Gauragaovindārcanasmaraṇapaddhati · Verses 341-360

mantro yathā --śrīṃ kastūrī-mañjaryai svāhā /
asyā dhyānaṃ yathā tatraiva--
viśuddha-hemābja-kalevarābhāṃ
kāca-dyuti-cāru-manojña-celām /
śrī-rādhikāyā nikaṭe vasantīṃ
bhajāmy ahaṃ kaustūrī-mañjarikām

atha vṛndāvanādhīśau padma-keśara-madhya-gau /
koṭi-kandarpa-lāvaṇyau dhyāyet priya-sakhī-vṛtau

ukta-veśa-vayo-rūpa-saṃyutau sumanoharau /
saṃsmaret siddha-dehena sādhakaḥ sādhanair yutaḥ

tatrādau mañjarī-rūpān gurvādīn tu svīyān svīyān praṇāly-anusāreṇa saṃsmaret śrī-guru-parama-guru-krameṇeti tataḥ śrī-rādhikāṃ dhyāyet /
tataḥ śrī-nandanandanam /
atha yugala-mantroddhāro yathā sanat-kumāra-saṃhitāyām--
gopījana-vallabheti caraṇān iti ca kramāt /
śaraṇaṃ ca prapadye ca tata etat pada-dvayam

pada-trayātmako mantraḥ ṣoḍaśārṇa udāhṛtaḥ /
namo gopījanety uktvā vallabhābhyāṃ vadet tataḥ /
pada-dvayātmako mantro daśārṇaḥ khalu kathyate

mantro yathā--gāṃ gopījana-vallabha-caraṇān śaraṇaṃ prapadye,
namo gopījana-vallabhābhyām /
asya dhyānaṃ yathā tatraiva--
atha dhyānaṃ pravakṣyāmi mantrasyāsya dvijottama /
pītāmbaraṃ ghana-śyāmaṃ dvi-bhujaṃ vana-mālinam

barhi-barha-kṛtāpīśaṃ śaśi-koṭi-nibhānanam /
ghūrṇāyamāna-nayanaṃ karṇikārāvataṃsinam

abhitaś candanenātha madhye kuṅkuma-bindunā /
vicitra-tilakaṃ bhāle vibhṛtaṃ maṇḍalākṛtim

taruṇāditya-saṅkāśa-kuṇḍalābhyāṃ virājitam /
gharmāmbu-kaṇikā-rājad-darpaṇābha-kapolakam

priyā-mukhe kṛtāpāṅga-līlayā connata-bhruvam /
agra-bhāga-lasan-muktā-sphurad-ucca-sunāsikam

daśana-jyotsnayā rājat-pakva-bimba-phalādharam /
keyūrāṅgada-sad-ratna-mudrikādi-lasat-karam

vibhṛtaṃ muralīṃ vāme pāṇau padmaṃ tathottare /
kāñcī-dāma-sphuran-madhyaṃ nūpurābhyāṃ lasat-padam

rati-keli-rasāveśa-capalaṃ capalekṣaṇam /
hasantaṃ priyayā sārdhaṃ hāsayantaṃ ca tāṃ muhuḥ

itthaṃ kalpa-taror-mūle ratna-siṃhāsanopari /
vṛndāraṇye smaret kṛṣṇaṃ saṃsthitaṃ priyayā saha

vāma-pārśve sthitāṃ tasya rādhikāṃ ca smaret tataḥ /
sucīna-nīla-vasanāṃ druta-hema-sama-prabhām

paṭāñcalenāvṛtāṅgāṃ sa-smitānana-paṅkajām /
kānta-vaktre nyasta-nṛtyac-cakorīṃ cañcalekṣaṇām

aṅguṣṭha-tarjjanībhyāṃ ca nija-priya-mukhāmbuje /
arpayantīṃ nāga-vallīṃ pūga-cūrṇa-samanvitām

muktāhāra-sphurac-cāru-pīnonnata-payodharām /
kṣīṇa-madhyāṃ pṛthu-śroṇiṃ kiṅkiṇī-jāla-maṇḍitām

ratna-tāḍaṅka-mañjīra-ratna-pādāṅgulīyakām /
lāvaṇya-sāra-mugdhāṅgīṃ sarvāvayava-sundarīm

ānanda-rasa-sammagnāṃ prasannāṃ nava-yauvanam /
sakhyaś ca tasyā viprendra tat-samāna-vayo-guṇāḥ /
tat-sevana-parā bhāvyāś cāmara-vyajanādibhiḥ