Gopālacampū, P1-33, U1-3, U5-6, U29 · Chapter 1.29

iti śrī-gopāla-campūm anv
ambikā-vana-gamana-saṃvidhānaṃ nāma
aṣṭaviṃśaṃ pūraṇam
||28||
(29)
athaikonatriṃśaṃ pūraṇam
rahaḥ-kutūhala-vaha-bahala-rahaḥ krīḍākhyam
[1] atha rātri-kathāṃ punaḥ snigdhakaṇṭhaḥ prathayāmāsa-
yadā rāsād vāsaṃ rahasi yayur ābhīra-vanitās
tadā śaṅkāṃ jagmuḥ svayam api tu nāsāṃ gṛha-janāḥ | yad anyās tad-rūpā vyadhita hari-māyā prati-gṛhaṃ
yathāmībhir jñātaṃ nivavṛtira etāḥ patha iti

[2] atha tad-anantara-rātri-santatīr nānā-rasa-rāsa-vilāsādibhir ativāhayati śrī-govinde vṛndā tu vividha-sāhāyakaṃ samāharati sma, yathā-
upavrajaṃ nyasyati sā tamālān
dīprauṣadhīś ca vraja-dūra-deśe | ity ādi tatrābhisṛtau sa-vṛndā
vṛndā hareḥ sevanam ācacāra

tadā ca-
acīcakāsad vipināny ājīhayad iha priyāḥ | rāsāyata-tvarad-rātrīr atrāmūr ajajāgarat

ārarambhata rambhorūr lambhaṃ lambhaṃ tato hariḥ | hārān iva vihārāṃs tān kāraṃ kāraṃ dadhe hṛdi

[3] kadācana caurya-caryayā tāsāṃ gṛham āyāti | tatreyaṃ dik-
sāhāyye lalitāyāḥ kalayan veśaṃ viśākhāyāḥ | viparīte viparītaṃ harir aviśat tamasi veśma rādhāyāḥ

[4] tatrāndhe tamasi kāmyamāna-vāmyām āliṃ pratyāli-cchala-vacanam-
susakhīyati te subhrūr asau gopa-matallikā | śape tubhyaṃ lapeyaṃ ca svayaṃ sakhyam urīkuru

[5] tatra kathaṃcid api tad-āgamane vṛddhābhiḥ kiṃcid ivāvagate kuñjāneva sva-līlayā kañja-locanas tābhiḥ samaṃ rañjayati |
[6] tatra tat-preyasyā vṛddhābhivañcanā-cañcutā, yathā-
yas tvāṃ rātriṣu vṛddhe mām api devo vibhīṣayate | sa tu mantribhir utkalito goṣṭhāt kuñjān vimardayati

[7] tasmād atrānyathā māvagās tatra ca māgā iti dhvanitam |
[8] atha sakhyāḥ-
satyaṃ jarati mad-ālyā vara-yuji gaṇḍe makara-vataṃsāṅkaḥ | na mayā likhitaḥ kutukān na mṛṣā-muṣyāḥ sapatnyā ca

[9] atra mama sakhītvena tasyāś ca sapatnītvena virodha-lakṣaṇā-prāpter mayaiva likhita iti tayā dhvanitam | [10] tad-anuvādinā kavinā tu tasya mrṣātvam iti |
[11] atha vraja eva vighna-nighnatayā proṣita-bhartṛkā varṇyate | [12] tatra śrī-kṛṣṇasya bhāvanā-
rādhāṃ paśyasi jalpasi spṛśasi ca svātmann athāliṅgasi
svasmiṃs tat tad anukriyām api tayārabdhāṃ bhajan nandasi | viśrambhaṃ na hi manyase tadapi ced anyāṃ daśāṃ yāmitas
tat-prāptiṃ manuṣe tayā kathaya bho kiṃ te sukhaṃ setsyati

[12] śrī-kṛṣṇaṃ prati sakhī-vacanam-
bhūṣaṇam agni-prāyaṃ bhūṣaṇa-nibham agnim apy asau rādhā | tvad-virahe yā kalayati sā katham anyaiḥ samādheyā

[13] athotkaṇṭhitā | tatra ca taṃ prati sakhī-vacanam-
tām eva prerayaty uccair utkaṇṭhā tvāṃ tu naiti sā | iti tasyām asau kṛṣṇa vitṛṣṇā-śarma nāñcati

asraiḥ kampair vivarṇa-cchavi-kula-valanair gadgadai romaharṣaiḥ
svedaiḥ stambhair vimohair murahara dalita-prāya-dehāṃ vidhāya | na tyaktuṃ na grahītuṃ katham api suśakā prāṇa-ghātāvarodhād
utkaṇṭhā kaṇṭha-lagnāśana-kavala-nibhāṃ tāṃ tu duḥkhākaroti

parama-guṇas tvaṃ mādhava
doṣāpūrṇa-prabhāvo' si | katham iva tāṃ guṇa-rūpā-
kṛtim adhicittaṃ samadadhyāḥ

[15] athābhisārikā | tatra tāṃ prati kasyāścid utprāsa-vacanam-
sandhyāyāṃ kva nu yāsi lola-nayanāpy agrāyanaikāgrahā
tatrāpy agratamaṃ sthalaṃ kim api tac cetasy alam bibhratī | sā caiṣā na hi budhyate tava gatir dṛṣṭvā tamālaṃ muhur
viṣṭabdhā dhṛta-bhaṅgi-saṅgi-savayo-madhye muhur līyase

ambara-maṇi-saṃvalitaṃ caramācalam adhijagantha pūrvādrim | śaṅke yan nija-kṛtyaṃ kartuṃ kṛṣṇāntikaṃ yāsi

[16] tatrābhisāro, yathā-
anyāś cābhisaranti bhāva-valitāḥ śubhra-kṣapāyāṃ kṛtaiḥ
śubhrair veṣa-varair vidhāya pihitaṃ svaṃ satyam etad-vacaḥ | tasmin gopa-varāṅganāḥ punar amūḥ kāntāṅga-saṅga-smṛter
jātānandatayā smita-dyuti-vṛtās teṣāṃ vyadhur vyarthatām

sāmānādhikaraṇyaṃ tejas-tamaso raho kalitam | kavayanty api yat kṛṣṇa-bhrāntiṃ tamasi vraja-strīṇām

ārambhād api kampate hṛdayakaṃ prasthānataḥ stambhate
pāda-dvandvam aho manasy anumilan dehaṃ niruddhe priyaḥ | yāsāṃ gopa-nata-bhrūvām abhisṛtau tāsāṃ paraṃ kāraṇaṃ
daivaṃ yan nayate tad-antikam amūs taṃ vā balāt karṣati

[17] kadācit kācit kāṃcid divāpi kṛṣṇa-samīpaṃ chalataḥ saṃvalayati, yathā-
āli paśya paritaḥ śikhi-vṛndaṃ
bhīti-rīti-rahitaṃ naṭad asti | bāḍham asya viharann adhigamyaṃ
navya-nīrada-varaḥ pratibhāti

[18] atra nirjanatvaṃ madhya-sthita-kṛṣṇatvaṃ ca dhvanitam | atha vāsakasajjā-
puṣpāṇy ācinute vicitya cinute talpaṃ vrajasyāṅganā
yan nāsti trijagaty api sphuṭam aho vaikuṇṭha-vīthiṣv api | evaṃ vāsaka-sajjikā lasati sā chāyā-dvitīyā yadā
saṅginy-ācita-saṅgatiḥ punar asau vettīva kiñcin na hi

tatra cotkaṇṭhāvaśyāyāṃ tasyāṃ taṃ prati sakhī-vacanam-
talpaṃ kṛtvā bhavad-abhigamaṃ cintayantī samantāt
tatrādṛṣṭe bhavati samaya-kṣepa-leśākṣamā sā | cakre cakrāṅkita-kara mahā-kampa-sampad-vihastā
śasta-kalpaṃ kṛtam api ca tat kalpayantī viśīrṇam

[20] atha vipralabdhā | tatra ca taṃ prati sakhī-vacanam-
bhuktiṃ muktiṃ ca tanute na paraṃ bhavad-āgamaḥ | bhaktiṃ vyanakti ca vyaktaṃ suhṛtsu parameśvara

[21] atha khaṇḍitā | tatra ca taṃ prati sakhī-vacanam-
kuryās tvaṃ khaṇḍitāṃ kāṃcin nakharādy-aṅga-saṅgataḥ | taṃ vinā yāṃ tathākārṣīs tatra te mahatī kalā

[22] khaṇḍitāṃ prati tasyāḥ suhṛd-upālambha-racanaṃ tad-dūtī-vacanam-
mānini vacmi tvām aham iha suhṛdāṃ tava śṛṇotu vṛndaṃ ca | sahajā yā nija-vṛttir govinde svayam upāsva tām eva

[23] tatra kaṭhorāyamānāṃ prati ca-
mānāgni-maya-dṛg-vāṇaṃ muñca tvaṃ kiṃ nu garvasi | rādhe kṛṣṇaś ca dṛk-paryak-parjanyāstraṃ vimokṣyati

[24] atha sambhramād āgatasya nakharādi-sparśāt kṣatāyamāna-raktimnā samaktasya kāntasya vacanaṃ tasyāḥ prativacanaṃ ca |
dayite dayita kathaṃ tvaṃ malina-mukhī dhig na vetsi hā kim idam | nakha-radana-kṣatam ūhet tvayi supte supti-rākṣasī cakre

[25] atha tasyāḥ sakhyā saṃvādaḥ-
jalade vilasati vidyud bibhyati hṛdayāṇi bhīrūṇām | hasasi hariṃ kimu mugdhe na hi hṛdi citraṃ stuve' ham etasya

[26] atha tasyāḥ kṛṣṇaṃ prati-
āvṛṇutāmaruṇāṃśur nakha-pada-sindūra-cihnāni | añjanam api kṛṣṇābhaṃ tat tu tavauṣṭhaḥ sphuṭaṃ kurute

strī-bhāvam ākalayituṃ kamaṭhānukāraṃ
gacchan-mahādri-talam āśritavān bhavān yat | tac cājitasya na tavānucitaṃ yatas tvaṃ
svāṃ devatāṃ ramayituṃ sudhayodyato' si

[27] tatra śrī-kṛṣṇasya vacanam-
rādhe vapuṣā tanvī komala-hṛdayātisūkṣmādhīr asi ca | mānaḥ katham etāvān māti tvayi tat tu pṛcchāmi

[28] bhavatu ca-
yathā me rocate māno na prasādas tathā tava | yatra svādhīnatā-vyaktiṃ kuruṣe tāḍanena ca

[29] tad evam upavadamāne tasmin punas tasyā vacanam-
nirvṛty-ambudhi-kumbhajaḥ sthiti-mahā-meghāvalī-mārutaḥ
prāṇānāṃ pavanāśanas tanuvanī-naidāgha-dāvānalaḥ | so' yaṃ te viraho yayā bata mayā soḍhastayā vā kathaṃ
soḍhuṃ hanta na śakyate nava-navaḥ padmāpate durnayaḥ

[30] evaṃ rudatīṃ sakhīm ālakṣya sakhī taṃ prāha-
anurāgavatī sandhyā svaccho' yaṃ vāsarastataḥ | sthāne tayā tasya saṅgo na rātryā malinātmanā

[31] tvayi tu tad-etad-viparītaṃ pratīyate tato na svacchateti vyañjanā | tataḥ sā māninī punas tām āha-
dīpa-jvālā mama hṛdi gatā sneham uddhūya vakre
cakre yena pratihati-mitā taṃ kathaṃ nindasi tvam | nirdvandvāhaṃ sapadi bhavitāsmy eva so' py eṣa nānā-
gopī-saṅghāt pramadam ayitā hanta kiṃ kasya duḥkham

[32] atha tasya tad-bāṣpāpasāraṇāya vyāja-racanaṃ vacanam-
mīnād api tan-muktā-
phalam udbhavatīti ratna-śāstrārtham | paśyann iva mama hastas
tava mukham abhiyāti mānini prasabham

[33] tataś ca sā vimukhī-bhavantī manasīdaṃ vadantī kalahāntaritā-bhāvam āsasāda |
aiṣīstvaṃ yadi mānasa mānenāmuṃ vaśīkartum | vaśage' py asmin kṛṣṇe tyajasi na kiṃ taṃ vṛthā-bhūtam

[34] tadā ca sakhī tam uvāca-
yā tava hṛdaya-vidāraṃ nakharair akaron murārāte | tāṃ manuṣe priya-dayitāṃ jvalati tu tasmād dṛg asmākam

[35] iti sakhīṣu parāṅ-mukhīṣu bahu taṭasthatāṃ ghaṭayan dūra-deśīya-deśam aṭati sma yadāsau, tadā tu-
rādhāyā dṛṣṭa-mānāyāḥ sṛṣṭa-romāñca-sañcayāḥ | vaiṇava-dhvani-jātīyā jīyāsuḥ kīcaka-svanāḥ

[36] tad avagamya vāmāyā vacanam-
na vadasi paruṣaṃ ruṣaṃ na dhatse
manasi ca tatra kathaṃ kṛtāparādhe | hari hari satataṃ vimānitāhaṃ
tvayi bata śarma kadāpi nāparādhe

[37] tatra tasyā manaḥ-kathā-
mānaṃ kurviti vakti sā priya-sakhī mānaṃ na vedmi sphuṭaṃ
kauṭilyena yadi prasidhyati sa tat kauṭilyam evātra kim | hā tasya smita-kañja-cāru-nayanaṃ śyāmasya man-mānasaṃ
draṣṭuṃ vāñchati hanta kaṣṭam aparāṃ sphūrtiṃ kathaṃ gacchatu

tataś ca-
balān mānaṃ śikṣayantīr api tatra sakhī-tatīḥ | rādhayā sārdham ākarṣan jīyād veṇu-kala-svanaḥ

[38] tasyā mukham avakalayya tat-tad-upamā-jātiyatayā saṃśayya sthitavantaṃ kāntaṃ prati sakhī-vacanam-
tasminn api vidhu-buddhiṃ kartuṃ mā kṛṣṇa sāhasaṃ kārṣīḥ | sarvaṃ jetṛ tad etad bhrū-dhanur anu netra-vāṇam utkṣipati

tataś ca-
bhramarīvāmbujāraṇyaṃ śapharīva jalāśayam | kṛṣṇaṃ labdhvā pūrvameva dṛṣṭā sābhūnna tūttaram

atha svādhīnabhartṛkā |
nityaṃ yā yācitāpi priyatama-hariṇā necchati sparśa-mātraṃ
vācā seyaṃ muhus taṃ nidiśati rasanām apy aho saṃvarītum | tan manye nūnam asyāvayava-samuditir divya-sīdhu-prakāraḥ
saṅgād apy aṅga yasya prabhavati muhur unmāda-lakṣmīr amūdṛk

tatra ca vakti rūpaṃ yadā kṛṣṇas tadā sā rādhikādhikam | śṛṇoti naiva tat tasya paśyantī rūpam adbhutam

[39] etad-anantaraṃ sakhīnāṃ nibhṛtālāpaḥ-
api līlāyitam anayā campakalatayā tamālādhaḥ | prāgalbhyāt punar etāṃ tad upari ramaṇa-spṛhāṃ vedmi

[40] atha śrīmat-parama-rūpa-gurūpadeśa-maya-svapna-kalitaṃ prātastana-lalita-rāga-saṃvalitaṃ lalitā-gītam-
jāgaraṇād atha kuñja-vare | vīkṣita-bhāskara-ruci-nikare ||kāntā-nidrā-bhaṅga-kare | api saṅkalita-sva-parikare ||mama dhīr majjati kaṃsa-hare | mauli-śikhopari-piñcha-dhare ||[dhruvam]
muhur ullāsita-yuvati-kare | samamanyā bahir anaya-care ||ghana-gahanādhvani gamana-pare | tatra ca bahu kṛta-sukha-vitare ||āśāstambhita-viraha-gare | dhāmni sanātana-śarma-hare ||iti||

[41] dināntare sakhī-saubhāgyam-
kiṃcid vilokya kuñje sakhyāḥ prāgalbhyam ekāntāt |
smerā karam anu muralīṃ prāgād barhāvaliṃ śirasi

[42] tāṃ prati śrī-rādhā kim apīdam ācārya provāca-
śete mañju-nikuñja-talpam anu sa preyān iti preyasi
tvāṃ veṇuṃ kila hartum asya kutukāt prāhaiṣam asmi drutam | taṃ tu tvaṃ parihṛtya cāgatavatī śrānteva ca prekṣyase
tad-vartmāny adurī-cakartha rabhasā yan mādṛśāṃ durgamam

[43] tad evaṃ tāsāṃ tasya ca prāvṛṣija-kṛṣivad daiva-vaśata eva vaśe vaśaṃvade tad-anantaraṃ vasanta-pañcamīm anu vasanta-rāgaṃ janayan gopāla-janībhir militvā śrīmān gopālaḥ khalu khelati sma | [44] tathā hi-tasyāṃ pañcamyām utkaṇṭhita-ṣaṭ-pada-khaṇḍita-tuṇḍa-mudrākula-mukula-maṇḍalatayā prathamam unmīliteṣu keṣucit puṇḍrakeṣu śrīman-mādhava-rādhādīnām abādham āgamanam asambhāvya bhṛśam unmanāyamānāyāṃ vṛndāyāṃ sumanāyamānā kācid āli-pālir āgamya tām ullāsitavatī-[45] sakhi vṛnde ! katham iva mandatāṃ vindase ? āgamya ramyam idam avagamyatām |
[46] vṛndāha--kīdṛśam ?
[47] sā prāha-yādṛśaṃ bhavad-abhirucitam |
[48] vṛndāha-kathyatāṃ tathyam |
[48] sā prāha-kācid ālī mādhavī-maṇḍalam anu mādhavaṃ mādhava-prakāśa-darśanataḥ samujjṛmbhita-rādhā-vipralambha-bādhaṃ nibhālya tām ullolayāmāsa | ullolya ca saṅgataś calantī sakhībhir idaṃ vasanta-rāgeṇa gāyantī vallabham api lambhayāmāsa |
[49] gānaṃ yathā-
kṛṣṇa-vanaṃ sakhi bhāti saraṅgam | bhavatīm iva laghu netum adhīśaṃ | sevita-madhura-sa-saṅgham ||[dhruvam]
jāgaram itam iva mādhavikāśatam anukṛta-jṛmbhā-bhaṅgam | cumbati madhupa-gaṇe kṛta-bhaṅgi smārayati priya-saṅgam ||sarasa-rasālaja-mukula-kulaṃ paripulakayad iva samam aṅgam | ākāritam iva tava kurute pika-kalam anukalayad anaṅgam ||tvāṃ celā-kali-candana-marutā vāsayatānulavaṅgam | karṣati madhuripu-madhu-parvodita-vīṇā-veṇu-mṛdaṅgam ||nītāyāṃ tvayi mādhavi mādhava-mādhava-gāna-taraṅgam | kirati parāga-cayaṃ locanam iva naṭayati cāru-kuraṅgam ||iti sā labdhvā vallabham aniśaṃ manasā valitāsaṅgam | jayati nirupama-rūpiṇi madhye yamunā-mānasa-gaṅgam

[51] atra ca padyam ekaṃ gadyate-
vana-ruci-ruciraḥ śrīmān
madana-vinodāya nunna-gopīkaḥ | abhitaḥ surabhita-deśaḥ
sahacari paśya mādhavaḥ sphurati

[52] tad evaṃ niśamya tatra vindamānāṃ vṛndām anu punar evaṃ darśayāmāsa, yathā-
rādhā harir api pulaki-vasantam | gāyati nija-nudam anu vikasantam ||dhruvam|| upadiśate diśi diśi guṇayantam | pikam anu pañcamam aticirayantam ||vāsantī-madhu rahasi dhayantam | śaṃsati madhuliham anugāyantam ||madhu-rasamanu gānaṃ ramayantam | rasayati vinimitam adharam ayantam ||malayaja-surabhi-dhuraṃ khañjantam | kavayati gandhavahaṃ prasajantam ||vādya-gaṇaṃ guṇa-valita-dig-antam | anunṛtyati mad-alola-dṛg-antam ||capalāghana-sama-rucim anu taṃ tam | naṭayati śikhi-gaṇam api nipatantam ||kirati cūrṇam anu pūrṇad-anantam | samam ālīla-lalanābhir anantam ||śrama-jala-kaṇa-gaṇam anu vilasantam | vahati parāga-bharaṃ rucim anantam

iti |
[53] atha tāvatīṃ gatim apy asahamānāḥ sahamānā guravaḥ kuravam ācarya paryavasthayā tāsāṃ svatantratām āvārya sarvato nirodham udbodhayāmāsuḥ |
[54] yatra khalu rakṣiṇī-vargas tāh sarvataḥ samacakṣiṣṭa | yena svata eva kṛṣṇasya ca tad-vaśyatā jātā | tad evaṃ vidhureṇa sarvatra ca tatra vidhure sati-
padyāṃ paśyati veṇum ākalayati preṣyādikaṃ preṣayaty
anyaṃ kṛtsnam upāyam ācarati yat kāntaḥ sa-kāntaḥ purā | tad gurvādi-nirodha-bandha-vidhiṣu prauḍheṣu hākarṣaṇaṃ
jajñe niṣphalanam eva yena ca tayor marmāṇi bhedaṃ yayuḥ

[55] tatra cobhayor manaḥ-kathā, yathā-
na prāg dṛṣṭir amuṣya yat priya-janasyāsīt tad uccaiḥ sukhaṃ
manye sā bata sāmprataṃ samabhavad yat tasya tad duḥkham | tasya svasya ca yā krameṇa mamatā jātādhunā sā dvayaṃ
cūrṇīkartum athecchatīha kim ahaṃ kartāsmi kartā sa kim

rātrāv adyātimātraṃ praṇayi-janam ahaṃ taṃ dadarśāpy asau māṃ
naitāvan-mātram atra pratinava-madanaṃ hanta pasparśa ca drāk | yady eṣa svapna eva sphurati na hi tadāpy ātmanaḥ prāṇa-rakṣāṃ
manye jāgrad-daśā vā tad api na hi hahā kṛṣṇa-kānte kva nu tvam

iti |
evaṃ saṃcakrudhus te te rurudhuś ca vadhur yadā | tadā kṛṣṇas tīrtha-yātrāṃ tṛṣṇayā cchadma nirmame

yadā kṛṣṇānuraktābhiḥ sā yātrā tābhir ākali | mano-rājyaṃ tadā prājyam acāyi niracāyi ca

tathā hi-
tābhiḥ svasya vidūrakābhir abhisāro' dyan-madābhis tadā
gaty-arthaṃ kṛta-vāsakābhir udita-prollāsi-tat-kelibhiḥ | kābhiścit parivañcitābhir ativyāptābhir udvāsita-
dvandvābhir vividha-sva-kelim abhajat tasmin sa kṛṣṇaḥ pathi

[56] tatra jyotir-mantra-yoga-tantra-viduṣī-veṣo, yathā-
sarvajñe kiṃ trilokyāṃ sukha-kara-sadanaṃ kṛṣṇa-goṣṭhaṃ kim asminn
ājīvyaṃ kṛṣṇa-gānaṃ kim atula-bhavika-prāpaṇaṃ kṛṣṇa-lipsā | kiṃ bhogyaṃ kṛṣṇa-rūpaṃ pariṇatir iha kā kṛṣṇa-labdhiḥ samantād
ity evaṃ rādhikāyāṃ prativacana-kṛtī pātu naḥ kṛṣṇa-dambhaḥ

[57] dūtī-veśo yathā-
kāsi preśyā kimīyā tava tam anugatā kiṃguṇā tasya tulyā
tatra syāt kiṃ pramāṇaṃ vijana-gṛha-gatā paśya me sarvam aṅgam | ity evaṃ dig-vitāna-praṇihiti-valitaṃ sa-smitaṃ tan-nidiṣṭā
rādhā-gīr-bhaṅgi-mātrāt paricitim akarod astu tat kāmya-vastu

[58] tad evaṃ śrī-rādhayā tad-viraha-cintā-saṃbādhayāpi gata-tad-bādhayā kvacid anyathānyathā ca rajany antare punaḥ punar anya-bahu-vidha-veśaṃ keśavaṃ niśāmya bhaṇitam, yathā-
seyaṃ bhiṣag-asitāṅgī mama hṛd-dāhaṃ cikitsituṃ labdhā | spṛśatī sakhi kara-nāḍīm anyāṅgaṃ dhik kutaḥ spṛśati

śyāmā vaiṇavikīyaṃ
vidūra-vāsā niśārdham udbhūtam | sakhya-sthalam idam alpaṃ
tan mama talpaṃ tu saṃkucad bhavatu

[59] atha śrīvatsa-lakṣaṇasyāpy etad-upalakṣaṇaṃ bahu-racanaṃ vacanaṃ lakṣaṇīyam, yathā-
sīvana-vijñā svayam api para-śilpānāṃ vilokanāt kartrī | sāhaṃ praṇayi-vyaktir lokaya gopi sva-hṛd-gatāṃ colīm

[60] tatra ca sati-
kaṅkaṇa-kāri-strīvad-veśaṃ
keśavam upetya yāḥ kāścit | dakṣiṇa-vāma-caritraṃ tenus
tan na hi karavāmahe sadasi

andhakāra-maya-pakṣa-lakṣitām
ambikā-vana-gatiṃ vidhāya tām | yady adiṣṭam abhavan murāriṇā
miṣṭam iṣṭam ataniṣṭa tad bahu

[61] tad evaṃ sati-
kaṃsārer hṛdayābja-sambhavad-alī-vīthīyamānā vraja-
preyasyaḥ sphuṭam antarāntara-padaṃ yātāḥ kramād antataḥ | evaṃ ced bhavatān na tatra ca vayaṃ saṃdihya vibrūmahe
rādhā yat kila karṇikā-sthitim agād asmākam atrāgrahaḥ

[62] atha samāpanam-
sudarśanasya śāpāntakārī rādhe sudarśanaḥ | atikāntas tavāvāti-kāntaḥ so' yaṃ bakāntakaḥ