Haribhaktirasāmṛtasindhu · Chapter 4.2

iti śrī-śrī-bhakti-rasāmṛta-sindhāv uttara-vibhāge
hāsya-bhakti-rasa-nirūpaṇe adbhuta-bhakti-rasa-laharī prathamā ||
(4.2)
adbhuta-bhakti-rasākhyā
dvitīya-laharī
ātmocitair vibhāvādyaiḥ svādyatvaṃ bhakta-cetasi |
sā vismaya-ratir nītād- bhuto-bhakti-raso bhavet

bhaktaḥ sarva-vidho 'py atra ghaṭate vismayāśrayaḥ |
lokottara-kriyā-hetur viṣayas tatra keśavaḥ

tasya ceṣṭā-viśeṣādyās tasminn uddīpanā matāḥ |
kriyās tu netra-vistāra-stambhāśru-pulakādayaḥ

āvega-harṣa-jāḍyādyās tatra syur vyabhicāriṇaḥ |
sthāyī syād vismaya-ratiḥ sā lokottara-karmataḥ |
sākṣād anumitaṃ ceti tac ca dvividham ucyate

tatra sākṣāt, yathā--
sākṣād aindriyakaṃ dṛṣṭa-śruta-saṅkīrtitādikam

tatra dṛṣṭaṃ, yathā--
ekam eva vividhodyama-bhājaṃ
mandireṣu yugapan nikhileṣu |
dvārakām abhi samīksya mukundaṃ
spandanojjhita-tanur munir āsīt

yathoktaṃ śrī-daśame (10.69.2)--
citraṃ bataitad ekena vapuṣā yugapat pṛthak |
gṛheṣu dvy-aṣṭa-sāhasraṃ striya eka udāvahat

yathā vā--
kva stanya-gandhi-vadanendur asau śiśus te
govardhanaḥ śikhara-ruddha-ghanaḥ kva cāyam |
bhoḥ paśya savya-kara-kandūkitācalendraḥ
khelann iva sphurati hanta kim indra-jālam

śrutaṃ, yathā--
yāny akṣipan praharaṇāni bhaṭāḥ sa devaḥ
pratyekam acchinadamuni śara-trayeṇa |
ity ākalayya yudhi kaṃsaripoḥ prabhāvaṃ
sphārekṣaṇaḥ kṣitipatiḥ pulakī tadāsīt

saṅkīrtitaṃ, yathā--
ḍimbāḥ svarṇa-nibhāmbarā ghana-ruco jātāś caturbāhavo
vatsāś ceti vadan kṛto 'smi vivaśaḥ stambha-śriyā paśyata |
āścaryaṃ kathayāmi vaḥ śṛṇuta bhoḥ pratyekam ekaikaśaḥ
stūyante jagad-aṇḍavadbhir abhitas te hanta padmāsanaiḥ

anumitaṃ, yathā--
unmīlya vraja-śiśavo dṛśaṃ purastād
bhāṇḍīraṃ punar atulya vilokayantaḥ |
sātmānaṃ paśu-paṭalīṃ ca tatra dāvād
unmuktāṃ manasi camatkriyām avāpuḥ

apriyādeḥ kriyā kuryān nālaukiky api vismayam |
asādhāraṇy api manāk karoty eva priyasya sā

priyāt priyasya kim uta sarva-lokottarottarā |
ity atra vismaye proktā raty-anugraha-mādhurī