Gauragaovindārcanasmaraṇapaddhati · Verses 321-340

vayo 'syā eka-māsāḍhyā hāyanās tu trayodaśa /
sapta-viṃśatibhir yuktaṃ dinaiś ca samudīritam (13-1-27)

gopāla-bhaṭṭa-nāmāsau khyātā gaura-rase kalau

asyā mantroddhāro yathā kiśorī-tantre--
gaṇeśo mukha-vṛttāḍhyo nāda-bindu-samanvitaḥ /
ṅe 'ntā vahni-priyāntā ca mantro vai guṇa-mañjarī

mantro yathā--gāṃ guṇa-mañjaryai svāhā
asyā dhyānaṃ yathā tatraiva--
jabā-nibha-dukūlāḍhyāṃ taḍid-āli-tanu-cchavim /
kṛṣṇāmoda-kṛtāpekṣāṃ bhaje 'haṃ guṇa-mañjarīm

līlānanda-prado nāmnā sudevyāḥ kuñjakottare /
tatraiva tiṣṭhati sadā mañjulālī sumañjarī

rūpa-mañjarikā-sakhya-prāyā sā guṇa-sampadā /
jabā-rāji-dukūleyaṃ tapta-hema-tanu-cchaviḥ

līlā-mañjarī nāmāsyā vāma-madhyātvam āśritā /
vayaḥ-saptāha-yuktāsau sārdha-tridaśa-hāyanā (13-6-7)

kalau gaura-rase loka-nātha-gosvāmitāṃ gatā

asyā mantroddhāro yathā kiśorī-tantre--
lakṣmī-yuktā mañjulālī mañjarī vahni-jāyikā /
caturthyantā bhaven mantro daśārṇaḥ khalu kathyate

mantro yathā--śrīṃ mañjulālī-mañjaryai svāhā
asyā dhyānaṃ yathā tatraiva--
pratapta-hemāṅga-ruciṃ manojñāṃ
śoṇāmbarāṃ cāru-subhūṣaṇāḍhyām /
śrī-rādhikā-pāda-saroja-dāsīṃ
tāṃ mañjulālīṃ niyataṃ bhajāmi

vaiśākha-kuñjād āgneye kuñjo 'sti sumanoharaḥ
vilāsānandado nāmnā-trāste vilāsa-mañjarī

vilāsa-mañjarī rūpa-mañjarī-sakhyam āśritā /
svakāntyā sadṛśīṃ cakre yā divyāṃ svarṇa-ketakīm

cañcarīka-dukūleyaṃ vāmā mṛdvītvam āśritā
kaniṣṭhā rasa-mañjaryāś caturbhir divasair iyam (12-11-26)

jīva-gosvāmitāṃ prāptā kalau gaura-rase tv asau

asyā mantroddhāro yathā kiśorī-tantre--
śriyā pracetasā caiva nāda-bindv āsya-vṛtta-gā /
vilāsa-mañjarī ṅe 'ntā svāhānto manur īritaḥ

mantro yathā--śrīṃ vāṃ vilāsa-mañjaryai svāhā
asyā dhyānaṃ yathā tatraiva--
svarṇa-ketaka-vinindi-kāyakāṃ
nindita-bhramara-kāntikāmbarām /
kṛṣṇa-pāda-kamalopasevanīm
arcayāmi suvilāsa-mañjarīm

nairṛte śrī-raṅgadevī-kuñjāt kuñjo 'sti paścimaḥ /
kaustūryānandado nāmnā tatrāste kaustūrī-mañjarī

kāca-tulyāmbarā cāsau śuddha-hemāṅga-kānti-bhāk /
vayas tridaśa-varṣāsau vāmā mṛdvītvam āśritā

śrī-kṛṣṇa-kavirājākhyāṃ prāptā gaura-rase kalau

asyā mantroddhāro yathā kiśorī-tantre--
śrī-bījena samāyuktā ṅe 'ntā kaustūrī-mañjarī /
svāhānta iti vai prokto navārṇa-mantra ucyate