Garuda Purana · Chapter 3.26

iti śrīgāruḍe mahāpurāṇe uttarakhaṇḍe tṛtīyāṃśe brahmakāṇḍe devī kṛtaveṅkaṭeśadarśanatatstutyādivarṇanaṃ nāma pañcaviṃśodhyāyaḥ
śrīgaruḍamahāpurāṇam- 26
kanyovāca /
śrīnivāsaḥ kimarthaṃ vai āgatotra vadasva me /
śeṣācalopi kutrā bhūtkadāyātaśca pāpahā /
svāmipuṣkariṇī cātra kimarthaṃ hyagatā vada

jaigīṣavya uvāca śṛṇu bhadre mahābhāge vyaṅkaṭeśasya cāgamam /
āvayordevi pāpāni viṣamaṃ yānti bhāmini

āsītpurā hiraṇyākṣaḥ kāśyapo ditinandanaḥ /
sanakādeśca vāgdaṇḍāddvitīyadvārapālakaḥ

babhūva daityayonau ca devānāṃ kaṇṭako balī /
saṃjīvo vijayaḥ prokto haribhakto mahāprabhuḥ

hariṇyākṣaḥ svayaṃ daityo haribhaktavidūṣakaḥ /
etādṛśo hiraṇyākṣastapastaptuṃ samudyataḥ

tadā mātā ditirdevī hiraṇyākṣamuvāca sā /
ditiruvāca /
vatsalastvaṃ mahābhāgamā tapasvāṣṭahāyanaḥ

tvaṃ mā dadasva duḥ khaṃ me pālayiṣyati kovidaḥ /
kṣaṇamātraṃ na jīvāmi tvāṃ vinā jīvanaṃ na hi

mā tapa tvaṃ mahābhāga mama jīvanahetave /
evamuktastu mātrā sa vijayovaśatobravīt

hiraṇyākṣo mātaraṃ prāha jālaṃ hitvā viṣṇorbhajane 'laṃ kuruṣva /
mayisnehaṃ putrahetorvirūḍhaṃ sukhaduḥ khe ceha loke paratra

yāvatsnehaṃ mayi mātaḥ karoṣi tāvatkleśaṃ śāśvataṃ yāsyasi tvam /
mātaśca te mayi putratvabuddhistvayyapyeṣā mātṛbuddhirmamāpi

tāte pūjye pitṛbuddhirmamāsti tasmiṃstute bhartṛbuddhirhi mithyā /
nirmāti yasmāddharireva sarvaṃ samyak pātā niyato 'sau murāriḥ

ato hi mātā harireva sarvadā tvanyāsāṃ vai mātṛtā copacārāt /
nirmātṛtvaṃ yadi mukhyaṃ tvayi syāddroṇādīnāṃ jananī kā vadasva

mātṛtvaṃ vai yadi mukhyaṃ tvayi syāddhātrādīnāṃ jananī kā vadasva /
yataḥ sadā yāti jagattatto hariḥ sadā pitā viṣṇurajaḥ purāṇaḥ

sadā pitā mukhyapitā yadi syādgarbhasthabāle pālakaḥ ko vadasva /
mātāpitroḥ pālakatvaṃ yadi syātkūrmādīnāṃ pālakau kau vadasva

mātāpitroḥ pālakatvaṃ yadi syātkṛpādīnāṃ rakṣakau kau vadasva /
punnāmakānnārakāddeha bhajāntasmāttrātāputraviṣṇuḥ purāṇaḥ

na tārakohaṃ narakācca subhrūrna vai bhartā nāpi pitrādayaśca /
na vai mātā nānujādiśca sarvaḥ sarvatrātā viṣṇurato na cānyaḥ

māyāṃ madīyāṃ jñānaśastreṇa cchitvā bhaktyā hareḥ smaraṇaṃ tvaṃ kuruṣva /
yadbhaktirūpūrvaṃ smaraṇaṃ nāma viṣṇostatsarvathā pāpaharaṃ ca mātaḥ

yo vā bhaktyā smaraṇaṃ nāma viṣṇoḥ karotyasau pāpaharo bhaviṣyati /
ayaṃ deho durllabhaḥ karmabhūmau tatrāpi madhye bhajanaṃ viṣṇumūrteḥ

āyurgataṃ vyarthameva tvadīyaṃ śīghraṃ bhajeḥ śrīnivāsasya pādam /
upadiśyaivaṃ mātaraṃ putravaryo daityāveśātsobhavadvai tapasvī

caturmukhaṃ prīṇayitvaiva bhaktyā hyavadhyatvaṃ prāpa tasmānmahātmā /
tato bhūmiṃ karavadveṣṭayitvā ninye tadā daityavaryo mahātmā

śrīmuṣṭadeśe prādurāsīddharistu vārāhaviṣṇustvajanaḥ purāṇaḥ /
bhittvācābdhiṃ viviśe taṃ mahātmā rasātale saṃsthitaṃ bhūtalaṃ ca

svadaṃṣṭrāgre sthāpayitvā'jagāma tadāgamādāgato daityavaryaḥ /
taṃ karṇamūle tāḍayitvā jaghāna prasādayāmāsa ca pūrvavadbhuvam

sudiggajānsthāpayitvā ca viṣṇuḥ śrīmuṣṭe vai saṃsthitaḥ śrīvarāhaḥ /
tadā hariścintayāmāsa viṣṇurbhaktyā madīyaṃ mānuṣaṃ dehamadya

ārādhayiṣyanti ca māṃ kva ete teṣāṃ dayāṃ kutra vāhaṃ kariṣye /
evaṃ hariścintayitvā sukanye vaikuṇṭhalokādacalaṃ śeṣa saṃjñam /
vīndraskandhe sthāpayitvā svayaṃ ca samāgatobhūdbhūtalaṃ bhūtaleśaḥ

suvarṇamukharītīramārabhya garuḍadhvajaḥ /
śrīkṛṣṇaveṇīparyantaṃ sthāpayā māsa taṃ girim

gireḥ pucche tu śrīśailaṃ madhyame 'hobalaṃ smṛtam /
mukhaṃ ca śrīnivāsasya kṣetraṃ ca samudāhṛtam

alpena tapasābhīṣṭaṃ sidhyatyasminnahobale /
gaṅgādisarvatīrthāni puṇyāni hyatra saṃti vai

ya enaṃ sevate nityaṃ śraddhābhaktisamanvitaḥ /
jñānārthī jñānamāpnoti dravyārthī dravyamāpruyāt

putrārthī putramāpnoti nṛpo rājyaṃ ca vindati /
yaṃyaṃ kāmayate martyastantamāpnoti sarvathā

cintitaṃ sādhyate yasmāttasmāccintāmaṇiṃ viduḥ /
puṣkariṇyāśca bāhulyādgirāvasminsaraḥ su ca /
puṣkarādririti prāhurevaṃ tattvārthavedinaḥ

śātakuṃbhasvarūpatvātkanakādriṃ ca taṃ viduḥ /
vaikuṇṭhādāgatenaiva vaikuṇṭhādririti smṛtaḥ

amṛtaiśvaryasaṃyukto vyaṅkaṭādririti smṛtaḥ /
vyaṅkaṭeśasya śailasya māhātmyaṃ yāvadasti hi

tāvadvaktuṃ samagreṇa na samarthaścaturmukhaḥ /
vyaṅkaṭādrau parāṃ bhaktiṃ ye kurvanti dinedine /
paṅgarjaṅghāla eva syādacakṣuḥ padmalocanaḥ

mūko vāgmī bhavedeva badhiraḥ śrāvako bhavet /
vandhyā syādbahuputrā ca nirdhanaḥ sadhano bhavet

etatsarvaṃ girau bhaktimātreṇaiva bhaveddhruvam /
tattvato vyaṅkaṭādrestu svarūpaṃ vetti ko bhuvi

yasmādasya gireḥ puṇyaṃ māhātmyaṃ vetti yaḥ pumān /
māyāvī paramānandaṃ tyaktvā vaikuṇṭhamuttamam /
svāmipuṣkariṇītīre ramayā sahamodate

kalyāṇādbhutagātrāya kāmitārthapdāyine /
śrīmadvyaṅkaṭanāthāya śrīnivāsāya te namaḥ

śrīsvāmipuṣkariṇyāśca māhātmyaṃ śṛṇu kanyake /
svāmipuṣkariṇīmadhye śrīnivāsosti sarvadā

snānaṃ kurvanti ye tatra teṣāṃ muktiḥ kare sthitā /
tisraḥ koṭyordhakoṭiśca tīrthāni bhuvanatraye /
tāni sarvāṇi tatraiva saṃti tīrthe hareḥ sadā

tattīrthaṃ śrīnivāsākhyaṃ sarvadevanamaskṛtam /
tadeva śrīnivāsasya mandiraṃ parikīrtitam

taddarśanādeva kanye yānti pāpāni bhasmasāt /
ekaikasnānamātreṇa satsaṃgo bhavati dhruvam

satsaṃgājjñānamāsādya jñānānmokṣaṃ ca vindati /
adhikāriṇāṃ bhavedevaṃ viparītamayoginām

tīrthānāṃ snānamātreṇa mokṣaṃ yāntīti ye viduḥ /
te sarve asurā jñeyāste yānti hyadhamāṃ gatim

śrīnivāsasya tīrthesminvāyukoṇe ca kanyake /
āste vāyuḥ sadā viṣṇoḥ pūjāṃ kartumanuttamām

vāyutīrthaṃ ca tatproktaṃ hastadvādaśakāntaram /
hastaṣaṭkapramāṇaṃ ca paścime samudāhṛtam /
uttare hastaṣaṭkaṃ tu vāyutīrthamudāhṛtam

ye veṣṇavā vaiṣṇavadāsavaryāḥ snānaṃ suryustatra pūrvaṃ sukanye /
madhvāntasthāḥ śrīnivāsastu nityamatra snānātprīyatāṃ me dayāluḥ

ye madhvatīrthe snātumicchanti devi rudrādayo vāyubhaktā mahāntaḥ /
sadā snānaṃ tatra kurvanti devi prātaḥ kāle codayātpūrvameva

ye vāyutīrthe visṛjanti dehajaṃ malaṃ mūtraṃ vamanaṃ śleṣmakaṃ ca /
ye 'pānaśuddhiṃ liṅgaśuddhiṃ ca kanye kurvanti te hyasurā rākṣasāśca

śṛṇvanti ye bhāgavataṃ purāṇaṃ kiṃ varṇaye tasya puṇyaṃ tu devi /
ye kṛṣṇamantraṃ tu japanti devi hyaṣṭā kṣaraṃ mantravaraṃ sugopyam

teṣāṃ hariḥ prīyate keśavolaṃ madhvāntastho nātra vicāryamasti /
evaṃ dānaṃ tatra kurvanti ye vai dvijāgryāṇāṃ vaiṣṇavānāṃ vidāṃ ca

teṣāṃ puṇyaṃ naiva jānanti devā jānātyevaṃ śrīnivāso haristu /
śālagrāmaṃ vāyutīrthe dadante teṣāṃ puṇyaṃ vetti sa vyaṅkaṭeśaḥ

sudurlabho vāyutīrthe 'bhiṣeko niṣkāmabuddhyā vaiṣṇavānāṃ ca devi /
tatrāpi tīrthe labhyate bhāgyayogādbhāgavatasya śravaṇaṃ viṣṇudāsaiḥ

tathaiva tīrthe durlabhaṃ tatra devi śālagrāmasya dvijavarye ca dānam /
jaṃbūphalākārasunīlavarṇaṃ mukhadvayaṃ cakracatuṣṭayānvitam

sukesaraiḥ saṃyutaṃ svarṇacihnadhvajāṃ kuśairvajracihnairyavaiśca /
jānārdanīṃ mūrtimāhurmahānto dānaṃ tasyā durlabhaṃ tatra tīrthe

atyuttamaṃ mūrtidānaṃ tu bhadre sudurllabhaṃ paramaṃ nātra lobhaḥ /
sudurlabhaṃ bahudogdhyāśca gṛṣṭerdānaṃ tathā vastraratnādikānām

atyuttamaṃ dravyadānaṃ ca devi svāpekṣitaṃ dānamāhurmahāntaḥ /
svasyānapekṣaṃ phaladānaṃ ca vastrādānaṃ tasya vyarthamāhurmahāntaḥ

atyuttamaṃ gṛṣṭidānaṃ ca puṇyaṃ naivāpyate dugdhadohāśca gāvaḥ /
atyuttame vastradāne subuddhiḥ sudurghaṭā paramā vai janānām

atyuttamaṃ bhāgavatasya pustakaṃ sudurghaṭaṃ vāyutīrthaṃ ca kanye /
atyuttamaṃ dravyadānaṃ ca devi sudurghaṭaṃ vāyutīrthaṃ nṛṇāṃ hi /
sudurlabho vaiṣṇavaistattvavidbhirharervicāro vāyutīrthe ca kanye

śrīnivāsasya tīrthasya uttarasyāṃ diśi sthitam /
candratīrtha miti proktaṃ tatrāste candramāḥ sadā

śrīnivāsasya pūjāṃ ca tatra sthitvā karotyayam /
tatra snānaṃ prakurvanti puṇyadeśe ca kanyake

gurutalpādipāpebhyo mucyante nātra saṃśayaḥ /
tatra snātvā pūrvabhāge śālagrāmaṃ dadāti yaḥ

jñānadvārā mokṣameti nātra kāryā vicāraṇā /
dadhivāmanamūrteśca dānaṃ tatra sudurlabham

badarīphalamātraṃ tu vatulaṃ nīlavarṇakam /
prasannavadanaṃ sūkṣmaṃ susnigdhaṃ kanyake śubhe

cakradvayasamāyuktaṃ gaupūraiḥ pañcabhiryutam /
cāpabāṇasamāyuktamanataṃ kuṇḍalākṛtim

vanamāla sukhayutaṃ mūrdhnasāhasrasaṃyutam /
raupyabindusamāyuktaṃ savye bhadrārdhamātrakam

candreṇa sahitaṃ devi dadhivāmanamucyate /
etādṛśaṃ kalau nṝṇāṃ durlabhaṃ bahubhāgyadam /
lakṣmīnārāyaṇasamāṃ tāṃ mūrtiṃ viddhi bhāmini

sudurlabhaṃ tasya mūrteśca dānaṃ taccandratīrthe śravaṇaṃ durghaṭaṃ ca /
samyak svarūpaṃ dadhivāmanasya sudurghaṭaṃ śravaṇaṃ vaiṣṇavācca

tatra snātvā vāmanasya svarūpaśravaṇādvidurdānaphalaṃ samaṃ ca /
daśahastapramāṇaṃ tu candratīrthamudāhṛtam

madhyāhne durlabhaṃ snānaṃ nṛṇāṃ tatra sumaṅgale /
tatra sthitvā dhanyanaraḥ sadā bhajati vai harim

varāhamūrtidānaṃ tu śālagrāmasya durlabham /
jaṃbūphalapramāṇaṃ tu etadvai kukkuṭāṇḍavat

vadanaṃ valayākāraṃ pramāṇaṃ caṇakādivat /
devasya vāmabhāge ca madhyadeśaṃ vihāya ca

cakradvayasamāyuktaṃmūrdhadeśe ca bhāmini /
suvarṇabindunā yuktaṃ bhūvarāhākhyamucyate

pūjāṃ kṛtvā bhūvarāhasya marterdānaṃ dattvā śravaṇaṃ cāpi kṛtvā /
tatra sthitaṃ bhūvarāhaṃ ca dṛṣṭvā sa vai naraḥ kṛtakṛtyo hi loke

tatra snātvā bhūvarāhasya marteḥ śṛṇoti yo lakṣaṇaṃ samyageva /
sa tena puṇyaṃ samupaiti devi sa muktibhāṅ nātra vicāryamasti

īśānakoṇe śrīnivāsasya devi raudraṃ tīrthaṃ paramaṃ pāvanaṃ ca /
tatra sthitvā rudradevo mahātmā pūjāṃ karoti śrīnivāsasya nityam

hastāṣṭakaṃ tatpramāṇaṃ vadanti tatra snānaṃ vaiṣṇavaiḥ kāryameva /
tatra snātvā prayato vai murāreḥ kathāṃ divyāṃ śṛṇuyādādareṇa /
snānaṃ pānaṃ tatra dānaṃ ca kuryāllakṣmīnṛsiṃhaprīyate devi nityam3,26.76 //
badarīphalamātraṃ ca vartulaṃ bindusaṃyutam

devasya vāmabhāge tu cakradvayasamanvitam /
suvarṇarekhāsaṃyuktaṃ kiñcidraktasamanvitam

vaiśyavarṇaṃ savadanaṃ padmarekhādicihnitam /
lakṣmīnṛsiṃhaṃ taṃ viddhi bhuktimuktipradāyakam

etā dṛśaṃ gaṇḍikāyāḥ śilāyā mūrterdānaṃ durghaṭaṃ viddhi vīndra /
tatra snātvā śrīnṛsiṃhasvarūpaṃ lakṣmīpateḥ śṛṇuyādbhaktiyuktaḥ

mūrterdānātphalamāpnoti devi satyaṃsatyaṃ nātra vicāryamasti

īśānaśakrayormadhye brahmatīrthamudāhṛtam /
durlabhaṃ mānuṣāṇāṃ tu snānaṃ sarvārthasādhakam

śālagrāmasya dānaṃ tu durlabhaṃ tatra vai nṛṇām /
lakṣmīnārāyaṇasyaiva mūrterdānaṃ sudurlabham

sthalamauduṃbarasamaṃ tatpramāṇamudāhṛtam /
chattrākāraṃ vartulaṃ ca prasannavadanaṃ śubham

caṇakapradeśamātraṃ ca vadanaṃ samudāhṛtam /
savye dakṣiṇapārśve ca samayoḥ puṣkalānvitam

goyūthavatsavarṇaṃ ca catuścakrasamanvitam /
gokhuraiśca samāyuktaṃ suvarṇakiṇasaṃyutam

vanamālābhisaṃyuktaṃ vajrapuṅkhaiśca saṃyutam /
etādṛśīṃ darermūrti lakṣmīnārāyaṇaṃ viduḥ

kalau nṛṇāṃ tasya lābho durlabhaḥ saṃsmṛto bhuvi /
dānaṃ ca sutarāṃ devi darlabhaṃ kiṃ vadāmi te

brahmatīrthe ca saṃsnāya śrotavyā vai hareḥ kathā /
gaṇḍikāyāḥ śilāyāśca lakṣmīnārāyaṇasya tu

lakṣaṇaṃ yo vijānāti tadā tatsadṛśaṃ phalam /
prāpnotyeva na saṃdeho nātra kāryā vicāraṇā

śrīnivāsasya tīrthasya pūrve syādindratīrthakam /
śrīnivāsasya pūjāṃ tu kartumāste śacīpatiḥ

śālagrāmaśilādānaṃ kartavyaṃ śrotriyāyavai /
śālagrāmaśilādānaṃ hatyākoṭivināśanam

tasmiṃstīrthe tu yo devi sītārāmaśilābhidhām /
dadāti bhūtale bhadre bhūpateḥ sadṛśo bhavet

sītārāmaśilā devi dvividhā saṃprakīrtitā /
pañcacakrayutā kācitṣaṭracakreṇa ca saṃyutā

tatrāpi ṣaṭracakrayutā hyuttamā saṃprakīrtitā /
pañcacakrayutāyāśca phalaṃ dviguṇamīritam

kukkuṭāṇḍapramāṇaṃ ca susigdhaṃ nīlavarṇakam /
vadanatrayasaṃyuktaṃ saṭcakraiḥ kesarairyutam

svarṇarekhāsamāyuktaṃ dhvajavajrāṅkuśairyutam /
etādṛśaṃ tu vai bhadre sītārāmābhidhaṃ smṛtam

vadanevandane devi sītārāmasya kośakam /
durlabhaṃ tu kalau nṝṇāṃ svasāmrājyapradaṃ śubham

indratīrthe mahādevi sītārāma bhidhāśilā /
yā taddānaṃ durlabhaṃ tannālpasya tapasaḥ phalam

dānasya śaktyabhāve tu śrotavyaṃ lakṣaṇaṃ hareḥ /
śālagrāma śilādānādyatphalaṃ tatphalaṃ labhet

āgneyakoṇe śrīnivāsasya devi tīrthaṃ tvāste vahnisaṃjñaṃ suśastam /
sa vahnidevaḥ śrīnivāsasya pūjāṃ kartuṃ hyāste sarvadā tīrthamadhye

yo vā tīrthe vahnisaṃjñe ca devi bhaktyā snānaṃ kurute 'jaṃ smaranhi /
jñānadvārā mokṣamāpnoti devi tatra snānaṃ durllabhaṃ vai nṛṇāṃ ca

jñātvā snānaṃ duṣkaraṃ tīrtharāje bhaktistasmindurllabhā caiva devi /
śālagrāme tacchilāyāśca dānaṃ sudurlabhaṃ vāsudevābhidhāyāḥ

hrasvaṃ tathā vartulaṃ nīlavarṇaṃ sūkṣmaṃ mukhaṃ mukhacakraṃ suśuddham /
suveṇuyuktaṃ vāsudevābhidheyaṃ dānaṃ kalau durlabhaṃ tasya bhadre

dāne tasyāḥ śaktya bhāve ca devi snātvā tīrthe vāsudevābhidhasya /
samyak śrāvyaṃ lakṣaṇaṃ vai śilāyāstayostulyaṃ phalamāhurmahāntaḥ

dakṣiṇe śrīnivāsasya yamatīrthaṃ ca saṃsmṛtam /
tatrāste yamarājastu pūjāṃ kartuṃ hareḥ sadā

tatra snānaṃ ca dānaṃ cāpyakṣayaṃ paramaṃ smṛtam /
śālagrāmaśilādānaṃ kāryaṃ tatra mahāmune

paṭṭābhirāmasaṃjñāyāḥ śilāyā dānamiṣyate /
taccūtaphalavatsthūlaṃ vadanatrayasaṃyutam

śiraścakreṇa rahitaṃ saptacakraiḥ samanvitam /
nīlavarṇaṃ svarṇarekhaṃ gośurādyaiḥ samanvitam

paṭṭavardhanarāmaṃ tu durlabhaṃ bahubhāgyadam /
paṭṭavardhanarāmaṃ tu yo dadāti ca tatra vai /
paṭṭābhiṣikto bhavati nātra kāryā vicāraṇā

śrīnivāsasya nairṛtye nairṛtaṃ tīrthamuttamam /
āste hi nirṛtistatra pūjāṃ kurtuṃ ca sarvadā

tatra snānaṃ prakartavyaṃ punarjanma na vidyate /
śālagrāmaśilāyāścaḥ puruṣottamasaṃjñikām

mūrtiṃ dadāti yo martyaḥ sa yāti paramāṃ gatim /
auduṃbaraphalākāraṃ prasannavadanaṃ śubham

cakradvyasamāyuktaṃ śiraścakrasamanvitam /
suvarṇabindusaṃyuktaṃ vajrāṅkuśasamānvatam

tanmūrtidānaṃ durlabhaṃ tatra devaḥ prīṇāti yasmācchrīnivāso mahātmā /
yadā dānaṃ durghaṭaṃ syācca devi tadā śrotavyaṃ lakṣaṇaṃ tasya mūrteḥ

pāśinairṛtayormadhye śeṣatīrthaṃ paraṃ smṛtam /
tatra snātvā śeṣamūrtiṃ pradadāti dvijātaye

sa yāti paramaṃ lokaṃ punarāvṛttivarjitam /
auduṃbaraphalākāraṃ kuṇḍalākṛtimeva ca

śeṣavadvadanaṃ tasya tasmiṃścakradvayaṃ smṛtam /
phalaṃ tamekacakreṇa saṃyutaṃ valmikānvitam

kiñcidvarṇasamāyuktaṃ śeṣamūrti matisphuṭam /
suptā prabuddhā dvividhā śeṣamūrtirudāhṛtā

phaṇonnatā prabuddhā syātsaptalakṣaphaṇānvitā /
tatrāpi durlabhā suptā mahābhāgyakarīsmṛtā

iha loke paratrāpi mokṣadā nātra saṃśayaḥ /
navacakrādupakramya viṃśatyantaṃ ca yatra saḥ

ananta iti vijñeyo hyanantaphaladāyakaḥ /
viśvaṃbharaḥ sa vijñeyo viṃśatyūrdhvaṃ varānane

tatrāpi kesaraiścaikrarlakṣaṇaiśca samanvitam /
kalau tu durlabhaṃ naṇāṃ taddānaṃ cātidurlabham

snānaṃ kṛtvā śeṣatīrthe viśuddhenaiva cetasā /
eteṣāṃ lakṣaṇaṃ śrutvā prayāti paramāṃ gatim

tataḥ paraṃ mahābhāge vāruṇaṃ tīrthamuttamam /
tatrāste varuṇo devaḥ pūjāṃ kartuṃ hareḥ sadā

tatra snānaṃ prakartavyaṃ dātavyaṃ dānamuttamam /
śiśumāraṃ ca matsyaṃ ca trivikramamathāpi vā /
dātavyaṃ bhūtikāmena tīrthesminviravarṇini

jaṃbūphalasamākārā pucche sūkṣmā sabindukā /
cakratrayā ca vadane pucchopari sacakrakā

śrīvatsabindumālāḍhyā matsyamūrtirudāhṛtā /
pucchādadhaścakrayutaṃ śiśumāramudāhṛtam

vakracakrayutaścetsyāttrivikrama udāhṛtaḥ /
eteṣāṃ lakṣaṇaṃ śrutvā vāruṇe tīrtha uttame

etaddānaphalaṃ prāpya modate viṣṇumandire /
pūrvauktā mūrtayo yasmin gṛhe tiṣṭhanti bhāmini /
bhāgīrathī tīrthavarā saṃnidhatte na saṃśayaḥ

svāmi puṣkariṇīsnānaṃ durghaṭaṃ tu kalau nṛṇām /
tatra sthitānāṃ tīrthānāṃ snānaṃ cāpyatidurghaṭam

śālagrāmaśilādānaṃ durghaṭaṃ ca tathā smṛtām /
svāmipuṣkariṇītīre kanyādānaṃ sudurghaṭam

durghaṭaṃ kapilādānaṃ bhakṣyadānaṃ sudurghaṭam /
svāmipuṣkariṇītīrthe tīrtheṣvanyeṣu bhāmini

snānaṃ kuru yathānyā yaṃ śayyādānaṃ tathā kuru /
jaigīṣavyena muninā tvevamuktā ca kanyakā

svāmipuṣkariṇīsnānaṃ sā cakāra dhṛtavratā /
tīrtheṣveteṣu susnātā dānaṃ cakre subhāminī

uvāsa tatra sā davī triḥ saptakandināni ca /
svāmipuṣkaraṇītīramahimānaṃ śṛṇoti yaḥ /
sa yāti paramāṃ bhaktiṃ śrīnivāse jaganmaye