Garuda Purana · Chapter 2.46

iti śrīgāruḍe mahāpurāṇe uttarakhaṇḍe dvitīyāṃśe dharmakāṇḍe pretakalpe śrīkṛṣṇagaruḍasaṃvāde pratyābdikādiśrāddhanirūpaṇaṃ nāma pañcacatvāriṃśo 'dhyāyaḥ
śrīgaruḍamahāpurāṇam- 46
tārkṣya uvāca /
sukṛtasya prabhāveṇa svargo nānāvidho naṇām /
bhogāḥ saukhyāti rūpañca balaṃ buddhaiḥ parākramaḥ

satyaṃ puṇyavatāṃ deva jāyate 'tra paratra ca /
satyaṃsatyaṃ punaḥ satyaṃ vedavākyaṃ na cānyathā

dharmo jayati nādharmaḥ satyaṃ jayāte nānṛtam /
kṣamā jayati na krodho viṣṇurjayati nāsuraḥ

tadvatsatyaṃ mayā jñātaṃ sukṛtācchobhanaṃ bhavet /
yatotkṛṣṭatamaṃ puṇyaṃ tathotkṛṣṭataronaraḥ

evantu śrotumicchāmi jāyante pāpino yathā /
yena karmavipākena yathā niyamabhāgbhavet

yāṃyāṃ yonimavāpnoti yathārūpaśca jāyate /
tanme vada suraśreṣṭha samāsenāpi kāṅkṣitam

śrīkṛṣṇa uvāca /
śubhāśubhaphalaistārkṣya bhuktabhogā narāstviha /
jāyante lakṣaṇairyaistutāni me śṛṇu kāśyapa

gururātmavatāṃ śāstā rājā śāstā durātmanām /
iha pracchannapāpānāṃ śāstā vaivasvato yamaḥ

prāyaścitteṣvacīrṇeṣu yamalokā hyanekadhā /
yātanābhirvimuktā ye yānti te jīvasantatīm

gatvā mānuṣabhāve tu pāpacihnā bhavanti te /
tānyahaṃ tava cihnāni kathayiṣye khagottama

soḍhvā vai yātanāḥ sarvā gatvā vaivasvatakṣayam /
nistīrṇayātanāste tu lokamāyānti cihnitāḥ

gadgado 'natavādī syānmūkaścaiva gavānṛte /
brahmahā jāyate kuṣṭhī śyāvadantaśca madyapaḥ

kunakhī svarṇaharaṇādduścarmā gurutalpagaḥ /
saṃyogī hīnayoniḥ syāddaridro 'dattadānataḥ

ayājyayājako yāti grāhamasūkaratāṃ dvijaḥ /
kharo vai bahuyājī syātkāko nirmantrabhojanāt

aparīkṣitabhoktāro vyāghrāḥ syurnirjane vane /
bahutarjako mārjaraḥ khadyotaḥ kakṣadāhakaḥ

pātre vidyāpradātā yo balīvardo bhavettasaḥ /
annaṃ paryuṣitaṃ vipre pradadatkukkaro bhavet

mātsaryādapi jātyandho janmāndhaḥ pustakaṃ haran /
phalānyāharato 'patyaṃ mriyate nātra saṃśayaḥ

mṛto vānaratāṃ yāti tanmukho gaṇḍavān bhavet /
adattvā bhakṣyamaśrāti anapatyo bhavettu saḥ

haranvastraṃ bhavedgodhā garadaḥ pavanāśanaḥ /
pravajyāgamanādrājan bhavenmarupiśācakaḥ

cātako jalahartā syāddhānyahartā ca mūṣikaḥ /
aprāptayauvanāṃ sevan bhavetsarpa iti śrutiḥ

gurudārābhilāṣī ca kṛkalāso bhaveddhruvam /
jalaprastravaṇaṃ yastu bhindyānmatsyo bhavennaraḥ

avikreyakrayāccaiva bako gṛdhro bhavennaraḥ /
ayonigo vṛko hi syādulūkaḥ krayavañcanāt

mṛtasyaikādaśāhe tu bhuñjānaścābhijāyate /
pratiśrutya dvijebhyor'thamadadajjambuko bhavet

rājñariṃ gatvā bhaveddaṃṣṭrī taskaro viṅvarāhakaḥ /
śārivā phalavikretā vṛṣaśca vṛṣalīpatiḥ

mārjaro 'gniṃ padā spṛṣṭvā rogavānparamāṃsabhuk /
udakyāgamanātṣaṇḍo durgandhaśca sugandhahṛt

yadvā tadvāpi pārakyaṃ svalpaṃ vā harate bahu /
hṛtvā vai yonimāpnoti tiraścāṃ nātra saṃśayaḥ

evamādīni cihnāni anyānyapi khageśvara /
svakarmavitatānyeva? dṛśyante yaistu mānavaiḥ

evaṃ duṣkṛtakarmā hi bhuktvā ca narakānkramāt /
jāyate karmaśeṣeṇa uktāsvetāsu yoniṣu

tato janmaśataṃ martye sarvajantuṣu kāśyapa /
jāyate nātra sandehaḥ samībhūte śubhāśubhe

strīpuṃsayo prasaṅgena niruddhe śukrasoṇite /
samupetaḥ pañcabhūtairjāyate pāñcabhautikaḥ

indriyāṇi manaḥ prāṇā jñānamāyuḥ sukhaṃ dhṛtiḥ /
dhāraṇā preraṇaṃ duḥ khaṃ mithyāhaṅkāra eva ca

prayatākṛtivarṇastu rāgadveṣau bhavābhavau /
tasyedamātmanaḥ sarvamanāderādimicchataḥ

svakarma baddhasya tadā garbhavṛddhirbhavediti /
purā yathā mayā proktaṃ tava jantorhi lakṣaṇam

evaṃ pravartitaṃ cakraṃ bhūtagrāme caturvidhe /
samutpattirvināśaśca jāyate tārkṣya dehinām

svadharmeṇaivordhvagatiradharmeṇāpyadhogatiḥ /
jāyate sarvavarṇānāṃ svadharmacalanāt khaga

devatve mānuṣatve ca dānabhogādikāḥ kriyāḥ /
yā dṛśyante vainateya tatsarvaṃ karmajaṃ phalam

akarmavihite ghore kāmakrodhārjite 'śubhe /
patedvai narake bhūyo tasyottāro na vidyate