt

dvādaśāṃgula dairghyañca vistṛtaṃ ca ṣaḍaṃgulam /
haṭhajñaiḥ mṛdulaṃ proktaṃ veṣṭanāmbaralakṣaṇam

vistāritena tāṃ jihvāṃ veṣṭayitvā tataḥ sudhīḥ /
aṅguṣṭhatarjanībhyāṃ ca hastābhyāṃ dhārayed dhuvam /
svaśaktyā cālayedvāme dakṣiṇe ca punaḥ punaḥ

muhūrtadvayaparyantaṃ nirbhītaścālayedasau /
ūrdhvamākṛṣyate kiñcitsuṣumṇāṃ kuṇḍalīgatām /
ṣaṇmāsāccālanenaiva śaktistasyordhvagā bhavet

sūryeṇa pūrayedvāyuṃ sarasvatyāstu cālayet /
śabdagarbhācālanena yogī rogaiḥ pramucyate

yena sañcālitāśaktiḥ sa yogī siddhibhājanaḥ /
kimatra bahunoktena mṛtyuṃ jayati līlayā

saśailavanadhātryāstu yathādhāro'hi nāyakaḥ /
aśeṣayogatantrāṇāṃ tathādhāro hi kuṇḍalī

phaṇī kuṇḍalinī nāgī cakrī vakrī sarasvatī /
lalanā rasanā kṣatrī lalāṭī śaktiḥ śaṃkhinī

rajvī bhujaṃgī śeṣā ca kuṇḍalī sarpiṇī maṇiḥ /
ādhāraśaktiḥ kuṭilā karālī prāṇavāhinī

aṣṭavakrā ṣaḍādhārā vyāpinī kalanādharā /
kurītyevaṃ ca vikhyātāḥ śabdāḥ paryāyavācakāḥ

iti śakticālanam /
atha khecarīmudrā
khecarī cāntimā mudrā acirād brahmarandhragā /
suṣumṇagāmṛtā mūrdhvā lambikā vācakāḥ smṛtāḥ

na krameṇa vinā śāstraṃ naiva śāstraṃ vinā kramaḥ /
śāstraṃ kramayutaṃ jñātvā tanyate śrīmatāṃ bhuvi

jihvākatinibhaṃ śastramalpaṃ tacchedane kṣamam /
snuhīpatranibhaṃ balyaṃ śastraṃ kuryādvicakṣaṇaḥ

iḍāyāḥ piṅgalāyāśca suṣumṇāyāśca madhyataḥ /
prajñāvatāṅguliṃ datvā granthimadhyaṃ samucchinet

dviniṣkaṃ niṣkaniṣkārddhaṃ pathyānāgarasaindhavān /
cūrṇayitvā tu tatcūrṇaṃ tena cūrṇena gharṣayet

pūrvoktena prakāreṇa śakticālanamācaret /
godohanaṃ yathā tadvacchakticālanamācaret

punaḥ saptadine prāpte tilamātraṃ samucchinet

chedanādikrameṇaiva yāvad bhrūmadhyagā bhavet /
tāvacchanaiḥ prakartavyaṃ śrīnivāsasya bhāṣaṇam

atrāyaṃ haṭhayogasampradāyaḥ -
śiśurlambikāyogenātītānāgataṃ jānāti / garbhaniḥsaraṇād bhūmipāte lambikāyoge jivābandho pātinī bhavati / lambikā pratibimbatvena jihvāyāṃ adhogranthi-sūkṣmarūpatayā sarveṣāṃ narāṇāṃ pratyakṣatayā adyāpi dṛśyate // tatraiva lambikā pratibandhakasūkṣmagranthibhedanaṃ kāryamiti mama pratibhāti /
parameśvaraproktakhecarīnāmapaṭale tu -
snuhīpatranibhaṃ śastraṃ sutīkṣṇaṃ snigdhanirmalam /
samanāyāṃ tu jihvāyāṃ romamātraṃ samucchinet

romamātrachedane na vilambena hi lambikā /
hṛdaye granthakārāṇāmākūtaṃ bhaṇitaṃ mayā

dattātreyastu -
kapālakuhare jihvā praviṣṭā viparītagā /
bhuvorantargatā dṛṣṭirmudrā bhavati khecarī

na rogo maraṇaṃ tasya na nidrā na kṣudhā tṛṣā /
na ca mūrchā bhavettasya yo mudrāṃ vetti khecarīm

pīḍyate na sa rogeṇa lipyate na ca karmaṇā /
bādhyate na ca kālena yo mudrāṃ vetti khecarīm

haṭhapradīpikāyām -
chedanacālanadohaiḥ kalāṃ krameṇa vardhayettāvat //
yāvadiyaṃ bhrūmadhye spṛśati tadānīṃ khecarīsiddhiḥ

chedanasya prakārokterabhāvānmūḍhatā yataḥ /
sādhāraṇoktyā durbodhānnāṃgīkāryamidaṃ matam

gurudarśitamārgeṇa saṃketaḥ kathyate mayā /
saṃketaśṛṃkhalābhāve khecarī tu kathaṃ bhavet

sarpākāraṃ savalayaṃ śṛṃkhalādvayasevitam /
sakharparaṃ ṣaḍvitastidairghyaṃ saṃketalakṣaṇam

śṛṃkhalādvitayanirmitāṃ parāṃ
sarpavadvalayakharparānvitām /
viṃśadaṃgulamitāṃ sudīrghikāṃ
lambikābhyudayakāriṇīṃ viduḥ

śṛṃkhalāyāśca valaye jihvāṃ tatra praveśayet //
yathā bhavetsuṣumṇāgā tathā bhavati khecarī

khecaryā mudraṇe jāte dehī dehaṃ na muñcati /
kāyaṃ tyaktvā tu kalpānte brahmasthānaṃ vrajatyasau

prāṇe suṣumṇā samprāpte nādaṃ tu śrūyate'ṣṭadhā /
ghaṇṭādundubhiśaṃkhādivīṇāveṇuninādavat /
tanūnapāttaḍittāreśapavanopamam

vāsukyādyaiśca nāgaiśca takṣakenāthavā punaḥ /
daṣṭasya yogino dehe na viṣaṃ kartumarhati

utkallola kalāmṛtaṃ ca vimalaṃ dhārāmṛtaṃ yaḥ pibet /
nirdoṣaḥ sa mṛṇālakomalatanuryogī ciraṃ jīvati

sevante yadi lambikāgramaniśaṃ jihvā rasasyandinī
sakṣārākaṭutiktadugdhasadṛśaṃ madhvājyatulyaṃ yadā

aśeṣāṇāṃ ca nāḍīnāṃ jihvāgre randhramāgataḥ /
vidhatte yena mārgeṇa tena cāndrī kalāṃ vrajet

kanyāvādākhilā vādarasavādādisiddhayaḥ /
yoginaḥ sampravartante teṣāṃ vajrolikhecarī

trikaṭumbī haṭhā caiva golīḍhaṃ śikharaṃ tathā //
triśaṃkhī vajramoṃkārī mūrdhvanālaṃ bhuvormukhe

piṃgalā dambhinī sūryā yaminā kākṣarā tathā /
kālāgni rudrī caṇḍī ca te syuḥ piṃgalanāmakāḥ

iḍā candrā sinīvālī gaṃgā cāmarabodhitā /
iḍāyāḥ vācakāḥ śabdāḥ paryāyeṇa prakīrtitāḥ

gośabdenoditā jihvā tatpraveśo hi tāluni /
gomāṃsabhakṣaṇaṃ tattu mahāpātakanāśanam

gomāṃsa bhakṣayennityaṃ pibedamaravāruṇīm /
kulīnaṃ tamahaṃ manye anye tu kulaghātakāḥ

jihvāpraveśasambhūtavahninotthāpitā khalu /
candrāt sravati yaḥ sāraḥ sā syādamaravāruṇī

iti śrīnivāsayogīviracitāyāṃ haṭharatnāvalyāṃ dvitīyopadeśaḥ