Harivamsa · Chapter 116

āsannaṃ viprakṛṣṭaṃ vā yadi kālaṃ na vidmahe
tasmād dvāparavidhvaṃsād yugāntaṃ spṛhayāmy aham //

prāptā vayaṃ hi taṃ kālam anayā dharmatṛṣṇayā
prāptā vayaṃ ca dharmaṃ svaṃ sukham alpena karmaṇā //

prajāsamudvegakaraṃ yugāntaṃ samupasthitam
tasmāt samudvegakare yugānte pratyupasthite |
pranaṣṭadharmaṃ dharmajña nimittair vaktum arhasi //

pṛṣṭa evaṃ bhaviṣyasya gatiṃ tattvena cintayan
evaṃ bhaviṣye tu gatiṃ yogenaiva vicintayan |
yugānte pūrvarūpāṇi bhagavān abravīt tadā //

arakṣitāro hartāro balibhāgasya pārthivāḥ
yugānte prabhaviṣyanti svarakṣaṇaparāyaṇāḥ //

akṣatriyāś ca rājāno viprāḥ śūdropajīvinaḥ
śūdrāś ca brāhmaṇācārā bhaviṣyanti yugakṣaye //

kāṇḍapṛṣṭhāḥ śrotriyāś ca havīṃṣi bharatarṣabha
ekapaṅktyām aśiṣyanti yugānte janamejaya //

śilpavanto 'nṛtaparāḥ narā madyāmiṣapriyāḥ
paraṃ dharmaṃ haniṣyanti manuṣyā mandabuddhayaḥ |
bhāryāmitrā bhaviṣyanti yugānte janamejaya //

rājavṛtte sthitāś corā rākānaś coraśīlinaḥ
bhṛtyā anirviṣṭabhujo bhaviṣyanti yugakṣaye //

dhanāni ślāghanīyāni satāṃ vṛttam apūjitam
nāryaś cāpi kariṣyanti kṛṣim eva kalau yuge |
akutsanā ca patite bhaviṣyati yugakṣaye //

pranaṣṭacetanā martyā muktakeśā vicūlinaḥ
unaṣoḍaśavarṣāś ca prajāsyanti narās tadā //

aṭṭaśūlā janapadāḥ śivaśūlāś catuṣpathāḥ
pramadāḥ keśaśūlāś ca bhaviṣyanti yugakṣaye //

sarve brahma vadiṣyanti sarve vājasaneyinaḥ
śūdrā bhovādinaś caiva bhaviṣyanti yugakṣaye //

tapoyajñārthavedānāṃ vikretāro dvijātayaḥ
ṛtavaś ca bhaviṣyanti viparītā yugakṣaye //

śukladantājitākṣāś ca muṇḍāḥ kāṣāyavāsasaḥ
śūdrā dharmaṃ cariṣyanti śākyabuddhopajīvinaḥ //

śvāpadapracuratvaṃ ca gavāṃ caiva parikṣayaḥ
svādūnāṃ vinivṛttiś ca vidyād antagate yuge //

antyā madhye nivatsyanti madhyāś cāntāvasāyinaḥ
yathānimnaṃ prajāḥ sarvā gamiṣyanti yugakṣaye //

tathā dvihāyanā damyās tathā palvalakarṣakāḥ
citravarṣī ca parjanyo yuge kṣīṇe bhaviṣyati //

na te dharmaṃ cariṣyanti mānavā nirgate yuge
ūṣarābahulā bhūmiḥ panthāno nagarāntarā
sarve vāṇijakāś caiva bhaviṣyanti kalau yuge //

pitṛkṛtyāni deyāni vidhamantaḥ sutās tadā
haraṇāya prapatsyante lobhānṛtavirodhitāḥ //

saukumārye tathā rūpe ratne copakṣayaṃ gate
bhaviṣyanti yugasyānte nāryaḥ keśair alaṃkṛtāḥ //

nirvihārasya bhītasya gṛhasthasya bhaviṣyati
yugānte samanuprāpte nānyā bhāryāsamā ratiḥ //

kuśīlānāryabhūyiṣṭhaṃ vṛthārūpasamāvṛtam
puruṣālpaṃ bahustrīkaṃ tad yugāntasya lakṣaṇam //

bahuyācanakā lokā dāsyante ca parasparam
avicārya grahīṣyanti dānaṃ varṇāntarāt tathā |
rājacorādidaṇḍārto janaḥ kṣayam upaiṣyati //

sasyaniṣpattir aphalā taruṇā vṛddhaśīlinaḥ
īhayāsukhino lokā bhaviṣyanti gate yuge //

varṣāsu vātāḥ puruṣā nīcāḥ śarkaravarṣiṇaḥ
saṃdigdhaḥ paralokaś ca bhaviṣyati yugakṣaye //

vaiśyācārāś ca rājanyā dhanadhānyopajīvinaḥ
yugāpakramaṇe pūrvaṃ bhaviṣyanti dvijātayaḥ //

apravṛttāḥ prapatsyante samayāḥ śapathās tathā
ṛṇaṃ ca vinayabhraṃśo yuge kṣīṇe bhaviṣyati //

bhaviṣyaty aphalo harṣaḥ krodhaś ca saphalo nṛṇām
ajāś caivopayokṣyante payaso 'rthe yugakṣaye //

aśāstravihitā prajñā evam eva bhaviṣyati
aśāstraviduṣāṃ puṃsām evam eva svabhāvataḥ |
apramāṇaṃ kariṣyanti nītiṃ paṇḍitamāninaḥ |
śāstroktasyāpravaktāro bhaviṣyanti yugakṣaye //

sarvaḥ sarvaṃ vijānāti vṛddhān anupasevya ca
na kaścid akavir nāma yugānte pratyupasthite //

na kṣatrāṇi niyokṣyanti vikarmasthā dvijātayaḥ
coraprāyāś ca rājāno yugānte pratyupasthite //

kuṇḍā vṛṣā naikṛtikāḥ surāpā brahmavādinaḥ
aśvamedhena yakṣyanti yugānte janamejaya //

ayājyān yājayiṣyanti tathābhakṣyasya bhakṣiṇaḥ
brāhmaṇā dhanatṛṣṇārtā yugānte samupasthite //

bhogārtham abhipatsyante na ca kaścit paṭhiṣyati
ekaśaṅkhās tathā nāryo gavedhukapinaddhakāḥ //

nakṣatrāṇi vihīnāni viparītā diśas tathā
saṃdhyārāgo 'tha digdāho bhaviṣyaty apare yuge //

pitṝn putrā niyokṣyanti vadhvaḥ śvaśrūś ca karmasu
vākśarais tarjayiṣyanti gurūñ śiṣyās tathaiva ca |
mukheṣu ca prayokṣyanti pramattāś ca narās tadā |
viyoniṣu cariṣyanti pramadāsu narās tadā //

akṛtāgrāṇi bhokṣyanti narāś caivāgnihotriṇaḥ
bhikṣāṃ balim adattvā ca bhokṣyanti puruṣāḥ svayam //

patīn suptān vañcayitvā gamiṣyanti striyo aṇyataḥ
puruṣāś ca prasuptāsu bhāryāsu ca parastriyam //

nāvyadhito nāpy arujo janaḥ sarvo 'bhyasūyakaḥ
na kṛtapratikartā ca kāle kṣīṇe bhaviṣyati //