Garuda Purana · Chapter 2.36

(35.46)
iti śrīgāruḍe mahāpurāṇe uttarakhaṇḍe dvitīdṛ dhadṛpretakalpe śrīkṛṣṇagaruḍasaṃvāde sapiṇḍanaśavavidhyornirūpaṇaṃ nāma pañcatriṃśo 'dhyāyaḥ
śrīgaruḍamahāpurāṇam- 36
tārkṣyauvāca /
kasmādanaśanaṃ puṇyamakṣayyagatidāyakam /
svagṛhantu parityajya tīrthe vai mriyate yadi

aprāpya tīrthaṃ mriyate gṛhe vā mṛtyu māgataḥ /
būtvā kuṭīcaro yastu sa kāṃ gatimavāpnuyāt

saṃnyāsaṃ kurute yastu tīrthe vāpi gṛhe 'pi vā /
kathaṃ tasya prakartavyamaprāptanidhane 'pi vā

niyame cet kṛte deva cittabhaṅgo hi jāyate /
kena tasya bhavet siddhiḥ kṛtenāpyakṛtena vā

śrīkṛṣṇa uvāca /
kṛtvā niraśanaṃ yo vai mṛtyumāpnoti ko 'pi cet /
mānupīṃ tanumutsṛjya mama tulyo virājate

yāvantyahāni jīvet vrate niraśane kṛte /
kratubhistāni tulyāni samagravadakṣiṇaiḥ

tīrthe gṛhe vā saṃnyāsaṃ nītvā cenmriyate yadi /
pratyahaṃ labhate so 'pi pūrvoktaṃ dviguṇaṃ phalam

mahārogopapattau ca gṛhīte 'naśane kṛte /
punarna jāyate rogo devavaddhi virājate

ya āturaḥ san sannyāsaṃ gṛhṇāti yadi mānavaḥ /
punarna jāyate bhūmau saṃsāre duḥ khasāgare

ahanyahani dātavyaṃ brāhmaṇānāñca bhojanam /
tilapātraṃ yathāśakti dīpadānaṃ surārcanam

evaṃ vṛttasya dahyante pāpānyuccāvacāni ca /
mṛto muktimavāpnoti yathā sarve maharṣayaḥ

tasmādanaśanaṃ nṝṇāṃ vaikuṇṭhapadadāyakam /
tasmāt svasthe cottare vā sādhayenmokṣalakṣaṇam

puttradravyādi santyajya tīrthaṃ vrajati yo naraḥ /
brahmādyā devatāstasya bhaveyustuṣṭipuṣṭidāḥ

yastīrthasaṃmukho bhūtvā vrate hyanaśane kṛte /
cenmriyetāntarāle 'pi ṛṣīṇāṃ maṇḍale vaset

vrataṃ niraśana kṛtvā svagṛhe 'pi mṛto yadi /
svakulāni parityajya ekākī vicareddivi

annañcaiva tathā toyaṃ parityajya naro yadi /
pītamatpādatoyaśca na punarjāyate kṣitau

kṛttyāsīnantattīrthagataṃ rakṣanti vanadevatāḥ /
yamadūtā viśeṣeṇa na yāmyāstasya pārśvagāḥ

tīrthasevī naro yastu sarvakilbiṣavarjitaḥ /
tatra mriyate dahyeta tattīrthaphalabhāgbhavet

sevite 'pi sadā tathi hyanyatra mriyate yadi /
śubhe deśe kule dhīmān sa bhavedvedaviddvijaḥ

kṛtvā niraśanaṃ tārkṣya punarjīvati mānavaḥ /
brāhmaṇān sa samāhūya sarvasvaṃ yat parityajet

cāndrāyaṇaṃ caret kṛtsnamanujñātaśca tairdvijaiḥ /
anṛtaṃ na vadet paścāddharmameva samācaret

tīrthe gatvā ca yaḥ ko 'pi punarāyāti vai gṛham /
anujñātaḥ sa vai vipraiḥ prāyaścittamathācaret

dattvā vā svarṇadānāni go-mahī-gaja-vājinaḥ /
tīrthaṃ yadi labhed yastu mṛtyukāle sa bhāgyavān

gṛhāt pracalitastīrthaṃ maraṇe samupasthite /
padepade tu godānaṃ yadi hiṃsā na jāyate

gṛhe tu yat kṛtaṃ pāpaṃ tīrthasnānena śudhyati /
kurute tatra pāpañcedvajralepasamaṃ hi tat

kliśyet sa nātra sandeho yāvaccandrārkatārakam /
tatra dattāni dānāni jāyante cākṣayāṇi vai

āture sati dātavyaṃ nirdhanairapi mānavaiḥ /
gāvastilā hiraṇyañca saptadhānyaṃ viśeṣataḥ

dānavantaṃ naraṃ dṛṣṭvā hṛṣṭāḥ sarve divaukasaḥ /
ṛṣibhiḥ saha dharmaṇa citraguptena sarvadā

ātmāyattaṃ dhanaṃ yāvat tāvadvipre samarpayet /
parādhīnaṃ mṛte sarvaṃ kṛpayā kaḥ pradāsyati

pitruddeśena yaḥ puttrairdhanaṃ viprakare 'rpitam /
ātmānaṃ sadhanaṃ tena cakre putraprapautrakaiḥ

pituḥ śataguṇaṃ dattaṃ sahasraṃ māturucyate /
bhaginyā śatasāhasraṃ sodarye dattamakṣayam

yadi lobhānna yacchanti pramādānmohato 'pi vā /
mṛtāḥ śocanti te sarve kadaryāḥ pāpinastviti

atikleśena labdhasya prakṛtyā cañcalasya ca /
gatirekaiva vittasya dānamanyā vipattayaḥ

mṛtyuḥ śarīgoptāraṃ vasurakṣaṃ vasundharā /
duścāriṇīva hasati svapatiṃ putravatsalam

udāse dhārmikaḥ saumyaḥ prāpyāpi vipulaṃ dhanam /
tṛṇavanmanyate tārkṣya ātmānaṃ vittamapyatha

na caivopadravāstasya mohajālo na caiva hi /
mṛtyukāle na ca bhayaṃ yamadūtasamudbhavam

samāḥ sahasrāṇi ca sapta vai jale daśaikamagnau pavane ca ṣoḍaśa /
mahāhave paṣṭiraśītirgogṛhe anāśake kāśyapa cākṣayā gatiḥ