Garuda Purana · Chapter 3.25

iti śrīgāruḍe mahāpurāṇe uttarakhaṇḍe tṛtīyāṃśe brahmakāṇḍe śrīveṅkaṭeśagiryārohaṇakramatadbhaktatatparvatanāmādinirūpaṇaṃ nāma caturviśo 'dhyāyaḥ
śrīgaruḍamahāpurāṇam- 25
sā dvāradeśe śrīnivāsasya devī svāmipuṣkariṇīṃ dadṛśe kaiśca sārdham /
svāminhare śrīnivāseti sā taṃ brahmādīnāṃ tārakaṃ sampradadhyau

devaiḥ sārdhaṃ pālanārthaṃ ca viṣṇurastyeva nityaṃ puṣkariṇyāṃ jaleṣu /
ataḥ svāmipuṣkariṇīti cāhustatra snānaṃ kanyakānyāśca cakruḥ

śucirbhūtvā śrīnivāsaṃ ca devāstuptuṃ viviśuḥ śuddhabhaktyā khagendra /
yathopadiṣṭaṃ guruṇā tathaiva cakre kanyāśca sarvaṃ khagendra

tadā hariṃ darśayāmāsa tasyai svakaṃ rūpaṃ supratīke supūrṇam /
sā kanyakā śrīnivāsasya rūpaṃ dadarśa bhaktyā svamanobhirāmam

suvarṇacitraṃ vasanaṃ vasānaṃ soṣṇīṣakaṃ kañcukaṃ saṃdadhānam

mṛgotthamadagandhena surabhīkṛtadiṅmukham /
puṇḍarīkaviśālākṣaṃ kaṃbugrīvaṃ mahābhujam

hemayajñopavītāṅgaṃ sākṣātkandarpasannibham /
jaganmohanasaindaryaṃ komalāṅgaṃ manoharam

dṛṣṭvā ca kanyā mumude romāñcitasugātrakā

taddarśanāhlādapariplutāśayā premṇātha romāśrukulākulekṣaṇā /
nanarta devī puratastasya viṣṇoḥ sā dhvastadoṣā paramādareṇa /
ānanda māṃ pāhi sukhaṃ ca dattvā mukundā māṃ pāhi vimuktidānāt

māṃ pāhi nityaṃ hyaravindanetra prasannadṛṣṭyā karuṇāsudhārdra /
govinda govinda suduḥ khitāṃ māṃ jñānādidānena hi pāhi nityam

janārdana tvaṃ hi suduṣṭasaṃgānkāmādirūpānsatataṃ varjayitvā /
hare hare māṃ satataṃ pāhi daityānsamāhṛtya prabalānvighnarūpān

rameśa māṃ pāhi caturmukheśa viśveśa māṃ pāhi sarasvatīśa /
rameśa māṃ pāhi nidānamūrte vṛndāravṛndairvanditapādapadma

evaṃ tu natvā paramādareṇa tuṣṭāva viṣṇuṃ paramaṃ purāṇam /
lakṣmyā sadā ye 'viditā guṇāśca asaṃkhyātāḥ saṃti viṣṇau ca vīśa

teṣāṃ sakāśādatibāhulyasaṃkhyā guṇā harau te 'viditā vai ramāyāḥ /
ato hare stavane kvāsti śaktistathāpi yatnaṃ stavane te kariṣye

tava prasādācca ramāprasādādvidhiprasādātbhāratīśaprasādāt /
rudraprasādātstavanaṃ te kariṣye tathāpi viṣṇo mayi śāntiṃ kuruṣva

yadi prasannosi mayi tvamīśa tvatpādamūle dehi bhaktiṃ sadaiva /
tvaddarśanāddeva śubhāśubhaṃ ca naṣṭaṃ madīyaṃ hyaśubhaṃ ca nityam

tvanmāyayā naṣṭamimaṃ ca lokaṃ madena mattaṃ badhiraṃ cāndhabhūtam /
aiśvaryayogena ca yo hi mūko jātaḥ sadā dīnāgurvādikeṣu

mā dehi aiśvaryamanuttamaṃ tvatpādāravindasya viruddhabhūtam /
tvaṃ deva me dehi satāṃ ca saṃgaṃ tava svarūpapratipādakānām

putrādīnāmaihikaṃ vāsudeva dagdhvā ca me dehi pādāravinde /
sadvaṣṇave kriyamāṇaṃ ca kopaṃ dagdhvā ca me dehi pādaravinde

dravyādike kriyamāṇaṃ ca lobhaṃ dagdhvā vai me dehi pādābjamūle /
putrādike kriyamāṇaṃ ca mohaṃ dagdhvā ca me dehi pādābjamūle

vidyāṃ putraṃ dravyajātaṃ madaṃ ca dagdhvā ca me dehi pādābjamūle /
sadvaiṣṇavāsahamānasvarūpaṃ dagdhvā mātsaryaṃ pāhi māṃ veṅkaṭeśa

mantraṃ ca me dehi nidānamūrte yenaiva me syāttava saṃgaśca bhūyaḥ /
nānyaṃ vṛṇe tava pādābjasaṃgāttadeva me dehi mama prasannaḥ

itīritaḥ śrīnivāsaḥ prasanna uvāca devo hyamṛtastravaṃ ca /
atraiva kanye prajapasva mantraṃ sugopyarūpaṃ paramādareṇa

vakṣyāmi mantraṃ paramādareṇa śṛṇvadya bhaktyā paramādareṇa /
antaḥ sthamantyaṃ hyādyasaṃyuktameva sabindu tadvatsparśakādyena yuktam

ekārayuktaṃ prathamāntaḥ sthayuktaṃ samatrikoṇe coṣmaṇā saṃyutaṃ ca /
takārasaktaṃ svarśamantaḥ sthayuktamādyanta oṃkārasamanvitaṃ ca

anena mantreṇa tavepsitaṃ ca bhaveddhi kanye nāntra vicāryamasti /
evaṃ sa uktvā śrīnivāso haristu pratīkavaddarśayāmāsa rūpam

natvā tu sā śrīnivāsaṃ ca devī uvāsa ha svāmisaraḥ samīpe /
tasmindine brāhmaṇādīṃśca sarvānsaṃtarpayāmāsa ca ṣaḍrasānnaiḥ

sāyaṅkāle śrīnivāsasya dṛṣṭvā utsāharūpaiḥ śrīnivāsapratīkaiḥ /
sākaṃ bhaktyā saṃpraṇamyātha devī pradakṣiṇaṃ śrīnivāsasya suṣṭhu

nanarta devī supratīkasya cāgre lajjāṃ tyaktvā jaya deveti coktvā /
ānṛttakāle ca hareśca vaktraṃ dṛṣṭvā ca dṛṣṭyā tu paraṃ nanarta

mamādya gātraṃ pāvitaṃ śrīnivāsa mamādya netraṃ saphalaṃ saṃbabhūva /
mamādya pādau sārthakau caiva jātau pradakṣiṇaṃ śrīnivāseśa kṛtvā

hastau ca me sārthakāvadya jātau agre kṛtvā hastaśabdaṃ murāreḥ /
evaṃ vadantī prīṇayantī ca devaṃ jagāmasā stotravacaḥ kadambaiḥ

devāstadā dunduṃbhayo vinedire tanmastake puṣpavṛṣṭiṃ ca cakruḥ /
tasminkāle ubhayoḥ pārśvayośca nṛtyaṃ cakrurdevatāvāranāryaḥ

tathaiva tāstalaśabdaṃ ca kṛtvā tadā sarvā namanaṃ cāpi cakruḥ /
ānandaśaile sarvadā tvitthameva sā sarvadā nartayantī ca vīndra

ānandamagnā sāpi devī jagāma svamāśramaṃ jaigiṣavyeṇa sārdham /
yātrāmevaṃ ye na kurvanti vīndra teṣāṃ ca sarvaṃ niṣphalaṃ cāhurāryāḥ

gatvāśramaṃ jaigiṣavyeṇa sārdhaṃ guruṃ tvapṛcchadveṅkaṭeśasya mantram /
mantrasyārthaṃ brūhi me jaigiṣavya mantrāvṛttiṃ kurvatāṃ vai phalāya

jaigīṣvya uvāca /
śṛṇuṣva bhadre veṅkaṭe śasya nāmnastvarthaṃ śrutvā hṛdaye saṃnidhatsva

viti hyuttamavācī syādyeti jñānamudāhṛtam /
kakāraḥ sukhavācī syāṭṭeti cittamudāhṛtam

īśatvamātmavāci syādevaṃ jñeyaṃ tu kanyake /
pūrṇajñānaṃ sukhaṃ vittaṃ vyāptatvādvyaṅkaṭābhidhaḥ

vya (ve) mindriyādikaṃ proktaṃ vyaṅgabhūtaṃ harau yataḥ /
kaṭaśca samudāyārtho vyaṃ (veṃ) kaṭaścendriyaughakaḥ

svasminprerayate yasmāttasmādvyaṅkaṭanāmakaḥ /
viṣaye preṣayennityamato vyaṅkaṭanāmakaḥ

viśiṣṭajñānarūpatvādvyeti muktāḥ sadā smṛtāḥ /
muktānāṃ ca samūhastu vyaṅkaṭeti prakīrtitaḥ

sadā muktasamūhānāmīśatvādvyaṅkaṭābhidhaḥ /
liṅgadehamato jīvo vyaṅkaṭeti samāhṛtaḥ

liṅgānāṃ caiva svāmitvādvyaṅkaṭeśeti saṃjñitaḥ /
daityānāṃ ca samūhāstu jñānādividhurā yataḥ /
ato daityasamūhastu vyaṅkaṭeti prakīrtitaḥ

teṣāṃ saṃharaṇe īśastvato vyaṅkaṭanāmakaḥ /
ānandasya viruddhatvātkāmakrodhādayo guṇāḥ

vyaṅkaṭā iti saṃproktāsteṣāṃ nāśayitā prabhuḥ /
atastu vyaṅkaṭeśākhya evaṃ jñātvā japaṃ kuru

evaṃ vyaṅkaṭāmāhātmyaṃ śrutvā devī khageśvara /
nidrāṃ cakāra tatraiva rātrau pitrā sahaiva ca /
brāhme muhūrte cotthayi hṛdi sasmāra kanyakā

(vyaṅkaṭeśasya prātaḥ stutiḥ) /
śrīvyaṅkaṭeśaśca nṛsiṃhamūrtiḥ śrīvaradarājaśca varāhamūrtiḥ /
śrīraṅgaśāyī ca anantaśāyī kurvantu sarve mama suprabhātam

śrīkṛṣṇamūrtiśca gadādharaśca śrīviṣṇupādastu prayāgavāsaḥ /
nārāyaṇaḥ śrībadarīnivāsaḥ kurvantu sarve mama suprabhātam

dāmodaro vai trijagannivāsaḥ śrīpāṇḍuraṅgaśca nṛsiṃhadevaḥ /
śrīrāmadevaśca amoghavāsaḥ kudṛ

śrīdharmaputraśca nṛsiṃhamūrtiḥ śrīpippalasthaśca muhallavāsaḥ /
kolānṛsiṃhaḥ śūrpakārastha siṃhaḥ kurvantudṛ

caturmukhaścārusarasvatī ca svabhāratī śarvasuparṇaśeṣāḥ /
amāmahedraśca śacīmukhāstāḥ kurvantu dṛ

dvārāvatī kāśikāvantikā ca prayāgakāñcyau mathurāpurī ca /
māyāvatī hastimatī purī ca kurvantu sa dṛ

bhāgīrathī caiva sarasvatī ca godāvarī siṃdhukṛṣṇa ca veṇī /
kalindakanyā yamunā ca narmadā kurva dṛ

vitastikāverisatuṅgabhadrāḥ suvañjarā bhīmarathī vipāśā /
sutāmraparṇī ca pinākinī ca ku dṛ

svāmipuṣkariṇī caiva suvarṇamukharī tathā /
śrīpāṇḍavī taubaruśca kapilā pāpanāśanī

gururvasiṣṭhaḥ kraturaṅgirāśca manuḥ pulastyaḥ pulahaśca gautamaḥ /
raibhyo marīciścyavanaśca dakṣaḥ kurvantu sarve mama suprabhātam

saptārṇavāḥ sapta kulācalāśca dvīpāśca saptopavanāni sapta /
bhūrādikāni bhuvanāni sapta kurvantu sa dṛ

māndhātrā nahuṣoṃbarīṣasagarau rājā nalo dharmarāṭ prahlādaḥ kraturāḍ vibhīṣaṇagayau vyāso hanūmānapi /
aśvatthāma kṛpāvumā drupadajā śrījānakī tārakā mandodaryakhilāḥ prabhātasumahaṃ kurvantu nityaṃ hare

aśvatthasya vanāni kiṃ ca tulasīdhātrīvanāni prabho punnāgasya vanāni caṃpakavanānyanyāni puṣpāṇi ca /
mandārasya vanāni yāni ca hareḥ saugandhikānyapyaho nityaṃ tāni diśantu matpramuditaṃ śrīveṅkaṭeśa prabho

evaṃ smṛtvā śrīnivāsasya devī kṛtvā śaucaṃ jaigiṣavyeṇa sākam /
snātuṃ yayau puṣkariṇīṃ hareśca snānaṃ samyak tatra cakāra deśe /
samyag japtvā vyaṅkaṭeśasya mantramuvāca sā jaigiṣavyaṃ guruṃ ca