હરિવંશ · અધ્યાય 111

મૃત ઇત્ય્ અભિવિજ્ઞાય જ્વરં શત્રુનિષૂદનઃ
કૃષ્ણો ભુજબલાભ્યાં તં ચિક્ષેપાથ મહીતલે ॥

મુક્તમાત્રસ્ તુ બાહુભ્યાં કૃષ્ણદેહં વિવેશ સઃ
અમુક્ત્વા વિગ્રહં તસ્ય કૃષ્ણસ્યાપ્રતિમૌજસઃ ॥

સ હ્ય્ આવિષ્ટસ્ તદા તેન જ્વરેણાપ્રતિમૌજસા
કૃષ્ણઃ સ્ખલન્ન્ ઇવ મુહુઃ ક્ષિતૌ સમભિવર્તત ॥

જૃમ્ભતે ચ તદા કૃષ્ણઃ પુનશ્ ચ સ્ખલતે ભૃશમ્
રોમાઞ્ ચોત્થિતગાત્રસ્ તુ નિદ્રયા ચાભિભૂયતે ॥

જ્વરાભિમૃષ્ટમ્ આત્માનં વિજ્ઞાય પુરુષોત્તમઃ
સો ઽસૃજજ્ જ્વરમ્ અન્યં તુ પૂર્વજ્વરવિનાશનમ્ ॥

વ્યાવિધ્યમાને તુ તદા જ્વરે તેનામિતૌજસા
અશરીરા તતો વાણી તમ્ ઉવાચાન્તરિક્ષગા ॥

કૃષ્ણ કૃષ્ણ મહાબાહો યદૂનાં નન્દિવર્ધન
મા વધીર્ જ્વરમ્ એતં વૈ રક્ષણીયસ્ ત્વયાનઘ
ઇત્ય્ એવમ્ ઉક્તે વચને તં મુમોચ હરિઃ સ્વયમ્ ॥

તમ્ ઉવાચ જ્વરો ભૂયસ્ ત્વ્ અહમ્ એકો જ્વરો ભુવિ
અહમ્ એકો જ્વરસ્ તાત નાન્યો લોકે જ્વરો ભવેત્ ।
તવ પ્રસાદાન્ નાન્યઃ સ્યાજ્ જ્વરઃ સમિતિશોભન ॥

એક એવ જ્વરો લોકે ભવાન્ અસ્તુ યથાસુખમ્
તતસ્ તુષ્ટો હૃષીકેશઃ સ્તોત્રેણાનેન કેશવઃ ।
પ્રીતિમાંશ્ ચાભવત્ કૃષ્ણો રૌદ્રજ્વરમ્ ઉવાચ હ ।
અન્તકાલે મનુષ્યાણાં ભૂયાદ્ ભોગાય મામકઃ ।
યો ઽયં મયા જ્વરો સૃષ્ટો મય્ય્ એવૈષ પ્રલીયતામ્ ॥

ધન્યો ઽસ્મ્ય્ અનુગૃહીતો ઽસ્મિ યત્ ત્વયા મત્પ્રિયં ક્ર્ટં
આજ્ઞાપય પ્રિઅં કિં તે ચક્રાયુધ કરોમ્ય્ અહમ્ ॥

મહામૃધે તવ મમ ચ દ્વયોર્ ઇમં પરાક્રમં ભુજબલકેવલાસ્ત્રયોઃ
પ્રણમ્ય મામ્ એકમનાઃ પઠેત્ તુ યઃ સ વૈ ભવેજ્ જ્વર વિગતજ્વરો નરઃ ॥

એવમ્ ઉક્તસ્ તુ કૃષ્ણેન જ્વરઃ સાક્ષાન્ મહાત્મના
પ્રોવાચ યદુશાર્દૂલમ્ એવમ્ એતદ્ ભવિષ્યતિ ॥
વરં લબ્ધ્વા જ્વરો હૃષ્ટઃ કૃષ્ણાચ્ ચ સમયં પુનઃ ।
એવમ્ અસ્ત્વ્ ઇતિ ગોવિન્દં બભાષે કેશવં તદા ।
પ્રણમ્ય શિરસા કૃષ્ણમ્ અપક્રાન્તસ્ તતો રણાત્ ॥