Garuda Purana · Chapter 2.47

iti śrīgāruḍe mahāpurāṇe uttarakhaṇḍe dvitīyāṃśe dharmakāṇḍe pretakalpe jīvasya śubhāśubhagatinirūpaṇaṃ nāma ṣaṭcatvāriṃśodhyāyaḥ
śrīgaruḍamahāpurāṇam- 47
garuḍa uvāca /
bhagavandevadeveśa kṛpayā parayā vada /
dānaṃ dānasya māhātmyaṃ vaitaraṇyāḥ pramāṇakam

śrīkṛṣṇa uvāca /
yā sā vaitaraṇī nāma yamamārge mahāsarit /
agādhā dustarā pāpairdṛṣṭamātrā bhayāvahā

pūyaśoṇitatoyāḍhyā māṃsakardamasakuṃlā /
pāpinañcāgatāndṛṣṭvā nānābhayasamāvṛtā

kvāthyate satvaraṃ toyaṃ pātramadhye ghṛtaṃ yathā /
krimibhiḥ saṅkulaṃ pūyaṃ vajratuṇḍaiḥ samāvṛtam

śiśumāraiśca makarairvajrakartarikāyutaiḥ /
anyaiśca jalajīvaiśca hiṃsakairmāṃsabhedibhiḥ

udyānti dvādaśādityāḥ pralayānte tathā hi te /
tapanti tatra vai martyāḥ kranda mānāstu pāpinaḥ

hā bhrātaḥ putra tāteti pralapanti muhurmuhuḥ /
vicaranti nimajjanti glāniṃ gacchanti jantavaḥ

caturvidhaiḥ prāṇigaṇairdṛṣṭā vyāptā mahānadī /
taranti gopradānena tvanyathā ca patanti te

māṃ narā ye 'vamanyante cācāryaṃ gurumeva ca /
vṛddhānanyāṃścāpi mūḍhāsteṣāṃ vāsastu tatra vai

pativratāṃ sādhuśīlāmūḍhāṃ dharmeṣu niścalām /
parityajanti ye mūḍhāsteṣāṃ vāsastu santatam

viśvāsapratipannānāṃ svāmimitratapasvinām /
strībālavikalādīnāṃ vadhaṃ kṛtvā patanti hi /
pacyante tatra madhye tu krandamānāstu pāpinaḥ

śāntaṃ bubhukṣitaṃ vipraṃyo vighnāyopasarpati /
krimibhirbhakṣyate tatra yāvadābhūtasaṃplavam

brāhmaṇāya pratīśrutya yamārthaṃ na dadāti tam /
āhūya nāsti yo brūyāttasya vāsastu tatra vai

agnido garadaścaiva kūṭasākṣī ca madyapaḥ /
yajñavidhvaṃsakaścaiva rājñīgāmī ca paiśunaḥ

kathābhaṅgakaraścaiva svayandattā pahārakaḥ /
kṣetrasetuvibhedī ca paradārapradharṣakaḥ

brāhmaṇo rasavikretā tathā yo vṛṣalīpatiḥ /
godhanasya tṛṣārtasya vāpyā bhedaṃ karoti yaḥ

kanyāvidūṣakaścaiva dānaṃ dattvānutāpakaḥ /
śūbadrastu kapilāpāyī brāhmaṇo māṃsabhojanaḥ

ete vasanti satataṃ mā vicāraṃ kṛthāḥ kvacit /
kṛpaṇo nāstikaḥ kṣudraḥ sa tasyāṃ nivasetkhaga

sadāmarṣo sadā krodhī nijavākyapramāṇakṛt /
paroktyucchedako nityaṃ vaitaraṇyā vasecciram

yastvahaṅkāravānpāpī svavikatthanakārakaḥ /
kṛtaghno garbhasantāpī vaitaraṇyāṃ sa majjati

kadāpi bhāgyayogena taraṇecchā bhavedyadi /
sānukūlā bhavedyena tadākarṇaya kāśyapa

ayane viṣuve puṇye vyatīpāte dinodaye /
candrasūryoparāge vā saṃkrāntau darśavāsare

anyeṣu puṇyakāleṣu dīyate dānamuttamam /
yadā tadā bhavedvāpi śrāddhā dānaṃ prati dhruvam

tadaiba dānakālaḥ syādyataḥ sampattirasthirā /
anityāni śarīrāṇi vibhavo naiva śāśvataḥ

nityaṃ sannihito mṛtyuḥ kartavyo dharmasaṃgahaḥ /
kṛṣṇāṃ vā pāṭalāṃ vāpi kuryādvaitaraṇīṃ śubhām

svarṇaśṛṅgīṃ raupyakhurāṃ kāṃsyapātropadohanīm /
kṛṣṇavastrayugācchannāṃ saptadhānyasamanvitām

kārpāsadroṇaśikhare āsīnaṃ tāmrabhājane /
yamaṃ haimaṃ prakurvīta lohadaṇḍasamanvitam /
ikṣudaṇḍamayaṃ baddhvā plavaṃ sudṛḍhabandhanaiḥ

uḍupopari tāṃ dhenuṃ sūryadehasamudbhavām /
kṛtvā prakalpayedvipraśchatropānahasaṃyutam

aṅgulīyakavāsāṃsi brāhmaṇāya nivedayet /
imamuccārayenmantraṃ saṃgṛhya sajalānkuśān

yamadvāre mahāghore śrutvā vaitaraṇīṃ tadīm /
tartukāmo dadāmyenāṃ tubhyaṃ vaitaraṇīṃ namaḥ

gāvo me agrataḥ santu gāvo me santu pārśvataḥ /
gāvo me hṛdaye santu gavāṃ madhye vasāmyaham

viṣṇurūpa dvijaśreṣṭha māmuddhara mahīsura /
sadakṣiṇā mayā dattā tubhyaṃ vaitaraṇīnamaḥ

dharmarājañca sarveśaṃ vaitaraṇyākhyadhenukām /
sarvaṃ pradakṣiṇīkṛtya brāhmaṇāya nivedayet

pucchaṃ saṃgṛhya dhenvāśca agre kṛtvā tu vai vdijam /
dhenuke tvaṃ pratīkṣasva yamadvāre mahābhaye

uttāraṇāya deveśi vaitaraṇye namo 'stu te /
anuvrajettu gacchantaṃ sarvaṃ tasya gṛhaṃ nayet

evaṃ kṛte vainateya sā saritsutarā bhavet /
sarvānkāmānavāpnoti yo dadyādbhuvi mānavaḥ

sukṛtasya prabhāveṇa sukhañceha paratra ca /
svasthe sahasraguṇitamāture śatasaṃmitam

mṛtasyaiva tu yaddānaṃ parokṣe tatsamaṃ smṛtam /
svahastena tato deyaṃ mṛte kaḥ kasya dāsyatī

dānadharmavihīnānāṃ kṛpaṇairjīvetakṣitaiḥ /
asthireṇa śarīreṇa sthiraṃ karma samācaret

avaśyameva yāsyanti prāṇāḥ prāghuṇi (ghūrṇi) kā iva

itīdamuktaṃ tava pakṣirāja viḍambanaṃ jantugaṇasya sarvam /
pretasya mokṣāya tadauddhvandaihikaṃ hitāya lokasya carecchubhāya tu

sūta uvāca /
evaṃ viprāḥ samāddiṣṭo viṣṇunā prabhaviṣṇunā /
garuḍa pretacaritaṃ śrutvā santuṣṭimāgataḥ

vratatīrthādikaṃ sarvaṃ punaḥ papraccha keśavam /
dhyātvā manasi sarveśaṃ sarvakāraṇakāraṇam

ṛṣayaḥ sarvamevaitajjantūnāṃ prabhavādikam /
maraṇaṃ janma ca tathā pretatvañcaurdhvadaihikam

mayā proktaṃ vai muktyai nidānaṃ caiva sarvaśaḥ /
lābhasteṣāṃ jayasteṣāṃ kutasteṣāṃ parājayaḥ /
yeṣāmindīvaraśyāmo hṛdayastho janārdanaḥ

dharmo jayati nādharmaḥ satyaṃ jayati nānṛtam /
kṣamā jayati na krodho viṣṇurjayati nāsurāḥ

viṣṇurmātā pitā viṣṇurviṣṇuḥ svajanabāndhavāḥ /
yeṣāmeva sthirā buddhirna teṣāṃ durgatirbhavet

maṅgalaṃ bhagavānviṣṇurmaṅgalaṃ garuḍadhvajaḥ /
maṅgalaṃ puṇḍarīkākṣo maṅgalāyatanaṃ hariḥ

harirbhāgīrathī viprā viprā bhāgīrathī hariḥ /
bhāgīrathī harirviprāḥ sārametajjagattraye

iti sūtamukhodgīrṇāṃ sarvaśāstrārthamaṇḍitām /
vaiṣṇaviṃ vāksudhāṃ pītvā ṛṣayastuṣṭimāyayuḥ

praśaśaṃsustathānyonyaṃ sūtaṃ sarvārthadarśinam /
praharṣamatulaṃ prāpurmunayaḥ śaunakādayaḥ

apavitraḥ pavitro vā sarvāvasthāṃ gatopi vā /
yaḥ smaretpuṇḍarīkākṣaṃ sa bāhyābhyantaraṃ śuciḥ