Haribhaktirasāmṛtasindhu · Chapter 4.6

iti śrī-śrī-bhakti-rasāmṛta-sindhāv uttara-vibhāge
gauṇa-bhakti-rasa-nirūpaṇe raudra-bhakti-rasa-laharī pañcamī ||
[4.6]
bhayānaka-bhakti-rasākhyā
ṣaṣṭha-laharī
vakṣyamāṇair vibhāvādyaiḥ puṣṭiṃ bhaya-ratir gatā |
bhayānakābhidho bhakti-raso dhīrair udīryate

kṛṣṇaś ca dāruṇāś ceti tasminn ālambanā dvidhā |
anukampyeṣu sāgassu kṛṣṇas tasya ca bandhuṣu

dāruṇāḥ snehataḥ śaśvat-tad-aniṣṭhāpti-darśiṣu |
darśanāc chravaṇāc ceti smaraṇāc ca prakīrtitāḥ

tatra anukampyeṣu kṛṣṇo, yathā--
kiṃ śuṣyad-vadano 'pi muñca khacitaṃ citte pṛthuṃ vepathuṃ
viśvasya prakṛtiṃ bhajasva na manāg apy asti mantuṃ tava |
uṣma-mrakṣitam ṛkṣa-rāja rabhasād vistīrya vīryaṃ tvayā
pṛthvī pratyuta yuddha-kautuka-mayī sevaiva me nirmitā

yathā vā--
mura-mathana puras te ko bhujaṅgas tapasvī
laghu-haram iti kārṣīr mā sma dīnāya manyum |
gurur ayam aparādhas tathyam ajñānato 'bhūd
aśaraṇam atimūḍhaṃ rakṣa rakṣa prasīda

bandhuṣu dāruṇā darśanād, yathā--
hā kiṃ karomi taralaṃ bhavanāntarāle
gopendra gopaya balād uparudhya bālam |
kṣmā-maṇḍalena saha cañcalayan mano me
śṛṅgāṇi laṅghayati paśya turaṅga-daityaḥ

śravaṇād, yathā--
śṛṇvantī turaga-dānavaṃ ruṣā
gokulaṃ kila viśantam uddhuram |
drāg abhūt tanaya-rakṣaṇākulā
śuṣyad-āsya-jalajā vrajeśvarī

smaraṇād, yathā--
virama virama mātaḥ pūtanāyāḥ prasaṅgāt
tanum iyam adhunāpi smaryamāṇā dhunoti |
kavalayitum ivāndhīkṛtya bālaṃ ghurantī
vapur atipuruṣaṃ yā ghoram āviścakāra

vibhāvasya bhrū-kuṭy-ādyās tasminn uddīpanā matāḥ |
mukha-śoṣaṇam ucchvāsaḥ parāvṛtya vilokanam

sva-saṅgopanam udghūrṇā śaraṇānveṣaṇaṃ tathā |
krośanādyāḥ kriyāś cātra sāttvikāś cāśru-varjitāḥ

iha santrāsa-maraṇa-cāpalāvega-dīnatāḥ |
viṣāda-mohāpasmāra-śaṅkādyā vyabhicāriṇaḥ

asmin bhagna-ratiḥ sthāyī bhāvaḥ syād aparādhataḥ |
bhīṣaṇebhyaś ca tatra syād bahudhaivāparādhitā

taj-jā bhīr nāparatra syād anugrāhya-janān vinā |
ākṛtyā ye prakṛtyā ye ye prabhāveṇa bhīṣaṇāḥ

etad-ālambanā bhītiḥ kevala-prema-śāliṣu |
nārī-bālādiṣu tathā prāyeṇātropajāyate

ākṛtyā pūtanādyāḥ syuḥ prakṛtyā duṣṭa-bhū-bhujaḥ |
bhīṣaṇās tu prabhāveṇa surendra-giriśādayaḥ

sadā bhagavato bhītiṃ gatā ātyantikīm api |
kaṃsādyā rati-śūnyatvād atra nālambanā matāḥ