Harivamsa · Chapter 111

mṛta ity abhivijñāya jvaraṃ śatruniṣūdanaḥ
kṛṣṇo bhujabalābhyāṃ taṃ cikṣepātha mahītale //

muktamātras tu bāhubhyāṃ kṛṣṇadehaṃ viveśa saḥ
amuktvā vigrahaṃ tasya kṛṣṇasyāpratimaujasaḥ //

sa hy āviṣṭas tadā tena jvareṇāpratimaujasā
kṛṣṇaḥ skhalann iva muhuḥ kṣitau samabhivartata //

jṛmbhate ca tadā kṛṣṇaḥ punaś ca skhalate bhṛśam
romāñ cotthitagātras tu nidrayā cābhibhūyate //

jvarābhimṛṣṭam ātmānaṃ vijñāya puruṣottamaḥ
so 'sṛjaj jvaram anyaṃ tu pūrvajvaravināśanam //

vyāvidhyamāne tu tadā jvare tenāmitaujasā
aśarīrā tato vāṇī tam uvācāntarikṣagā //

kṛṣṇa kṛṣṇa mahābāho yadūnāṃ nandivardhana
mā vadhīr jvaram etaṃ vai rakṣaṇīyas tvayānagha
ity evam ukte vacane taṃ mumoca hariḥ svayam //

tam uvāca jvaro bhūyas tv aham eko jvaro bhuvi
aham eko jvaras tāta nānyo loke jvaro bhavet |
tava prasādān nānyaḥ syāj jvaraḥ samitiśobhana //

eka eva jvaro loke bhavān astu yathāsukham
tatas tuṣṭo hṛṣīkeśaḥ stotreṇānena keśavaḥ |
prītimāṃś cābhavat kṛṣṇo raudrajvaram uvāca ha |
antakāle manuṣyāṇāṃ bhūyād bhogāya māmakaḥ |
yo 'yaṃ mayā jvaro sṛṣṭo mayy evaiṣa pralīyatām //

dhanyo 'smy anugṛhīto 'smi yat tvayā matpriyaṃ krṭaṃ
ājñāpaya priaṃ kiṃ te cakrāyudha karomy aham //

mahāmṛdhe tava mama ca dvayor imaṃ parākramaṃ bhujabalakevalāstrayoḥ
praṇamya mām ekamanāḥ paṭhet tu yaḥ sa vai bhavej jvara vigatajvaro naraḥ //

evam uktas tu kṛṣṇena jvaraḥ sākṣān mahātmanā
provāca yaduśārdūlam evam etad bhaviṣyati ||
varaṃ labdhvā jvaro hṛṣṭaḥ kṛṣṇāc ca samayaṃ punaḥ |
evam astv iti govindaṃ babhāṣe keśavaṃ tadā |
praṇamya śirasā kṛṣṇam apakrāntas tato raṇāt //