Garuda Purana · Chapter 3.24

iti śrīgāruḍe mahāpurāṇe uttarakhaṇḍe tṛtīyāṃśe brahmakāṇḍe veṅkaṭeśagiriyātrākramanirūpaṇaṃ nāma trayoviṃśodhyāyaḥ
śrīgaruḍamahāpurāṇam- 24
jaigīṣavya uvāca /
kanye śṛṇu tvaṃ veṅkaṭākhyācalasya smerānanāṃ puṇyamāṃrohaṇe 'sya /
śrīgītāyāḥ paṭhanaṃ caiva kurvannārohaṇaṃ kurute sarvalokaḥ

padepade śrīnivāsaśca devastvalaṃ hyalaṃ prīyate bhaktavargaḥ /
taṃ prīṇayanmokṣamāyānti sarve harau tuṣṭe kimalabhyaṃ ca kanye

sopānadeśe yaḥ purāṇaṃ śṛṇoti tadā kṛtā sarvatīrthādiyātrā /
tadā divā prastuvantīha mārge sadā hariṃ śrīnivāsaṃ guruṃ ca

sopānānāṃ mahimānaṃ ca śrutvā śālagrāmaṃ sthāpayitvā ca tatra /
namaskṛtvā punarevāpi sā tu sopānāni tvārurohātha sādhvī

sopānānāṃ vīndra cārohaṇena tvavaiṣṇavānāṃ haritoṣo na caiva /
tenaiva teṣāṃ sādhanaṃ bhūya eva tamasyandhe pātayituṃ khagendra

sthalesthale evamevāpi kāryaṃ jaigīṣavyaṃ punarevāha devī /
kanyovāca /
jaigīṣavyaḥ śrīnivāso haristu brahmādīnāṃ dṛśyate śrīnivāsaḥ

jaigīṣavya kṛpayā tvaṃ vadasva jaigīṣavyo hyevamukto hariṃ tu /
uvāca kanyāṃ somaputrīṃ satīṃ ca brahmādīnāṃ dṛśyate śrīnivāsaḥ

anantarūpodhikakāntakāntimānrūdrādīnāṃ dṛśyate veṅkaṭeśaḥ /
sasūryalakṣādhikakāntakāntito rudrādīnāṃ dṛśyate śrīnivāsaḥ

sahasrasūryādhikakāntikāntaḥ savidyuttvānmānuṣāṇāṃ rameśaḥ /
ṛṣyādīnāṃ dṛśyate candravacca sanmānuṣāṇāmaparokṣo haristu

nakṣatravaddṛśyate śrīnivāsaḥ sadā ṛṣīṇāmaparokṣo haristu /
sa sūryavaddṛśyate śrīnivāsaḥ saṃsāriṇāṃ veṅkaṭeśaḥ khagendra

saṃdohavaddṛśyate vai prakāśo mithyāvatāṃ dṛśyate śrīnivāsaḥ /
pāṣāṇavannailyarūpaprakāśaḥ śilāmātre dṛṣyate vai kalau ca

nṛṇāṃ sarveṣāṃ śrīnivāso haristu kalau svarūpaṃ śrīnivāsasya devī /
na mānuṣāḥ pravijānanti sarve yataḥ kalau tāmasā rājasāstu

tatsaṃginaḥ sāttvikāḥ kecideva hyato bhaktā durlabhā vai kalau ca /
ye dṛśyante bhaktavatte na bhaktāḥ śiśrodarayorbharaṇe caiva saktāḥ

kurvanti yātrāṃ ca tadarthameva bhaktijñānaṃ durlabhaṃ vai kalau ca /
bhaktā ye vai na viraktāḥ sadaiva teṣāṃ harerdarśanaṃ durlabhaṃ ca

bhaktasvarūpaṃ tava vakṣye khagendra yo jñānapūrṇaḥ parame snigdha eva /
na ca dveṣairbandhuro bhaktiyuktastava dveṣāñchṛṇu vakṣye ca samyak

jīvābhidā hariṇāprākṛtena svatantreṇa hyasvatantrasya nityam /
jñānānandaiḥ paripūrṇe harau ca guṇairapūrṇo harirityeva cintā

śrībrahmarudrādidivaukasāṃ sadā tathā dvijānāṃ saṃmānāyāśca cintā /
viṣṇoḥ sakāśādbrahmarudrādikānāṃ sadādhikyālocanaṃ dveṣa eva

viṣṇorbhadre hastapādādikānāṃ bhedajñānaṃ dveṣamāhurmahāntaḥ /
avatārāṇā chedabhedādikaṃ ca tathocyate maraṇasyāpi cintā

tadbhaktānāṃ dveṣaṇaṃ cāhurāryāstadvākyānāṃ dūṣaṇaṃ dveṣa eva /
naca dveṣaiḥ saṃyutā ye ca loke kanye dṛśyante na tu bhaktāḥ kadācit

kanyovāca /
jaigīṣavya brūhi me ke ca bhaktā bhaktiṃ kathaṃ darśayāmāsurete /
teṣāṃ hariḥ śrīnivāso mahātmā trātā sadā bhaktavarge dayāluḥ

jaigīṣavyastvevamukto mahātmā uvāca kanyāṃ saṃsmaran bhaktavaryaḥ /
jaigīṣavya uvāca /
prahādādyā śrīnivāsasya bhaktāḥ kṛtvā nṛsiṃhe cottamāṃ bhaktimeva

avāpa sāmrājyamanuttamaṃ ca jñānaṃ nṛsiṃhātsamavāpa paścāt /
parāśaraḥ śrīnibāsasya bhakto bhaktiṃ kṛtvā vyāsarūpaṃ hariṃ ca

stutvā tena jñānatattvaṃ hyavāpya jagāma mokṣaṃ bhaktisaṃvardhitātmā /
yo nāradaḥ śrīnivāsasya bhakto bhaktiṃ kṛtvā garbhavāse harau ca

tayā bhaktyā brahmaputratvamāpa jñānaprāptyā tena muktiṃ jagāma /
yo hyaṃbarīṣaḥ śrīnivāsasya bhaktaḥ kṛtvā bhaktiṃ paradeva harau ca

japtvā jñānaṃ prāpya durvāsakaścāpyavāpa mokṣaṃ tena saṃvardhitātmā /
mucukundo vai śrīnivāsasya bhakto vairāgyato bhaktidārḍhyaṃ ca kṛtvā

tattvajñānaṃ prāpya viṣṇormahātmā hyavāpa mokṣaṃ tena saṃvardhitātmā /
sa puṇḍarīkaḥ śrīnivāsasya bhaktaḥ pitrādiṣṭo viṣṇubhaktiṃ ca kṛtvā

hariprāsādājjñānamanuttamaṃ cāpyavāpa mokṣaṃ bhaktisaṃvardhitātmā /
brahmā ca vāyuśca sarasvatī ca jñātavyāḥ sarve ṛjuyoginaśca

acchinnabhaktāśca sadā murārerna kāmyaraktāḥ śuddharūpā hi te ca /
girīśanāgeśakhageśasaṃjñā devāḥ śukrārau gurucandrendusūryāḥ

jaleśognirmanudharmau kuberaḥ vighneśanāsatyamarudgaṇāśca /
parjanyamitrādaya eva sarve sadā hyete śrīnivāsasya bhaktāḥ

viśvāmitro bhṛguraurvaśca kutso marīciratriḥ pulahaḥ kratuśca /
śaktirvasiṣṭho sautamīyo pulastyo bhāradvājaḥ śrīnivāsasya bhaktāḥ

māndhātā nahuṣoṃbarīṣasagarau rājā pṛthurhaihayo ikṣvākurbharato yayātisutalau dharmo vikukṣistathā /
uttānaśca bibhīṣaṇo daśaratho hyete mahājñāninaḥ śrīmadveṅkaṭanāyakasya ca gurorbhaktāḥ sadā saṃsmṛtāḥ

bhāgīrathī samudraśca yamunā ca sarasvatī /
godāvarī narmadā ca kṛṣṇā bhīmarathī tathā

sarayūphalgukāverīgaṇḍakī kapilā stathā /
ityetāśca harerbhaktāḥ saṃti cātraiva bhāmini

abhiprāyaṃ tatra vakṣye śṛṇu kanye mayā sati /
yatra pravartate mārge kathā viṣṇormahātmanaḥ

vartante vaiṣṇavā yatra haritattvārthabodhakāḥ /
tatraiva bhaktāḥ sarvepi saṃti viṣṇostathaiva ca

ye devayātrāṃ paramātmacintayā kurvanti te haribhaktāśca nānye /
yato harau parame vaiṣṇavānāṃ sarvaṃ niṣṭhāmeti kṛtyaṃ khagendra

śeṣācalaṃ samāsādya hyannavastrādibhūṣaṇam /
yo na dadyādabhaktaḥ sa tataḥ ko nu paraḥ paśuḥ

bhaktā hareḥ śrīnivāsācale ca gaṅgādirūpeṇa ca tatratatra /
tiṣṭhanti sevārthamurukramasya teṣāṃ pūjā naiva kāryā ca devi

abhiprāyaṃ tatra vakṣye śṛṇu tvaṃ tatra sthale vastragandhādidhūpaiḥ /
purāṇoktā api bhedena pūjyā dṛṣṭvā ca tānvandayetprājña eva

sadbrāhmaṇānvandayetpādamūle hastau ca dvau saṃpuṭīkṛtya devi /
sāṣṭāṅgarupaṃ vandanaṃ caiva viṣṇoḥ kuryāttathā gurave viṣṇubuddhyā

gaṅgādīnāṃ vandanaṃ kāryameva sāṣṭāṅgaṃ vai tulasīnāṃ tathaiva /
aśvatthānāṃ namanaṃ kāryameva gavādīnāṃ namanaṃ mānasena

pūjā sadā devadevasya viṣṇoḥ kāryā bhaktyā vaiṣṇavaireva nānyaiḥ /
ye nāmakā jñānavantaḥ subhaktāḥ sadaiva kāryā viṣṇupūjā ca kanye

ye nāmakā jñānavantaḥ subhaktāḥ sadaivaṃ kāryā viṣṇupūjā ca kanye /
yenāmakā viṣṇubhaktāḥ sadaiva pūjā viṣṇornaiva kāryātra devi

mohādyo vai pūjayeddevadevaṃ mahādharmādyāti cāndhaṃ tamo vai /
brahmādināmāni harerhi devīṃ viṣṇoḥ svanāmāni dadau divaukasām

nādāddhīraḥ keśavādīni kanye svakaṃ puraṃ pravihāyaiva rājā /
evaṃ mayoktaṃ kanyake sarvametadetatparaṃ samyagārohaṇīyam

govinda nārāyaṇa mādhaveti yūyaṃ mayā sarvamārādhitavyam /
sarve militvā punarevaṃ khagendra samāruhanvaiṅkaṭādriṃ gṛṇantaḥ

harernāmānyatra pūrvaṃ gṛṇantastvāsvādayantaḥ śrīnivāsasya nāma /
draṣṭuṃ sarve śrīnivāsaṃ tathaiva kurvantaste talaśabdaṃ nadantaḥ

iti kṛṣṇavacaḥ śrutvā tārkṣyaḥ kṛṣṇamuvācaha kathamāsvādanaṃ cakruretadvistīryame vada /
śrīkṛṣṇa uvāca /
bho śrīnivāsa tava nāmaiva caitannāma svāmī nanu nāmaiva svāmī /
yāṃ brahmādyā āśrayantītti yasmāttasmādramā śrīriti nāma cāpa

ramāśrayatvānnitarāṃ sarvadā cetyato hariḥ śrīnivāsābhidhānaḥ /
bho śrīnivāseti tu nartayanto romāñcamātrāstalaśabdakāriṇaḥ

adyaiva paśyāma harestavāsyaṃ kadā vayaṃ kṛta kṛtyā bhavāmaḥ /
bhoḥ keśavādyaiva padāravindaṃ saṃdarśayitvā sudayāṃ kuruṣva

brahmāṇamāhuśca purāṇamāhuḥ kaśabdavācyaṃ sarvalokeśamāhuḥ /
īśaṃ cārhaṃ rudramityeva cāhustatprerakaṃ sṛṣṭisaṃhārakārye

ato hariḥ keśavanāmadheyo bhoḥ keśaveti ca nartayantaḥ /
ānandavāpīṃ saṃstravantobhi jagmurnārāyaṇeti pravadanto hi jagmuḥ

ato doṣāstadviruddhā guṇāśca nārāśca teṣāmāśrayatvānmurāriḥ /
nārāyaṇeti pravadantīha loke nārānubandhātsarvamuktāḥ khagendra

nārāḥ proktā āśrayatvācca teṣāmatopi nārāyaṇa eva vīndra /
muktāśca ye tu prapadaṃnu jagmuraṇḍodakaṃ yasya kaṭākṣamātrāt

yadutpannaṃ tena nārāḥ khagendra teṣāṃ sadāpyāśrayatvācca vīndra /
nārāyaṇeti pravadantīha loke hyanantabrahmāṇḍavisarjakatvāt

evaṃ nanṛtuḥ pariśaṃsayanto govinda nānyo hi na caiva darśanam /
gośabdavācyāstu samastavāco gobhiśca sarvaiḥ pratipādyate yataḥ

ato hi govinda iti smṛtaḥ sadā bho vedavedyeti tathā na nanṛtuḥ /
ānandabāṣpaiśca samanvitā hi hare murāre tava darśanaṃ hi

dehi prabho vai tavadāsadāsāścaturdaśe bhuvane sarvadāpi /
yatastvamevaṃ vasatīti vāsuścātraiva nityaṃ krīḍate sarvadaiva

yato devetyevamāhurmahāntastvato hariṃ vāsudeveti cāhuḥ /
bho vāsudeveti nanṛtuḥ sarvadaiva bho mādhaveti nanṛtuścaiva sarve

lakṣmīpate ceti vadanti sarve dhanīti śabdaḥ svābhivācī yato hi /
atopyāryā mādhaveti bruvanti lakṣmīpate pāhi tathaiva bhaktān

te vai bruvanto nanṛtuśca jagmurviṣṇo sadāsmānparipāhi nityam /
sarvatra yasmādvitatosi tasmādityādināmāni gṛṇanta eva /
jagmuśca sarve dadṛśuśca tīrthaṃ bhaktyopetāḥ śrīnivāsaṃ smarantaḥ

kanyovāca /
kiṃ nāmakaṃ tīrthamidaṃ munīndra kiṃ kāryamatra pravadāsmānkṛtīśa /
kasmai prasanno bhagavāñchrīnivāsastvasminsutīrthaṃ vada vistareṇa

jaigīṣavya uvāca /
kanye śṛṇu tvaṃ hyabhavatsubuddhimānprahrādasaṃjño haribhaktavaryaḥ /
niṣkāmabuddhyā tu yadā jagāma śeṣācalasthaṃ śrīnivāsaṃ ca draṣṭum

asmiṃsthale daityakumārakānprati hareśca tattvaṃ paripṛṣṭavānprabhuḥ /
nṛsiṃharūpaṃ śrīnivāsaṃ bhajasva sudurlabhaṃ mānuṣaṃ janma kanye

tatrāpi viṣṇornṛhare sutattvaṃ sudurlabhaṃ suṣṭhu yātrā tathaiva /
yasyāṃ yātrāyāṃ yatra kutrāpi deśe hareḥ kathā vartate daityavaryāḥ

tatra sthale harirāste sadaiva yato vyāptaḥ sarvato vai nṛsiṃhaḥ /
etacchrutvā daityakumārakāste prahlādamūcurbhaktavaryaṃ hareśca

vyāpto hariścetkathamatra vai sakhe na dṛśyate jalarūpī nṛsiṃhaḥ /
sa evamukto dānavānāṃ sutaiśca tuṣṭāva viṣṇuṃ paramādareṇa

tava svarūpaṃ mama darśayasva svayogyarūpaṃ dānavānāṃ sutānām /
iti stutaḥ śrīnivāso haristu tasminnantarjalarūpaṃ samāyāt

asminsnānaṃ ye prakurvanti tīrthe teṣāṃ jñānaṃ paramaṃ dṛḍhaṃ syāt /
atra snāne mānuṣāṇāṃ ca tāta buddhirna hi syātkalikāle viśeṣāt

dattvāṃ varaṃ daityavarāya viṣṇurantardadhe jalapūrṇe sukuṇḍe /
adyāpyāste jalamadhye nṛsiṃhaḥ prahlādopi daityakumārakaiḥ saha

tasmin sutīrthe paritastatratatra jayeti śabdaḥ śrūyate cāparāhne /
idaṃ tīrthaṃ nārasiṃhābhidhaṃ ca kanyesnānaṃ hyatra kāryaṃ manuṣyaiḥ

snānaṃ kṛtvā tatra tīrthe ca samyagdīpaṃ dattvā dvijavaryāya mukhyam /
draṣṭuṃ punaḥ śrīnivāsaṃ prajagmurgovindagovinda iti bruvantaḥ

mukhyaprāṇādhiṣṭhitaṃ sthānamāpya apāviśattatra devī hyuvāca /
jaigīṣavyaḥ śrīnivāsasya viṣṇoḥ kathaṃ kāryaṃ darśanaṃ tadvadasva

jaigīṣavyaḥ prāha saṃhṛṣṭacitto bravīmi tantraṃ śṛṇu kanyake tvam /
śrutvā mattaḥ kuru sarvaṃ mayoktamādyaṃ dvāraṃ śrīnivāsasya dṛṣṭvā

aparādhasahasrāṇi kriyante 'harniśaṃ mayā /
tāni sarvāṇi me deva kṣamasva puruṣottama

mānasānvācikāndoṣānkāyi kānapi sarvaśaḥ /
vaiṣṇavadveṣahetūnme bhasmasātkuru mādhava

ādyadvāraṃ śrīnivāsasya devi samyak smaredvijayaṃ vai jayaṃ ca /
dakṣādhvare śrīnivāsasya devi caṇḍaṃ pracaṇḍaṃ saṃsmaretsamyageva

pāścātyabhāge śrīnivāsasya devi nandaṃ sunandaṃ saṃsmaredeva bhaktyā /
savyadvāre śrīnivāsasya kanye smaretkumudākṣaṃ kumudantameva

yaścaiva dehaṃ praviśedbhaktipūrvaṃ kadā drakṣye sādareṇaiva devi /
pradakṣiṇadvādaśakaṃ ca kṛtvā pade pade saṃsmarecchrīnivāsam

śrīsvāmitīrthe samyagācamya natvā snātvā natvā bhūvarāhaṃ ca devi /
ayudvāraṃ privaśedbhaktipṛrvaṃ govindagovinda itibruvanvai

paścāddharernamanaṃ kāryameva sāṣṭāṅgarūpaṃ praviśeddevageham /
punarviśedvārataḥ saṃsthitaḥ sa pīṭhasthadevānmānasā cintayīta

madhye pīṭhaṃ śrīnivāsaṃ ca devī nārāyaṇaṃ praṇametpūrṇameva /
devasya savye pīṭhabhāgādvahiśca namaskāryaṃ gurudevāya caiva

pīṭhasyāgrāccāpyadhastātpradeśe āgneyakoṇe praṇamedvai khagendra /
nairṛtyabhāge vyāsadevāya devi namaskāryo vaiṣṇavaḥ sarvadāpi

vāyavyakoṇe bhaktipūrvaṃ sudurgāṃ namaskuryādbhaktisaṃvardhitātmā /
pīṭhasyordhvaṃ hyagnikoṇeṣu devī dharmādhibhūtāya namo yamāya

pīṭhasyordhvaṃ nairṛtasyordhvakoṇe jñānādhipaṃ praṇamedvāyudevam /
pīṭhasyordhvaṃ vāyukoṇe ca subhrūrvairāgyānāmadhipaṃ caiva rudram

pīṭhasyordhvaṃ tvīśakoṇe ca devi aiśvaryāṇāmadhipaṃ cendradevam /
pīṭhasya pūrve praṇamennairṛtiṃ ca aryāmṇānāmadhipaṃ cātra devi

devasya pīṭhasya ca dakṣiṇe ca durgāṃ namedugrarūpābhidhāṃ ca /
pīṭhasya kanye praṇametpaścime vai ārogyāṇā madhipaṃ kāmadevam

devasya pīṭhasyottare rudradevamanaiśvaryāṇāmadhipaṃ saṃsmarecca /
pīṭhasya madhye praṇamedvai varāhaṃ sadā kanye paramaṃ pūruṣākhyam

tasyopariṣṭācchaktisaṃjñāṃ ca lakṣmīmādhārarūpāṃ praṇameccaiva nityam /
tasyopariṣṭādvāyukūrmau namecca tasyopariṣṭāccheṣakūrmau namecca

tasyopariṣṭādabhimāninīṃ bhuvo bhūdevatāṃ praṇameccaiva subhrūḥ /
tasyopariṣṭādvaruṇaṃ saṃsmarecca kṣīrodadheradhipaṃ caiva devam

tasyopariṣṭātpraṇameccaiva lakṣmīṃ śvetadvīpākhyaṃ kanyake pūjayecca /
tasyopariṣṭātpraṇameccaiva lakṣmīṃ mahādivyāṃ maṇḍapasaṃjñakāṃ ca

pīṭhasya madhye yamasaṃjñāṃ ca lakṣmīṃ samarcayedyamamadhye ca devīm /
yamasya devasya ca dakṣiṇe ca sūryaṃ nameddīparūpaṃ ca bhadre

yamasya devasya ca vāmabhāge śriyaṃ nameddīparūpāṃ ca devīm /
yamasya devasya tu cāgrabhāge hutāśanaṃ dīparūpaṃ namecca

devasyāgre bhūmināmnīṃ namecca tattvābhimānāṃ saṃsmareccaiva nityam /
paryaṅkarūpaṃ śrīnivāsasya viṣṇostamobhimānāṃ sannameccaiva durgām

pūrvādigaṃ pīṭhasopānarūpamātmānamekaṃ praṇamecca devi /
dakṣasthadikpīṭhasopānarūpaṃ jñānātmakaṃ praṇameccaiva kanye

padmasya pūrvasthadale ca devi strīrūpākhyaṃ vimalākhyāmimāṃ ca /
brahmādidevānpraṇamecca devi āgneyakoṇasthadale śṛṇutvam

utkarṣanāmnīṃ paramāṃ ca devīṃ namedramāṃ brahmavāyū ca śeṣam /
dakṣasthapadmasya dalāṣṭake ca nārāyaṇākāraśeṣādikānām

strīrūpebhyo namanaṃ kāryameva kanye mayā paścimasthe dale ca /
gopākhyanārāyaṇabrahmavāyuviprādikānāṃ śeṣarūdrādikānām

strīrūpebhyo namanaṃ kāryameva īśāna koṇasthadaleṣu caiva /
īśānanārāyaṇamāviriñcavāyurviyaccheṣasurādikānām

strīrūpebhyo namanaṃ kāryameva tathaiva padmasya ca madhyabhāge /
anugrahākhyā viṣṇulakṣmīśca devī vāyurviyaccheṣarudrādikānām

strīrūpāṇāṃ namanaṃ kāryameva suyogapīṭhasya svarūpa bhūtam /
sadā namecchrīmadanantasaṃjñamevaṃ na mecchrīnivāsaṃ ca devam

śrīnivāsasya vāme tu lakṣmīṃ ca praṇamedvudhaḥ /
śrīnivāsasya savye tu dharāyai praṇamecchubhe

pīṭhādvahiḥ pūrvabhāge kṛpolkaṃ praṇamecchubham /
maholkaṃ dakṣiṇe caiva vīrolkaṃ paścime namet

uttare ca namaḥ kuryādyulkāya ca mahātmane /
caturṣvapi ca koṇeṣu sahasrolkaṃ nametsudhīḥ

pūrve tu vāsudevāya namaskuryācca dakṣiṇe /
saṃkarṣaṇāya devāya pradyumnāya ca paścime

uttare hyaniruddhyā namaskuryādatandritaḥ /
āgneye ca namaskuryātkanye māyāṃ sadā śubhe

jayāyai ca namaskuryānnairṛtye cāpi vāyave /
kṛtye caiva namaskuryādīśānye śāntisaṃjñakām

keśavāya namaḥ pūrve tathā nārāyaṇāya ca /
mādhavāya namaskuryānnairṛtye cāpi vāyave

āgneye kanyake nityaṃ bhaktyā tu prayataḥ śubhe /
govindāya namaskuryāddakṣiṇe viṣṇave tathā

madhusūdanāya bhoḥ kanye namaskuryāttu nairṛtau /
paścime trivikramāya vāmanāya tathaiva ca

viṣṇave śrīdharāyātha namaskuryācca bhāmiti /
uttare tu mahākanye hṛṣīkeśāya vai namaḥ

tathā vai padmanābhāya namaskuryādatandritaḥ /
dāmodarāya caiśānye namaskuryācca bhāmini

caturthāvaraṇe pūrve mahākūrmāya vai namaḥ /
varāhāya namaskuryādāgneye kanyake śubhe

dakṣiṇe nārasiṃhāya vāmanāya namonamaḥ /
bhārgavāya namaskuryānnairṛtye śuddhacetasā

paścime mādhavāyātha tathā kṛṣṇāya vai namaḥ /
buddhāya ca namaskuryādvāyavye kanyake śubhe

uttare hyulkarūpāya anantāya namostu te /
īśānye viśvarūpāya namaskuryādatandritaḥ

āgneye vāruṇīṃ caiva gāyatrīṃ caiva nairṛte /
vāyavye bhāratīṃ caiva īśānye girijāṃ namet

girijāṃ vāmabhāge tu sauparṇai caiva saṃnamet /
prāgindrāya namaskuryātsāyudhāya tathaiva ca

sa parigrahāya śrīviṣṇoḥ pārṣadāya namonamaḥ /
āgneyetyagnaye tubhyaṃ sāyudhāyeti pūrvavat

dakṣiṇe tu yamāyaiva nairṛtyāṃ nirṛtiṃ yajet /
paścime varuṇāyaiva vāyavye vāyave namaḥ

uttare ca kuberāya īśānye ca śivāya ca /
īśānaśakrayormadhye brahmaṇe sāyudhāya ca

nirṛtyapyatimadhye tu śeṣāya ca namonamaḥ /
evaṃ kṛtvā namaskāraṃ praṇamecca punaḥ punaḥ

ityetatsarvamākhyātaṃ vidhipūrvaṃ tu darśanam /
itaḥ parantu gantavyaṃ darśanārthaṃ ramāpate

evamuktvā tu sā devī taiḥ sārdhaṃ tu yayau mudā /
yaduktaḥ śrīnivāsasya darśanasya vidhiḥ khaga /
kasyacinnaiva vaktavyo gopyatvācca kadācana

samāgamo durghaṭa eva vīndra satāṃ ca sattattvavibodhakānām /
anekajanmārjitapuṇyasaṃcayādabhūdguroḥ saṃgama eva tasya

payo vikāraṃ ca nijaṃ jahāti śeṣasya śeṣaṃ nalinasya ṣaṅkajam /
bhāvaṃ calaṃ paṅkajanābhayogātsatsaṃgayogādaśubhāni na syuḥ