Haribhaktirasāmṛtasindhu · Chapter 4.7

iti śrī-śrī-bhakti-rasāmṛta-sindhāv uttara-vibhāge
gauṇa-bhakti-rasa-nirūpaṇe bhayānaka-bhakti-rasa-laharī ṣaṣṭhī ||
[4.7]
bībhatsa-bhakti-rasākhyā
saptama-laharī
puṣṭiṃ nija-vibhāvādyair jugupsā-ratir āgatā |
asau bhakti-raso dhīrair bībhatsākhya itīryate

asminn āśrita-śāntādyā dhīrair ālambanā matāḥ

yathā--
pāṇḍityaṃ rata-hiṇḍakādhvani gato yaḥ kāma-dīkṣā-vratī
kurvan pūrvam aśeṣa-ṣiḍga-nagarī sāmrājya-caryām abhūt |
citraṃ so 'yam udīrayan hari-guṇān udbāṣpa-dṛṣṭir jano
dṛṣṭe strī-vadane vikūṇita-mukho viṣṭabhya niṣṭhīvati

atra niṣṭhīvanaṃ vaktra-kūṇanaṃ ghrāṇa-saṃvṛtiḥ |
dhāvanaṃ kampa-pulaka-prasvedādyāś ca vikriyāḥ

iha glāni-śramonmāda-moha-nirveda-dīnatāḥ |
viṣāda-cāpalāvega-jāḍyādyo vyabhicāriṇaḥ

jugupsā-ratir atra syāt sthāyī sā ca vivekajā |
prāyikī ceti kathitā jugupsā dvi-vidhā budhaiḥ

tatra vivekajā--
jāta-kṛṣṇa-rater bhakta-viśeṣasya tu kasyacit |
vivekotthā tu dehādau jugupsā syād vivekajā

yathā--
ghana-rudhira-maye tvacā pinaddhe
piśita-vimiśrita-visra-gandha-bhāji |
katham iha ramatāṃ budhaḥ śarīre
bhagavati hanta rater lave 'py udīrṇe

atha prāyikī--
amedhya-pūty-anubhavāt sarveṣām eva sarvataḥ |
yā prāyo jāyate seyaṃ jugupsā prāyikī matā

yathā--
asṛṅ-mūtrākīrṇe ghana-śamala-paṅka-vyatikare
vasann eṣa klinno jaḍa-tanur ahaṃ mātur udare |
labhe cetaḥ-kṣobhaṃ tava bhajana-karmākṣamatayā
tad asmin kaṃsāre kuru mayi kṛpā-sāgara kṛpām

yathā vā--
ghrāṇodghūrṇaka-pūta-gandhi-vikaṭe kīṭākule dehalī-
srasta-vyādhita-yūtha-gūtha-ghaṭanā-nirdhūta-netrāyuṣi |
kārā-nāmani hanta māgadha-yamenāmī vayaṃ nārake
kṣiptās te smṛtim ākalayya naraka-dhvaṃsinn iha prāṇimaḥ

labdha-kṛṣṇa-rater eva suṣṭhu pūtaṃ manaḥ sadā |
kṣubhyaty ahṛdy aleśe 'pi tato 'syāṃ raty-anugrahaḥ

hāsyādīnāṃ rasatvaṃ yad gauṇatvenāpi kīrtitam |
prācāṃ matānusāreṇa tad vijñeyaṃ manīṣibhiḥ

amī pañcaiva śāntādyā harer bhakti-rasā matāḥ |
eṣu hāsyādayaḥ prāyo bibhrati vyabhicāritām