Haribhaktirasāmṛtasindhu · Chapter 3.1

iti śrī-śrī-bhakti-rasāmṛta-sindhau dakṣiṇa-vibhāge
bhakti-rasa-sāmānya-nirūpaṇe sthāyi-bhāva-laharī pañcamī |
iti śrī-śrī-bhakti-rasāmṛta-sindhau
sāmānya-bhagavad-bhakti-rasa-nirūpako nāma
dakṣiṇa-vibhāgaḥ samāptaḥ ||
(3)
mukhya-bhakti-rasa-nirūpakaḥ
paścima-vibhāgaḥ
(3.1)
śānti-bhakti-rasākhyā
prathama-laharī
dhṛta-mugdha-rūpa-bhāro bhāgavatārpita-pṛthu-premā |
sa mayi sanātana-mūrtis tanotu puruṣottamas tuṣṭim

rasāmṛtābdher bhāge 'tra tṛtīye paścimābhidhe |
mukhyo bhakti-rasaḥ pañcavidhaḥ śāntādīr īryate

ato 'tra pāñcavidhyena laharyaḥ pañca kīrtitāḥ |
athāmī pañca lakṣyante rasāḥ śāntādayaḥ kramāt

tatra śānta-bhakti-rasaḥ--
vakṣyamāṇair vibhāvādyaiḥ śamināṃ svādyatāṃ gataḥ
sthāyī śānti-ratir dhīraiḥ śānta-bhakti-rasaḥ smṛtaḥ

prāyaḥ sva-sukha-jātīyaṃ sukhaṃ syād atra yoginām |
kintv ātma-saukhyam aghanaṃ ghanaṃ tv īśam ayaṃ sukham

tatrāpīśa-svarūpānubhavasyaivoru-hetutā |
dāsādi-van-mano-jñatva-līlāder na tathā matā

tatra ālambanāḥ--
caturbhujaś ca śāntāś ca asminn ālambanā matāḥ

tatra caturbhujaḥ--
śyāmākṛtiḥ sphurati cāru-caturbhujo 'yam
ānanda-rāśir akhilātma-sindhu-taraṅgaḥ |
yasmin gate nayanayoḥ pathi nirjihīte
pratyak-padāt paramahaṃsa-muner mano 'pi

saccidānanda-sāndrāṅga ātmārāma-śiromaṇiḥ |
paramātmā paraṃ brahma śamo dāntaḥ śucir vaśī

sadā svarūpa-samprāpto hatāri-gati-dāyakaḥ |
vibhur ity ādi guṇavān asminn ālambano hariḥ

atha śāntāḥ--
śāntāḥ syuḥ kṛṣṇa-tat-preṣṆha-kāruṇyena ratiṃ gatāḥ |
ātmārāmās tadīyādhva-baddha-śraddhāś ca tāpasāḥ

atha ātmārāmāḥ--
ātmārāmās tu sanaka-sananda-mukhā matāḥ |
prādhānyāt sanakādīnāṃ rūpaṃ bhaktiś ca kathyate

tatra rūpam--
te pañcaṣābda-bālābhāś catvāras tejasojjvalāḥ |
gaurāṅgā vāta-vasanāḥ prāyeṇa sahacāriṇaḥ

tatra ca bhaktiḥ--
samasta-guṇa-varjite karaṇataḥ pratīcīnatāṃ
gate kim api vastuni svayam adīpi tāvat sukham |
na yāvad iyam adbhutā nava-tamāla-nīla-dyuter
mukunda sukha-cid-ghanā tava babhūva sākṣāt-kṛtiḥ

atha tāpasāḥ--
bhaktir muktyaiva nirvighnety ātta-yukta-viraktatāḥ |
anujjhita-mumukṣā ye bhajante te tu tāpasāḥ

yathā--
kadā śaila-droṇyāṃ pṛthula-viṭapi-kroḍa-vasatir
vasānaḥ kaupīnaṃ racita-phala-kandāśana-ruciḥ |
hṛdi dhyāyaṃ dhyāyaṃ muhur iha mukundābhidham ahaṃ
cidānandaṃ jyotiḥ kṣaṇam iva vineṣyāmi rajanīḥ

bhaktātmārāma-karuṇā prapañcenaiva tāpasāḥ |
śāntākhya-bhāva-candrasya hṛd-ākāśe kalāṃ śritāḥ

atha uddīpanāḥ--
śrutir mahopaniṣadāṃ vivikta-sthāna-sevanam |
antar-vṛtti-viśeṣo 'sya sphūrtis tattva-vivecanam

vidyāśakti-pradhānatvaṃ viśva-rūpa-pradarśanam |
jñāni-bhaktena saṃsargo brahma-satrādayas tathā |
eṣv asādhāraṇāḥ proktā budhair uddīpanā amī

atra mahopaniṣac-chrutiḥ, yathā--
akleśāḥ kamala-bhuvaḥ praviśya goṣṭhīṃ
kurvantaḥ śruti-śirasāṃ śrutiṃ śruta-jñāḥ |
uttuṅgaṃ yad-uparasaṅgamāya raṅgaṃ
yogīndrāḥ pulaka-bhṛto navāpy avāpuḥ

pādābja-tulasī-gandhaḥ śaṅkha-nādo mura-dviṣaḥ |
puṇya-śailaḥ śubhāraṇyaṃ siddha-kṣetraṃ svarāpagā

viṣayādi-kṣayiṣṇutvaṃ kālasyākhila-hāritā |
ityādy uddīpanā sādhāraṇās teṣāṃ kilāśritaiḥ

atha pādābja-tulasī-gandho, yathā tṛtīye (3.15.43)--
tasyāravinda-nayanasya padāravinda-
kiñjalka-miśra-tulasī-makaranda-vāyuḥ |
antar-gataḥ sva-vivareṇa cakāra teṣāṃ
saṅkṣobham akṣara-juṣām api citta-tanvoḥ

atha anubhāvāḥ--
nāsāgra-nyasta-netratvam avadhūta-viceṣṭitam |
yuga-mātrekṣita-gatir jñāna-mudrā-pradarśanam

harer dviṣy api na dveṣo nātibhaktiḥ priyeṣv api |
siddhatāyās tathā jīvan-mukteś ca bahu-mānitā

nairapekṣyaṃ nirmamatā nirahaṅkāritā kathā |
maunam ity ādayaḥ śītāḥ syur asādhāraṇāḥ kriyāḥ

tatra nāsāgra-nayanatvaṃ, yathā--
nāsikāgra-dṛg ayaṃ puro muniḥ
spanda-bandhura-śirā virājate |
citta-kandara-taṭīm anākulām
asya nūnam avagāhate hariḥ

jṛmbhāṅga-moṭanaṃ bhakter upadeśo harer natiḥ |
stavādayaś ca dāsādyaiḥ śītāḥ sādhāraṇāḥ kriyāḥ

tatra jṛmbhā, yathā--
hṛdayāmbare dhruvaṃ te
bhāvāmbara-maṇir udeti yogīndra |
yad idaṃ vadanāmbhojaṃ
jṛmbhām avalambate bhavataḥ

atha sāttvikāḥ--
romāñca-sveda-kampādyāḥ sāttvikāḥ pralayaṃ vinā

atha romāñco, yathā--
pāñcajanya-janito dhvanir antaḥ
kṣobhayan sapadi biddha-samādhiḥ |
yogināṃ giri-guhā-nilayānāṃ
pudgale pulaka-pālim anaiṣīt

eṣāṃ nirabhimānānāṃ śarīrādiṣu yoginām |
sāttvikās tu jvalanty eva na tu dīptā bhavanty amī

atha sañcāriṇaḥ--
sañcārino 'tra nirvedo dhṛtir harṣo matiḥ smṛtiḥ |
viṣādotsukatāvega-vitarkādyāḥ prakīrtitāḥ

tatra nirvedo, yathā--
asmin sukha-ghana-mūrtau
paramātmani vṛṣṇi-pattane sphurati
ātmārāmatayā me
vṛthā gato bata ciraṃ kālaḥ

atha sthāyī--
atra śānti-ratiḥ sthāyī samā sāndrā ca sā dvidhā

tatra ādyā, yathā--
samādhau yoginas tasminn asamprajñāta-nāmani |
līlayā mayi labdhe 'sya babhūvotkampinī tanuḥ

sāndrā, yathā--
sarvāvidyā-dhvaṃsato yaḥ samastād
āvirbhūto nirvikalpe samādhau |
jāte sākṣād yādavendre sa vindan
mayy ānandaḥ sāndratāṃ koṭidhāsīt

śānto dvidhaiṣa pārokṣya-sākṣātkāra-vibhedataḥ

atha parokṣyaṃ, yathā--
prayāsyati mahat-tapaḥ saphalatāṃ kim aṣṭāṅgikā
munīśvara purātanī parama-yogacaryāpy asau |
narākṛti-navāmbuda-dyuti-dharaṃ paraṃ brahma me
vilocana-camatkṛtiṃ kathaya kiṃ nu nirmāsyati

yathā vā--
kṣetre kuroḥ kim api caṇḍakaroparāge
sāndraṃ mahaḥ pathi vilocanayor yadāsīt |
tan nīrada-dyuti-jayi smarad utsukaṃ me
na pratyag-ātmani mano ramate pureva

sākṣātkāro, yathā--
paramātmatayātimedurād
bata sākṣāt-karaṇa-pramodataḥ |
bhagavann adhikaṃ prayojanaṃ
katarad brahma-vido 'pi vidyate

yathā vā--
hṛṣṭaḥ kambu-pati-svanair bhuvi luṭhac-cīrāñcalaḥ sañcalan
mūrdhnā ruddha-dṛg-aśrubhiḥ pulakito drāg eṣa līna-vrataḥ |
akṣṇor aṅganam añjana-tviṣi para-brahmaṇy avāpte mudā
mudrābhiḥ prakaṭīkaroty avamatiṃ yogī svarūpa-sthitau

bhavet kadācit kutrāpi nanda-sūnoḥ kṛpā-bharaḥ |
prathamaṃ jñāna-niṣṭho 'pi so 'traiva ratim udvahet

yathā bilvamaṅgaloktiḥ--
advaita-vīthī-pathikair upāsyāḥ
svānanda-siṃhāsana-labdha-dīkṣāḥ |
śaṭhena kenāpi vayaṃ haṭhena
dāsī-kṛtā gopa-vadhū-viṭena

tat-kāruṇya-ślathībhūta-jñāna-saṃskāra-santatiḥ |
eṣa bhakti-rasānanda-nipuṇaḥ syād yathā śukaḥ

śamasya nirvikāratvān nāṭyajñair naiṣa manyate |
śānty-ākhyāyā rater atra svīkārān na virudhyate

śamo man-niṣṭhatā buddher iti śrī-bhagavad-vacaḥ* |
tan-niṣṭhā durghaṭā buddher etāṃ śānta-ratiṃ vinā

{*11.19.36}
kevala-śānto 'pi, śrī-viṣṇu-dharmottare yathā--
nāsti yatra sukhaṃ duḥkhaṃ na dveṣo na ca matsaraḥ |
samaḥ sarveṣu bhūteṣu sa śāntaḥ prathito rasaḥ

sarvathaivam ahaṅkāra-rahitatvaṃ vrajanti cet |
atrāntarbhāvam arhanti dharma-vīrādayas tadā

sthāyinam eke tu nirveda-sthāyinaṃ pare |
śāntam eva rasaṃ pūrve prāhur ekam anekadhā

nirvedo viṣaye sthāyi tattva-jñānodbhavaḥ sa cet |
iṣṭāniṣṭa-viyogāpti-kṛtas tu vyabhicāry asau