Harivamsa · Chapter 112

tatas te sahitāḥ sarve trayastraya ivāgnayaḥ
vainateyaṃ samāruhya yudhyamānā raṇe sthitāḥ //

tataḥ sarvāṇy anīkāni bāṇavarṣair mahābalāḥ
ardayan vainateyasthā nadanto 'tibalā raṇe //

cakralāṅgalapātaiś ca bāṇavarṣaiś ca pīḍitam
saṃcukopa mahānīkaṃ dānavānāṃ mahātmanām //

kakṣe 'gnir iva saṃvṛddhaḥ śuṣkendhanasamīritāḥ
kṛṣṇabāṇāgnir udbhūto vivṛddhim upagacchati //

sa dānavasahasrāṇi tasmin samaramūrdhani
yugāntāgnir ivārciṣmān dahamāno vyarājata //

tāṃ dīryamāṇāṃ mahatīṃ nānāpraharaṇodyatām
senāṃ bāṇaḥ samāsādya vārayan vākyam abravīt //

lāghavaṃ samupāgamya kim evaṃ bhayaviklavāḥ
daityavaṃśasamutpannāḥ palāyadhyvaṃ mahāmṛdhe //

kavacāsigadāprāsān khaḍgacarmaparaśvadhān
utsṛjyotsṛjya gacchanti kiṃ bhavanto 'ntarikṣagāḥ //

svajātiṃ caiva vāsaṃ ca harasaṃsargam eva ca
mānayadbhir na gantavyam eṣo hy aham avasthitaḥ //

evam uccāritāṃ vācaṃ śṛṇvantas tām acintya vai
apakrāmanta te sarve dānavā bhayapīḍitāḥ //

pramāthagaṇaśeṣaṃ tu tadanīkapuraḥsaram
bhagnāvaśeṣaṃ yuddhāya manaś cakre punas tadā //

kumbhāṇḍo nāma bāṇastha sakhāmātyaś ca vīryavān
balaṃ bhagnaṃ samālokya vacanaṃ cedam abravīt //

eṣa bāṇaḥ sthito yuddhe śaṃkaro 'yaṃ guhas tathā
kimarthaṃ yuddham utsṛjya bhavanto bhayamohitāḥ //

nandīśvarasamāyuktaṃ ratham āsthāya vīryavān
saṃdaṣṭauṣṭhapuṭo rudraḥ pradhāvati yato hariḥ //

pibann iva tadākāśaṃ siṃhayukto mahāsvanaḥ
ratho bhāti ghanonmuktaḥ paurṇamāsyāṃ yathā śaśī //

vainateyastham asyantam āyāntam agraṇīr haraḥ
tiṣṭha tiṣṭheti covāca kruddho 'haṃkāragarvitaḥ ||
bhagavān api govindaḥ smayann iva ca saṃsthitaḥ |
sthito 'smi tava saṃgrāme yatheṣṭaṃ kriyatām iti |
hariṃ vivyādha kupito nārācānāṃ śatena saḥ //

sa śarair arditas tena hareṇāmitraghātinā
harir jagrāha kupito hy āstraṃ pārjanyam uttamam //

tataḥ śatasahasrāṇi śarāṇāṃ nataparvaṇām
niṣpetuḥ sarvato digbhyo yato haratanus tataḥ //

athāgneyaṃ mahāraudram astram astravidāṃ varaḥ
mumoca ruṣito rudras tad adbhutam ivābhavat //

tato viśīrṇadehās te catvāro 'pi samantataḥ
nādṛśyanta śaraiś channā dahyamānāś ca vahninā //

siṃhanādaṃ tataś cakruḥ sarva evāsurottamāḥ
hato 'yam iti vijñāya āgneyāntarhite harau //

tatas tad viṣahitvājau hy astram astravidāṃ varaḥ
tataḥ kruddho hṛṣīkeśaḥ pratiṣidhyāgnisaṃcayaṃ |
jagrāha vāruṇaṃ so 'straṃ vāsudevaḥ pratāpavān //

udyate vāruṇāstre tu vāsudevena dhīmatā
prayukte vāsudevena vāruṇāstre 'titejasi |
āgneyaṃ praśamaṃ yātam astraṃ vāruṇatejasā //

paiśācaṃ rākṣasaṃ caiva raudram āṅgirasaṃ bhavaḥ
mumocāstrāṇi catvāri yugāntāgninibhāni saḥ //

vāyavyam atha sāvitraṃ vāsavaṃ mohanaṃ tathā
atrāṇāṃ vāruṇārthāya vāsudevo mumoca ha //

astraiś caturbhiś catvāri vārayitvā ca keśavaḥ
jagrāha vaiṣṇavaṃ so 'straṃ vyāditāsyāntakopamam //

vaiṣṇavāstre vimukte tu sarva evāsurottamāḥ
bhūtayakṣagaṇāś caiva bāṇānīkaṃ ca sarvaśaḥ |
diśaḥ pradudruvuḥ sarve bhayamohitalocanāḥ //

andhakārīkṛte loke pradīpte tryambake tadā
na nandī nāpi ca ratho na rudraḥ pratyadṛśyata //

dviguṇaṃ dīptadehas tu roṣeṇa ca balena ca
astraṃ nārāyaṇaṃ nāma nārāyaṇajighāṃsayā |
jagrāha śūlī bhūtātmā devānām atha paśyatām ||
mumoca ca yathāśakti rudro brahmātmasaṃbhavaḥ |
vimuktaṃ tena tac cāstraṃ jagāma ca samīpataḥ ||
śaṃkarasya tad astraṃ tu prahasan keśavas tadā |
jagrāha līlayā viṣṇus tūṇau tac ca vyanikṣipat ||
kupito rudrarūpeṇa rudraḥ saṃhāramūrtimān ||
tataḥ śūlaṃ samādāya sarvaśatruvidāraṇam |
devadānavagandharva+ +yakṣapannagarakṣasām |
bhayaṃkaraṃ mumocātha kṛṣṇam uddiśya śaṃkaraḥ ||
tac ca śūlaṃ harir dṛṣṭvā nijaśaktyā nyavārayat ||
tatas trilocanaḥ kruddhaḥ kālāntakayamopamaḥ |
astraṃ pāśupataṃ yat tu loke khyātaṃ svavīryavat |
jagrāhātmasamaṃ sākṣād dhantuṃ keśavam ojasā ||
vijñāyātha tadā viṣṇus tad evāstraṃ samādade ||
dve hy astre praśamaṃ yāte dvābhyāṃ saṃdhārite tadā |
tripurāntakaraṃ bāṇaṃ jagrāha ca caturmukhaḥ //

saṃdadhatkārmuke caiva kṣeptukāmas trilocanaḥ
vijñāto vāsudevena cittajñena mahātmanā //

jṛmbhaṇaṃ nām so 'py astraṃ jagrāha puruṣottamaḥ
tenāstreṇa tadā kṛṣṇo mantrapūtena keśavaḥ |
haraṃ saṃjṛmbhayām āsa kṣiprakārī mahābalaḥ //

pāñcajanyasya ghoṣeṇa śārṅgavisphūrjitena ca
devaṃ vijṛmbhitaṃ dṛṣṭvā sarvabhūtāni tatrasuḥ //

kumbhāṇḍasaṃgṛhītāśve rathe tiṣṭhan guhas tadā
abhidudrāva kṛṣṇaṃ ca balaṃ pradyumnam eva ca //

śaraughācitagātrās te trayastraya ivāgnayaḥ
śoṇitaughaplutair gātraiḥ pratyayudhyan guhaṃ tadā //

tatas te yuddhamārgajñās trayas tribhir anuttamaiḥ
vāyavyāgneyapārjanyair bibhidur dīptatejasaḥ //

tasya dīptaśaraughasya dīptacāpadharasya ca
śaraughān astramāyābhir grasanti sma mahātmanaḥ //

astraṃ brahmaśiro nāma kālakalpaṃ durāsadam
saṃdaṣṭauṣṭhapuṭaḥ saṃkhye jagrāha sa guhas tadā //

prayukte brahmaśirasi sahasrāṃśusamaprabhe
ugre paramadurdharṣe lokakṣayakare tadā //

mahābhūteṣu sarveṣu pradhāvatsu tatastataḥ
astratejaḥpramūḍhe tu viṣaṇṇe jagati prabhuḥ |
keśavaḥ keśimathanaś cakraṃ jagrāha vīryavān //

sarveṣām astravīryāṇāṃ vāraṇe ghātane tathā
cakram apraticakrasya loke khyātaṃ mahātmanaḥ //

astraṃ brahmaśiras tena niṣprabhaṃ kṛtam ojasā
meghair ivātapāpāye savitur maṇḍalaṃ mahat //

tato niṣprabhatāṃ yāte naṣṭavīrye mahaujasi
tasmin brahmaśirasy astre śaktiṃ jagrāha kāñcanīm //

maholkām iva tāṃ dīptāṃ yugāntāgnisamaprabhām
ghaṇṭāmālākulāṃ śaktiṃ cikṣepa ruṣito guhaḥ //

jṛmbhamāṇeva gagane saṃpradīptamukhī tataḥ
āghāvantī mahāśaktiḥ kṛṣṇasya vadhakāṅkṣiṇī //

bhṛśaṃ viṣaṇṇāḥ sendrāś ca sarvāmarapurogamāḥ
śaktiṃ prajvalitāṃ dṛṣṭvā dagdhaḥ kṛṣṇa iti bruvan //

abhyāśamāgatāṃ tāṃ tu mahāśaktiṃ mahāmṛdhe
huṃkāreṇaiva nirbhartsya pātayām āsa bhūtale //

pātitāyāṃ mahāśaktyāṃ sādhu sādhv iti sarvaśaḥ
siṃhanādaṃ tataś cakruḥ sarve devāḥ savāsavāḥ //

tato deveṣu nardatsu vāsudevaḥ pratāpavān
punaś cakraṃ sa jagrāha bhūtāntakaraṇaṃ tadā //

vyāvidhyamāne cakre tu kṛṣṇenāmitatejasā
kumārarakṣaṇārthāya vibhajya svatanuṃ tadā |
taṃ dṛṣṭvā pramukhe tasya vyatiṣṭhita ca kauṭavī
digvāsā devavacanāt prātiṣṭhat tatra kauṭavī |
lambā nāma mahābhāgā bhāgo devyās tathāṣṭamaḥ |
citrā kanakaśaktis tu sā ca nagnā sthitāntare ||
athāntarā kumārasya devīṃ dṛṣṭvā mahābhujaḥ |
parāṅmukhas tato vākyam uvāca madhusūdanaḥ |
digvāsā vikaṭā dhūmrā karāḷā nirṇatodarī |
bāhū prasārya sahasā grasantīvāmbaraṃ mahat |
apagacchāpagaccha tvaṃ dhigdhig ity eva so 'bravīt //

tatas tūryapraṇādaiś ca bherīṇāṃ ca mahāsvanaiḥ
siṃhanādaiś ca daityānāṃ bāṇaḥ kṛṣṇam abhidravat //

āyāntam atha taṃ dṛṣṭvā yadūnām ṛṣabhaṃ raṇe
gatvātha kiṃ cid dṛṣṭvaiva svabalaṃ keśavaṃ tadā |
vainateyasamārūḍhaṃ kṛṣṇam apratimaujasam //

tiṣṭha tiṣṭha na me 'dya tvaṃ jīvan pratigamiṣyasi
dvārakāṃ dvārakāsthān vā suhṛdo drakṣyase na ca //

suvarṇavarṇān vṛkṣāgrān adya drakṣyasi mādhava
tvam adyāṣṭabhujaḥ saṃkhye kathaṃ bāhusahasriṇā |
mayābhibhūtaḥ samare muhūrṣuḥ kālacoditaḥ //

adya bāhusahasreṇa katham aṣṭabhujo raṇe
mayā saha samāgamya yotsyase garuḍadhvaja //

adya hi tvaṃ mayā yuddhe nirjitaḥ saha bāndhavaiḥ
dvārakāṃ śoṇitapure nihataḥ saṃsmariṣyasi //

nānāpraharaṇopetaṃ nānāṅgadavibhūṣitam
adya bāhusahasraṃ me koṭibhūtaṃ niśāmaya //

garjatas tasya vākyaughāḥ samudrād iva sindhavaḥ
parākramarasopetā mattebhād iva śīkarāḥ |
niścaranti mahāghorā vātoddhūtā ivormayaḥ //

roṣaparyākule caiva netre tasya babhūvatuḥ
jagad didhakṣann iva khe mahāsūrya ivoditau //

bāṇa kiṃ garjase śūrā na garjanti raṇe sthitāḥ
ehy ehi yudhyasva raṇe kiṃ mithyāgarjitena te //

yadi yuddhāni vacanaiḥ sidhyanti ditinandana
bhavān eva jayen nityaṃ bahvabaddhaṃ prabhāṣase //

ehy ehi jaya māṃ bāṇa jito vā vasudhātale
cirāyāvāṅmukho dīnaḥ patitaḥ śeṣyase 'sura //

ity evam uktvā vacanaṃ marmabhedibhir āśugaiḥ
nirbibheda raṇe kṛṣṇas tv amoghair dīptatejasaiḥ //

smayan bāṇas tataḥ kṛṣṇaṃ śaravarṣair avākirat
jvaladbhir iva saṃsaktais tasmin yuddhe sudāruṇe //

tau tataḥ śaranistriṃśair gadāparighatomaraiḥ
tataḥ parighanistriṃśair gadātomaraśaktibhiḥ |
vinindamānau saṃyattau yuddhe ceratur ojasā //

musalaiḥ paṭṭisaiś cāpi chādayām āsa keśavam //

aṣṭabāhuḥ sahasreṇa bāhūnāṃ samayudhyata
yodhayām āsa samare dvibāhum atha līlayā |
tatas tu samare hantuṃ hiraṇyakaśipor yathā |
sahasrabāhunā sārdham aṣṭabāhur ayudhyata |
bāṇena saha saṃgamya śaṅkhacakragadādharaḥ //

yad astraṃ paramaṃ divyaṃ tapasā nirmitaṃ mahat
tad apratihitaṃ yuddhe sarvaśatrunibarhaṇam
brahmaṇā vihitaṃ pūrvaṃ tan mumoca baleḥ sutaḥ //

tasmin mukte diśaḥ sarvās tamopahatamaṇḍalāḥ
prādur āsaṃs tato raudrā na prājñāyata kiṃ cana //

sādhu sādhv iti bāṇaṃ tu pūjayanti sma dānavāḥ
aho dhig iti devānāṃ carate vāg udīritā //

tato 'strabalavegena sārciṣmatyaḥ sudāruṇāḥ
ghorarūpā mahāvegā niṣpetur bāṇavṛṣṭayaḥ //

nākampata tadā vāyur na meghāḥ saṃcaranti ca
astre vimukte bāṇena dahyamāne ca keśave //

tato 'straṃ sumahāvegaṃ jagrāha madhusūdanaḥ
pārjanyaṃ nāma bhagavān yamāntakanibhaṃ raṇe //

dānavāstraṃ praśāntaṃ tu parjanyāstre 'bhimantrite
tato devagaṇāḥ sarve praṇedur jahṛṣus tadā //

hate śastre mahārāja daiteyaḥ krodhamūrchitaḥ
bhūyaḥ saṃchādayām āsa keśavaṃ garuḍe sthitam
musalaiḥ paṭṭisaiś caiva śūlam udgarakasmaraiḥ //

tasya tāṃ tarasā sarvāṃ bāṇavṛṣṭiṃ samudyatām
punaḥ saṃvārayām āsa keśavaḥ śatrusūdanaḥ //

yuddhaṃ cābhūd vāhanayor ubhayor devadaityayoḥ
garuḍasya ca saṃgrāme mayūrasya ca yudhyataḥ //

pakṣatuṇḍaprahārais tau caraṇāgranakhais tathā
anyonyaṃ jaghnatuḥ krodhān mayūrgaruḍāv ubhau //

vainateyas tataḥ kruddho mayūraṃ dīptatejasam
jagrāha śirasi kruddhas tuṇḍenābhyahanat tadā //

dakṣiṇena ca pakṣeṇa nijaghāna mahābalaḥ
padbhyāṃ pārśvābhighātāṃś ca dattvā ghorān anekaśaḥ //

ākṛṣya cainaṃ tarasā vikṛṣya ca mahābalaḥ
niḥsaṃjñaṃ pātayām āsa gaganād iva parvatam //

mayūre pātite tasmin garuḍenātha pakṣiṇā
papāta tasmāt sahasā vegena mahatā balī |
bāṇaḥ paramasaṃvignaś cintayan kāryam ātmanaḥ //

taṃ dīnamanasaṃ jñātvā raṇe bāṇaṃ suviklavam
cintayad bhagavān rudro bāṇarakṣaṇam āturaḥ //

tato nandiṃ mahādevaḥ prāha gambhīrayā girā
nandikeśvara saṃyāhi yato bāṇas tato ratham //

pramāthagaṇapārśve hi na hi me sthāsyate manaḥ
yāhi prabhavase tāta bāṇaṃ saṃrakṣa gamyatām //

tathety uktvā punar nandī rathena rathināṃ varaḥ
yato bāṇas tato gatvā bāṇam āha śanair idam //

daityemaṃ ratham ātiṣṭha śīghram ehi mahābala
mayā sārathinā vīra ehi yudhyasva māciram |
sa nandinā tathoktaḥ san bāṇaḥ parabalārdanaḥ |
tato yudhyasva kṛṣṇaṃ vai dānavāntakaraṃ raṇe |
ārūḍhaḥ sa tathety uktvā mahādevasya taṃ ratham //

taṃ syandanam adhiṣṭhāya bhavasyāmitatejasaḥ
prāduś cakre tadā raudram astram astravidāṃ varaḥ
dīptaṃ brahmaśiro nāma bāṇaḥ kruddho 'tivīryavān //

pradīpte brahmaśirasi lokaḥ kṣobham upāgamat
lokasaṃrakṣaṇārthaṃ hi tat sṛṣṭaṃ padmayoninā //

tac cakreṇa nihatyāstraṃ prāha kṛṣṇaḥ pratāpavān
loke prakhyātayaśasaṃ bāṇam apratimaṃ raṇe //

katthitāni kva te bāṇa tāni kiṃ na vikatthase
ayam asmi sthito yuddhe yudhyasva puruṣo bhava //

kārtavīryārjuno nāma pūrvam āsīn mahābalaḥ
sahasrabāhū rāmeṇa dvibāhuḥ samare kṛtaḥ //

tathā tavāpi darpo 'yaṃ bāhūnāṃ vīryasaṃbhavaḥ
cakraṃ te darpaśamanaṃ karoti raṇamūrdhani //

darpasaṃjananān yāvan nāśayiṣyāmi te bhujān
yāvat te darpaśamanaṃ karomy adya svabāhunā |
tiṣṭhedānīṃ na me 'dya tvaṃ mokṣyase raṇamūrdhani //

tataś cakraṃ sahasrāraṃ nadan megha ivoṣṇage
jagrāha puruṣavyāghro bāṇabāhupraśāntaye //

jyotiṣmataḥ pataṃgasya śaśinaś caiva yat tathā
tejo yaj jyotiṣāṃ caiva tejo vajrāśanes tathā |
prājāpatyaṃ ca yat tejas tac cakre paryavasthitam //

tejasā tena saṃyuktaṃ bhāsvatā prajvalabhṛśam
vapuṣā teja ādatte bāṇasya pramukhe sthitam //

cakrodyatakaraṃ dṛṣṭvā bhagavantaṃ raṇājire
pramukhe vāsudevasya digvāsāḥ koṭavī sthitā //

antarghānam upāgamya tyaktvā sā vāsasī punaḥ
paritrāṇāya bāṇasya vijayādhiṣṭhitā tataḥ
bhūyaḥ sāmarṣatāmrākṣī vivastrāvasthitā raṇe //

bāṇasaṃrakṣaṇaparā vākyam etad uvāca ha
hanmi bāṇaṃ na saṃśayaḥ |
evam uktā tu bāṇena |
bāṇasaṃrakṣaṇārthinī |
girā madhurayā devī |
jāne tvāṃ sarvabhūtānāṃ sraṣṭāraṃ puruṣottamam |
mahābhāgaṃ mahādevam anantaṃ nīlam avyayam |
padmanābhaṃ hṛṣīkeśa lokānām ādisaṃbhavam |
devadeva jagannātha viṣṇo jiṣṇo jagatpate |
nārhase deva hantuṃ vai bāṇam apratimaṃ raṇe //

tataḥ kruddho mahābāhuḥ kṛṣṇaḥ praharatāṃ varaḥ
provāca bāṇaṃ samare bhrāmayaṃś cakram uttamam //

yudhyatāṃ yudhyatāṃ saṃkhye bhavatāṃ koṭavī sthitā
aśaktānām iva raṇe dhigbāṇa tava pauruṣam //

evam uktvā tataḥ kṛṣṇas tac cakraṃ paramāstravit
nimīlitākṣo vyasṛjad bāṇaṃ prati mahābalaḥ //

alātacakravat tūrṇaṃ bhramamāṇaṃ raṇājire
kṣiptaṃ tu vāsudevena bāṇasya raṇamūrdhani |
bāṇasya rathamārge ca dvitīya iva bhāskaraḥ |
viṣṇor astraṃ sunābhaṃ vai śaighryayogān na dṛśyate //

tasya bāhusahasrasya paryāyeṇa punaḥ punaḥ
bāṇasya chedanaṃ cakre tac cakraṃ raṇamūrdhani //

śarīreṇa prasravatā rudhiraughapariplutaḥ
abhavat parvatākāraś chinnabāhur mahāsuraḥ //

cakraṃ bhūyaḥ kṣeptukāmaṃ bāṇanāśārtham acyutam
cakraṃ bhūyaḥ kṣeptukāmo nāṇanāśārtham acyutaḥ |
tam upetya mahādevaḥ kumārasahito 'bravīt //

kṛṣṇa kṛṣṇa mahādeva jāne tvāṃ puruṣottamam
na hy enaṃ vadhakāmas tvaṃ yad icchet pārvatīhitam ||
hiraṇyakaśipoḥ putrāś catvāro lokaviśrutāḥ |
hrādaḥ prahrādaḥ saṃhrādaḥ anuhrādaś caturthakaḥ ||
prahrādāya varo dattaś caiṣāṃ madhye varāthine |
avyadhyas tava vaṃśo 'stu daityaughāḥ satataṃ mayā ||
iti pratiśrutaṃ pūrvam aparāghaparāya ca |
madhukaiṭabhahantāraṃ devadevaṃ sanātanam //

lokānāṃ tvaṃ gatir deva tvatprasūtam idaṃ jagat
ajeyas tvaṃ tribhir lokaiḥ sadevāsuramānuṣaiḥ //

tasmāt saṃhara divyaṃ tvam idaṃ cakraṃ samudyatam
anivāryam asaṃhāryaṃ raṇe śatrubhayaṃkaram //

bāṇasyāsyābhayaṃ dattaṃ mayā keśiniṣūdana
tan me na syān mṛṣā vākyam atas tvāṃ kṣamayāmy aham //

jīvatāṃ deva bāṇo 'yam etac cakraṃ nivartitam
mānyas tvaṃ deva devānām asurāṇāṃ ca sarvaśaḥ //

namas te 'stu gamiṣyāmi yat kāryaṃ tan maheśvara
na tāvat kriyate tasmān mām anujñātum arhasi //

evam uktvā mahādevaṃ kṛṣṇas tūrṇaṃ garutmatā
jagāma tatra yatrāste prādyumniḥ sāyakaiś citaḥ //

gate kṛṣṇe tato nandī bāṇam āha śubhaṃ vacaḥ
gaccha bāṇa kṣatenaiva devadevasya cāgrataḥ ||
tac chrutvā nandivākyaṃ tu bāṇo 'gacchata śīghragaḥ |
chinnabāhuṃ tato bāṇaṃ dṛṣṭvā nandī pratāpavān |
apavāhya rathenaiva yato devas tato yayau ||
tato nandī punar bāṇaṃ prāg uvācottaraṃ vacaḥ |
bāṇa bāṇa pranṛtyasva śreyas tava bhaviṣyati //

śoṇitaughaplutair gātrair nandivākyapracoditaḥ
jīvitārthī tato bāṇaḥ pramukhe śaṃkarasya vai //

prānṛtyata bhaye jāte dānavaḥ sa vicetanaḥ
jaya deva jagannātha jayājeya harāvyaya |
jaya bhaktipriya sadā jaya bhūtagaṇārcitaḥ ||
jaya bhasmapradigdhāṅga jaya nagnavidāṃ mukha |
umāpate viśvapate jayājeyāvyaya prabho ||
evamādi tadā bāṇo vilapan bhavatuṣṭaye |
avasthāṃ kṛpaṇāṃ prāpto bhayaviklavalocanaḥ //

varaṃ vṛṇīṣva bāṇa tvaṃ yat te manasi vartate
prasādasumukho 'haṃ te varakālo 'yam āgataḥ //

ajaraś cāmaraś caiva bhaveyaṃ satataṃ vibho
eṣa me prathamo deva varo 'stu yadi manyase //

tulyo 'si daivatair bāṇa na mṛtyus tava vidyate
anyaṃ varaṃ vṛṇīṣvādya anugrāhyo 'si me sadā //

yathāhaṃ śoṇitādigdho bhṛśārto vraṇapīḍitaḥ
bhaktānāṃ nṛtyatām evaṃ putrajanma bheved bhava //

nirāhārāḥ kṣamāyuktāḥ satyārjavaparāyaṇāḥ
madbhaktā ye hi nṛtyanti teṣām evaṃ bhaviṣyati //

cakrapāṭanajā ghorā rujā tīvrā hi yā mama
vareṇa sā tṛtīyena śāntiṃ gacchatu me bhava //

evaṃ bhavatu bhadraṃ te na rujā prabhaviṣyati
akṣataṃ tava gātraṃ ca svasthāvasthaṃ bhaviṣyati //

caturthaṃ te varaṃ dadmi vṛṇīṣvāsura kāṅkṣitaṃ
na te 'haṃ vimukhas tāta prasādasumukho hy aham //

pramāthagaṇavaṃśasya prathamaḥ syām ahaṃ vibho
mahākāla iti khyātaḥ khyātiṃ gaccheyam īśvara //

bhūyo 'pi te varaṃ dadmi prakhyātabalapauruṣa
evaṃ bhaviṣyaty avaśyaṃ yaṃ varaṃ tvam ihecchasi |
taṃ taṃ vṛṇīṣva bhadraṃ te yad icchasi mahāsura //

vairūpyam aṅgajaṃ kiṃ cin mā bhūn me devasattama
dvibāhutve 'pi me deho na virūpo bhaved bhava //

tato 'bravīn mahādevo bāṇaṃ sthitam athāntike
evaṃ bhaviṣyate bāṇa yat tvayā samudāhṛtam //

etāvad uktvā bhagavāṃs trinetro gaṇasaṃvṛtaḥ
paśyatāṃ sarvabhūtānāṃ tatraivāntar adhīyata //