Gauragaovindārcanasmaraṇapaddhati · Verses 301-320

tārāvalī-dukūleyaṃ taḍit-tulya-tanu-cchaviḥ /
dakṣiṇā mṛdvīkā khyātā tulasīti vadanti yām

asyā vayo dvi-māsāḍhya-hāyanās tu trayodaśa (13-2) /
iyaṃ śrī-raghunāthākhyāṃ prāptā gaura-rase kalau

asyā mantroddhāro yathā kiśorī-tantre--
nāda-bindu-yuto vahnir mukha-vṛtta-samanvitaḥ /
svāhāntā mañjarī ṅe 'ntā rati-mañjarikā-manuḥ

mantro yathā--rāṃ rati-mañjaryai svāhā
asyā dhyānaṃ yathā tatraiva--
tārālivāso-yugalaṃ vasānāṃ
taḍit-samāna-svatanu-cchaviṃ ca /
śrī-rādhikāyā nikaṭe vasantīṃ
bhaje surūpāṃ rati-mañjarīṃ tām

kuñjasya tuṅgavidyāyāḥ kuñjaḥ pūrvatra vartate /
lavaṅga-sukhado nāmnā sudṛśāṃ sumanoharaḥ

lavaṅga-mañjarī tatra mudā tiṣṭhati sarvadā /
sā tu rūpākhya-mañjaryā ekenāhnā varīyasī

udyad-vidyut-samāna-śrīs tārāvalī-paṭāvṛtā /
śrī-kṛṣṇānandadā nityaṃ dakṣiṇā mṛdvikā matā

vaya eka-dinaṃ sārdha-hāyanās tu trayodaśa (13-6-1) /
śrī-sanātana-nāmāsau khyātā gaura-rase kalau

asyā mantroddhāro yathā kiśorī-tantre--
śrī-līlābhyāṃ samāyuktā
ṅe 'ntā lavaṅga-mañjarī /
svāhā lavaṅga-mañjaryā
mantro 'yaṃ daśa-varṇakaḥ

mantro yathā--śrīṃ lāṃ lavaṅga-mañjaryai svāhā
asyā dhyānaṃ yathā tatraiva--
capalā-dyuti-nindi-kāntikāṃ
śubha-tārāvali-śobhitāmbarām /
vraja-rāja-suta-pramodinīṃ
prabhaje tāṃ ca lavaṅga-mañjarīm

rasānanda-prado nāmnā citrā-kuñjasya paścime /
kuñjo 'sti tatra vasati sarvadā rasa-mañjarī

śrī-rūpa-mañjarī-samyag-jivātu sā prakīrtitā /
haṃsa-pakṣa-dukūleyaṃ phulla-campaka-kānti-bhāk

lavaṅga-mañjarī-tulyā prāyeṇa guṇa-sampadā /
atīva priyatāṃ prāptā śrī-rūpa-mañjarī-śritā

sandhāna-caturā seyaṃ dautye kauśalam āgatā /
trayodaśa-śarad-yuktā (13) dakṣiṇā mṛdvikā matā

sā kalau raghunāthākhyā-yukta-bhaṭṭatvam āgatā

asyā mantroddhāro yathā kiśorī-tantre--
mukha-vṛtta-yuto vahni-nāda-bindu-samanvitaḥ /
svāhānta-sampradānānto mantro vai rasa-mañjarī

mantro yathā--rāṃ rasa-mañjaryai svāhā /
asyā dhyānaṃ yathā tatraiva--
haṃsa-pakṣa-rucireṇa vāsasā
saṃyutāṃ vikaca-campaka-dyutim /
cāru-rūpa-guṇa-sampadānvitāṃ
sarvadāpi rasa-mañjarīṃ bhaje

aiśānye campakalatā-kuñjāt kuñjo 'sti śobhanaḥ /
guṇānanda-prado nāmnā tatrāste guṇa-mañjarī

rūpa-mañjarikā-saukhyābhilāṣā sā prakīrtitā /
jabā-rāji-dukūleyaṃ taḍit-prakara-kānti-bhāk

kaniṣṭheyaṃ bhavet tasyās tulasyās tu tribhir dinaiḥ /
śrī-kṛṣṇāmoda-dākṣiṇyam āśritā prakharoditā