Scripture Library

Garuda Purana · Chapter 2.38

2.38.1

iti śrīgāruḍe mahāpurāṇe dvitīyāṃśe pretakalpe dharmakāṇḍe sodakumbhaśrāddhanirūpaṇaṃ nāma saptatriṃśo 'dhyāyaḥ
śrīgaruḍamahāpurāṇam- 38
tārkṣya uvāca /
dānatīrthārthitaṃ mokṣaṃ svargañca vada me prabho /
kena mokṣamavāpnoti kena svarge vasecciram

2.38.2

kena gacchati tejastu svarlokāt satyalokataḥ /
mānuṣyaṃ kena labhate narakeśu nimajjati

2.38.3

etanme vadaniścitya bhaktānāṃ mokṣadāyaka /
brūhi kasmin mṛte svarge punarjanma na vidyate

2.38.4

śrīviṣṇuruvāca /
mānuṣyaṃ bhārate varṣe trayodaśasu jātiṣu

2.38.5

tat prāpya mriyate kṣetre punarjanma na vidyate /
ayodhyā mathurā māyā kāśī kāñcī avantikā

2.38.6

purī dvāravatī jñeyā saptaitā mokṣadāyikāḥ /
sannyastamiti yo bruyāt prāṇaiḥ kaṇṭhagatairapi

2.38.7

mṛto viṣṇupuraṃ yāti na punarjāyate kṣitau /
sakṛduccaritaṃ yena harirityakṣaradvayam

2.38.8

baddhaḥ parikarastena mokṣāya gamanaṃ prati /
kṛṣṇakṛṣṇeti kṛṣṇeti yo māṃ smarati nityaśaḥ

2.38.9

jala bhittvā yathā padmaṃ narakāduddharāmyaham /
śālagrāmajilā yatra yatra dvāravatī śilā

2.38.10

ubhayoḥ saṅgamo yatra muktistatra na saṃśayaḥ /
śālagrāmaśilā yatra pāpadoṣakṣayāvahā

2.38.11

tatsannidhānamaraṇānmuktirjantoḥ suniścatā /
ropaṇāt pālanāt sekāddhyānasparśanakīrtanāt /
tulasī dahate pāpaṃ nṛṇāṃ janmārjitaṃ khaga

2.38.12

jñānahṛde satyajale rāgadveṣamalāpahe /
yaḥ snāto mānase tīrthe na sa lipyeta pātakaiḥ

2.38.13

na kāṣṭhe vidyate devo na śilāyāṃ kadācana /
bhāve hi vidyate devastasmādbhāvaṃ samācaret

2.38.14

prātaḥ prātaḥ prapaśyanti narmadāṃ matsyaghātinaḥ /
na te śivapurīṃ yānti cittavṛttirgarīyasī

2.38.15

yādṛk cittapratītiḥ syāt tādṛk karmaphalaṃ nṛṇām /
paralokagatistādṛka sūcīsūtravicāravat

2.38.16

brāhmaṇārthe gavārthe ca strīṇāṃ balavadheṣu ca /
prāṇatyāgaparo yastu sa vai mokṣamavāpnuyāt

2.38.17

anāśake mṛtau yastu sa vai mokṣamavāpnuyāt /
anāśake mṛto yastu sa muktaḥ sarvabandhanaiḥ

2.38.18

dattvā dānāni viprebhyastato mokṣamavāpnuyāt /
ete vai mokṣamārgāśca svargamārgāstathaiva ca

2.38.19

gograhe deśavidhvaṃse maraṇaṃ raṇatīrthayoḥ /
uttamādhamamadhyasya bādhyamānasya dehinaḥ /
ātmānaṃ tatra santyajya svargavāsaṃ labhecciram

2.38.20

jīvitaṃ maraṇañcaiva dvayaṃ śikṣeta paṇḍitaḥ /
jīvitaṃ dānabhogābhyāṃ maraṇaṃ raṇatīrthayoḥ

2.38.21

harikṣetre kurukṣetre bhṛgukṣetre tathaiva ca /
prabhāse śrīsthale caiva arbude ca tripuṣkare

2.38.22

bhūteśvare mṛto yastu svarge vasati mānavaḥ /
brahmaṇo divasaṃ yāvat tataḥ patati bhūtale

2.38.23

varṣavṛttintu yo dadyādbrāhmaṇe doṣavarjite /
sarvaṃ kalaṃ sa muddhṛtya svargaloke mahīyate

2.38.24

kanyāṃ vivāhayedyastu brāhmaṇaṃ vedapāragam /
indraloke vaset so 'pi svakulaiḥ pariveṣṭitaḥ

2.38.25

mahādānāni datvā ca narastatphalamāmuyāt

2.38.26

vāpī kūpataḍāgānāmārāmasurasadmanām /
jīrṇoddhāraṃ prakurvāṇaḥ pūrvakartuḥ phalaṃ labhet /
jīrṇoddhāreṇa vā teṣāṃ tat puṇyaṃ dviguṇaṃ bhavet

2.38.27

śītavā tātapaharamapi parṇakuṭīrakam /
kṛtvā viprāya viduṣe pradadāti kuṭumbine

2.38.28

tisraḥ koṭyordhakoṭī ca naraḥ svarge mahīyate

2.38.29

yā strī savarṇā saṃśubā mṛtaṃ patimanuvrajet /
sā mṛtā svargamāpnoti varṣāṇāṃ romasaṃkhyatā

2.38.30

putrapautrādikaṃ tyaktvā svapatiṃ yānugacchati /
svargaṃ labhetāṃ tau cobhau divyastrībhiralaṅkṛtau

2.38.31

kṛtvā pāpānyanekāni bhartṛdrohamatiḥ sadā /
prakṣālayati sarvāṇi yā svaṃ patimanuvrajet

2.38.32

mahāpāpasamācāro bhartā cedduṣkṛtī bhavet /
tasyāpyanuvratā nārī nārāyet sarvakilbiṣam

2.38.33

grāsamātraṃ niyamato nityadānaṃ karoti yaḥ /
catuścāmarasaṃyuktavimānenādhigacchati

2.38.34

yat kṛtaṃ hi manuṣyeṇa pāpamāmaraṇāntikam /
tat sarvaṃ nāśamāyāti varṣavṛttipradānataḥ

2.38.35

bhūtaṃ bhavyaṃ baviṣyañca pāpaṃ janmatrayārjitam /
pakṣālayati tat sarvaṃ viprakanyopanāyanāt

2.38.36

daśakūpasamā vāpi daśavāpīsamaṃ saraḥ /
saro bhirdaśabhistulyā yā prapā nirjale vane

2.38.37

yā vāpī nirjale deśe yaddānaṃ nirdhane dvije /
prāṇināṃ yo dayāṃ dhatte sa bhavennākanāyakaḥ

2.38.38

evamādibhiranyaiśca sukṛtaiḥ svargabhāgbhavet /
sa tat sarvaṃ phalaṃ prāpya pratiṣṭhāṃ paramāṃ labhet

2.38.39

phalgu kāryaṃ parityajya satataṃ dharmavān bhavet /
dānaṃ damo dayā ceti sārametat trayaṃ bhuvi

2.38.40

dānaṃ sādhordaridrasya śūnyaliṅgasya pūjanam /
anāthapretasaṃskāraḥ koṭiyajñaphalapradaḥ

Original text: Garuḍapurāṇa · Edition: Bombay : Venkatesvara Steam Press (or a reprint thereof) · Data entry members of the Sansknet Project · GRETIL (Göttingen) · CC BY-NC-SA 4.0