Haribhaktirasāmṛtasindhu · Chapter 1.3

iti śrī-śrī-bhakti-rasāmṛta-sindhau
purva-vibhāge sādhana-bhakti-laharī-dvitiyā ||
[1.3]
atha bhāvaḥ
śuddha-sattva-viśeṣātmā prema-sūryāṃśu-sāmya-bhāk |
rucibhiś citta-māsṛṇya-kṛd asau bhāva ucyate

tathā hi tantre--
premṇas tu prathamāvasthā bhāva ity abhidhīyate |
sāttvikāḥ svalpa-mātrāḥ syur atrāśru-pulakādayaḥ

sa yathā padma-purāṇe--
dhyāyaṃ dhyāyaṃ bhagavataḥ pādāmbuja-yugaṃ tadā |
īṣad-vikriyamāṇātmā sārdra-dṛṣtir abhūd asau

āvirbhūya mano-vṛttau vrajanti tat-svarūpatāṃ |
svayaṃ-prakāśa-rūpāpi bhāsamānā prākāśyavat

vastutaḥ svayam āsvāda-svarūpaiva ratis tv asau |
kṛṣṇādi-karmakāsvāda-hetutvaṃ pratipadyate

sādhanābhiniveśena kṛṣṇa-tad-bhaktayos tathā |
prasādenātidhanyānāṃ bhāvo dvedhābhijāyate |
ādyas tu prāyikas tatra dvitīyo viralodayaḥ

tatra sādhanābhiniveśa-jaḥ
vaidhī-rāgānugā-mārga-bhedena parikīrtitaḥ |
dvividhaḥ khalu bhāvo 'tra sādhanābhiniveśajaḥ

sādhanābhiniveśas tu tatra niṣpādayan rucim |
harāv āsaktim utpādya ratiṃ saṃjanayaty asau

tatra ādyo (1.5.26)--
tatrānvahaṃ kṛṣṇa-kathāḥ pragāyatām
anugraheṇāśṛṇavaṃ manoharāḥ |
tāḥ śraddhayā me 'nupadaṃ viśṛṇvataḥ
priya-śravasy aṅga mamābhavad ratiḥ

iti |
ratyā tu bhāva evātra na tu premābhidhīyate |
mama bhaktiḥ pravṛtteti vakṣyate sa yad agrataḥ

yathā tatraiva (1.5.28)--
itthaṃ śarat-prāvṛṣikāv ṛtū harer
viśṛṇvato me 'nusavaṃ yaśo 'malam |
saṅkīrtyamānaṃ munibhir mahātmabhir
bhaktiḥ pravṛttātma rajas-tamopahā

tṛtīye ca (3.25.25)--
satāṃ prasaṅgān mama vīrya-saṃvido
bhavanti hṛt-karṇa-rasāyanāḥ kathāḥ |
taj-joṣaṇād āśv apavarga-vartmani
śraddhā ratir bhaktir anukramiṣyati

purāṇe nātya-śāstre ca dvayos tu rati-bhāvayoḥ |
samānārthatayā hy atra dvayam aikyena lakṣitam

dvitīyo, yathā pādme--
itthaṃ manorathaṃ bālā kurvatī nṛtya utsukā |
hari-prītyā ca tāṃ sarvāṃ rātrim evātyavāhayat

atha śri-kṛṣṇa-tad-bhakta-prasādajaḥ
sādhanena vinā yas tu sahasaivābhijāyate |
sa bhāvaḥ kṛṣṇa-tad-bhakta-prasādaja itīyate

atha śrī-kṛṣṇa-prasādajaḥ--
prasādā vācikāloka-dāna-hārdādayo hareḥ

tatra vācika-prasādajaḥ, yathā nāradīye--
sarva-maṇgala-mūrdhanyā pūrṇānanda-mayī sadā |
dvijendra tava mayy astu bhaktir avyābhicāriṇī

āloka-dānajaḥ, yathā skānde--
adṛṣṭa-pūrvam ālokya kṛṣṇaṃ jāṅgala-vāsinaḥ |
viklidyad-antarātmano dṛṣṭiṃ nākraṣṭum īśire

hārdaḥ--
prasāda āntaro yaḥ syāt sa hārda iti kathyate

yathā śuka-saṃhitāyāṃ--
mahābhāgavato jātaḥ putras te bādarāyaṇa |
vinopāyair upeyābhūd viṣṇu-bhaktir ihoditā

atha tad-bhakta-prasādajaḥ, yathā saptame (7.4.36)--
guṇair alam asaṅkhyeyair mahātmyaṃ tasya sūcyate |
vāsudeve bhagavati yasya naisargikī ratiḥ

nāradasya prasādena prahlāde śudha-vāsanā |
nisargaḥ saiva tenātra ratir naisargikī matā

skānde ca--
aho dhanyo 'si devarṣe kṛpayā yasya tat-kṣaṇāt |
nīco 'py utpulako lebhe lubdhako ratim acyute

bhaktānāṃ bhedataḥ seyaṃ ratiḥ pañca-vidhā matā |
agre vivicya vaktavyā tena nātra prapañcyate

kṣāntir avyartha-kālatvaṃ viraktir māna-śunyatā |
āśā-bandhaḥ samutkaṇṭhā nāma-gāne sadā ruciḥ

āsaktis tad-guṇākhyāne prītis tad-vasati-sthale |
ity ādayo 'nubhāvāḥ syur jāta-bhāvāṅkure jane

tatra kṣāntiḥ--
kṣobha-hetāv api prāpte kṣāntir akṣubhitātmatā

yathā prathame (1.19.15)--
taṃ mopayātaṃ pratiyantu viprā
gaṅgā ca devī dhṛta-cittam īśe |
dvijopasṛṣṭaḥ kuhakas takṣako vā
daśatv alaṃ gāyata viṣṇu-gāthāḥ

atha avyārtha-kālatvaṃ, yathā hari-bhakti-sudhodaye--
vāgbhiḥ stuvanto manasā smarantas
tanvā namanto 'py aniśaṃ na tṛptāḥ |
bhaktāḥ sravan-netra-jalāḥ samagram
āyur harer eva samarpayanti

atha viraktiḥ--
viraktir indriyārthānāṃ syād arocakatā svayaṃ

yathā pañcame (5.14.43)--
yo dustyajān dāra-sutān suhṛd rājyaṃ hṛdi-spṛśaḥ |
jahau yuvaiva malavad uttamaḥśloka-lālasaḥ

atha māna-śūnyatā--
utkṛṣṭatve 'py amānitvaṃ kathitā māna-śūnyatā

yathā pādme--
harau ratiṃ vahann eṣa narendrāṇāṃ śikhā-maṇiḥ |
bhikṣām aṭann ari-pure śvapākam api vandate

atha āśā-bandhaḥ--
āśā-bandho bhagavataḥ prāpti-sambhāvanā dṛḍhā

yathā śrīmat-prabhupādānāṃ--
na premā śravaṇādi-bhaktir api vā yogo 'thavā vaiṣṇavo
jñānaṃ vā śubha-karma vā kiyad aho saj-jātir apy asti vā |
hīnārthādhika-sādhake tvayi tathāpy acchedya-mūlā satī
he gopī-jana-vallabha vyathayate hā hā mad-āśaiva mām

atha samutkaṇṭhā--
samutkaṇṭhā nijābhīṣṭa-lābhāya guru-lubdhatā

atha kṛṣṇa-karṇāmṛte (54)--
ānamrām asita-bhruvor upacitam akṣīṇa-pakṣmāṅkureṣv
ālolām anurāgiṇor nayanayor ārdrāṃ mṛdau jalpite |
ātāmrām adharāmṛte mada-kalām amlāna vaṃśī-svaneṣv
āśāste mama locanaṃ vraja-śiśor-mūrtiṃ jagan-mohinīm

atha nāma-gāne sadā ruciḥ, yathā--
rodana-bindu-maranda-syandi-dṛg-indīvarādya govinda |
tava madhura-svara-kaṇṭhī gāyati nāmāvalīṃ bālā

tad-guṇākhyāne āsāktiḥ, yathā kṛṣṇa-karṇāmṛte (88)--
mādhuryād api madhuraṃ
manmathatā tasya kim api kaiśoram |
capalyād api capalaṃ
ceto bata harati hanta kiṃ kurmaḥ

tad vasati-sthale prītiḥ, yathā padyāvalyām {*Not found in my edition.}--
atrāsīt kila nanda-sadma śakaṭasyātrābhavad bhañjanaṃ
bandha-ccheda-karo 'pi dāmabhir abhūd baddho 'tra dāmodaraḥ |
itthaṃ māthura-vṛddha-vaktra-vigalat-pīyūṣa-dhārāṃ pibann
ānandāśru-dharaḥ kadā madhu-purīṃ dhanyaś cariṣyāmy aham

api ca--
vyaktaṃ masṛṇitevāntar lakṣyate rati-lakṣaṇam |
mumukṣu-prabhṛtīnāṃ ced bhaved eṣā ratir na hi

vimuktākhila-tarṣair yā muktir api vimṛgyate |
yā kṛṣṇenātigopyāśu bhajadbhyo 'pi na dīyate

sā bhukti-mukti-kāmatvāc chuddhāṃ bhaktim akurvatām |
hṛdaye sambhavaty eṣāṃ kathaṃ bhāgavatī ratiḥ

kintu bāla-camatkāra-karī tac-cihna-vīkṣayā |
abhijñena subodho 'yaṃ raty-ābhāsaḥ prakīrtitaḥ

pratibimbas tathā cchāyā raty-ābhāso dvidhā mataḥ

tatra pratibimbaḥ--
aśramābhīṣṭa-nirvāhī rati-lakṣaṇa-lakṣitaḥ |
bhogāpavarga-saukhyāṃśa-vyañjakaḥ pratibimbakaḥ

daivāt sad-bhakta-saṅgena kīrtanādy-anusāriṇām |
prāyaḥ prasanna-manasāṃ bhoga-mokṣādi rāgiṇām

keṣāṃcit hṛdi bhāvendoḥ pratibimba udañcati |
tad-bhakta-hṛn-nabhaḥ-sthasya tat-saṃsarga-prabhāvataḥ

atha chāyā--
kṣudra-kautūhala-mayī cañcalā duḥkha-hāriṇī |
rateś chāyā bhavet kiṃcit tat-sādṛśyāvalambinī

hari-priya-kriyā-kāla-deśa-pātrādi-saṅgamāt |
apy ānuṣaṅgikād eṣa kvacid ajñeṣv apīkṣyate

kintu bhāgyaṃ vinā nāsau bhāva-cchāyāpy udañcati |
yad abhyudayataḥ kṣemaṃ tatra syād uttarottaram

hari-priya-janasyaiva prasāda-bhara-lābhataḥ |
bhāvābhāso 'pi sahasā bhāvatvam upagacchati

tasminn evāparādhena bhāvābhāso 'py anuttamaḥ |
krameṇa kṣayam āpnoti kha-sthaḥ pūrṇa-śaśī yathā

kiṃ ca--
bhāvo 'py abhāvam āyāti kṛṣṇa-preṣṭhāparādhataḥ |
ābhāsatāṃ ca śanakair nyūna-jātīyatām api

gāḍhāsaṅgāt sadāyāti mumukṣau supratiṣṭhite |
ābhāsatām asau kiṃ vā bhajanīyeśa-bhāvatām

ata eva kvacit teṣu navya-bhakteṣu dṛśyate |
kṣaṇam īśvara-bhāvo 'yaṃ nṛtyādau mukti-pakṣagaḥ

sādhanekṣāṃ vinā yasminn akasmād bhāva īkṣyate |
vighna-sthagitam atrohyaṃ prāg-bhavīyaṃ susādhanaṃ

lokottara-camatkāra-kārakaḥ sarva-śaktidaḥ |
yaḥ prathīyān bhaved bhāvaḥ sa tu kṛṣṇa-prasādajaḥ

jane cej jāta-bhāve 'pi vaiguṇyam iva dṛśyate |
kāryā tathāpi nāsūyā kṛtārthaḥ sarvathaiva saḥ

yathā nārasiṃhe--
bhagavati ca harāv ananya-cetā
bhṛśam alino 'pi virājate manuṣyaḥ |
na hi śaśa-kaluṣa-cchaviḥ kadācit
timira-parābhavatām upaiti candraḥ

ratir aniśa-nisargoṣṇa-prabalatarānanda-pūra-rūpaiva |
uṣmāṇam api vamantī sudhāṃśu-koṭer api svādvī