Garuda Purana · Chapter 2.35

iti śrīgāruḍe mahāpurāṇe uttarakhaṇḍe dvitīyāṃśe dharmakāṇḍe pretakalpe śrīkṛṣṇagaruḍasaṃvāde aurdhvadehikādinirūpaṇaṃ nāma catustriṃśo 'dhyāyaḥ
śrīgaruḍamahāpurāṇam- 35
tarkṣya uvāca /
aparaṃ mama sandehaṃ kathayasva janārdana /
puruṣasya ca kasyāpi matā pañcatvamāgatā

pitāmahī jīvati ca tathā ca prapitāmahī /
vṛddhaprapitāmahī tadvanmātṛsaktaḥ pitā tathā

pramātāmahaśca tathā vṛddhapramātāmahastathā /
kena sā melyate mātā etat kathaya me prabho

śrīkṛṣṇa uvāca /
punaruktaṃ pravakṣyāmi sapiṇḍīkaraṇaṃ khaga /
umā lakṣmīśca sāvitrītyatābhirmelayeddhruvam

trayaḥ piṇḍabhujo jñeyāstyajākāśca trayaḥ smṛtāḥ /
trayaḥ piṇḍānulepāśca daśamaḥ paṅktisaṃnnidhaḥ

ityete puruṣāḥ khyātāḥ pitṛmātṛkuleṣu ca /
tārayedyajamānastu daśa pūrvān daśāvarān

sapiṇḍaḥ sa bhavedādau sapiṇḍīkaraṇe kṛte /
antyastu tyājako jñeyo yo vṛddhaprapitāmahaḥ

antimastyājako jñeyo lepakaḥ prathamo bhavet /
lepakastvantimo yastu sa bhavet paṅktisannidhaḥ

yajamāno bhavedeko daśa pṛrtve daśāvare /
ityete pitaro jñeyā ekaviṃśati saṃkhyakāḥ

vidhinā kurute yastu saṃsāre śrāddhamuttamam /
jāyate 'tra na sandehaḥ śṛṇu tasyāpi yat phalam

pitā dadāti puttrān vai vicchinnasantatiḥ khaga /
homadātā bhavetsopi yastasya prapitāmahaḥ

kṛte śrāddhe guṇā hyete pitṝṇāṃ tapeṇe smṛtāḥ /
dadyādvipulamannādyaṃ vṛddhastu prapitāmahaḥ

yasya puṃsaśca martye vai vicchinnā santatiḥ khaga /
sa vasennarake ghore paṅke magnaḥ karī yathā

yonyantareṣu jāyate yatra vṛkṣasarīsṛpāḥ /
na santatiṃ vinā so 'tra mucyate narakāddhruvam

ācāryastasya śiṣyo vā yo dūre 'pi hi gātrejaḥ /
nārāyaṇabaliṃ kuryāt tasyāddeśena bhaktitaḥ

viśuddhaḥ sarvapāpebhyo muktaḥ sa narakāddhruvam /
nivasennākaloke ca nātra kāryā vicāraṇā

ādau kṛtvā dhaniṣṭhāñca etannakṣatrapañcakam /
revatyantaṃ sadā dūṣyamaśubhaṃ sarvadā bhavet

dāha (bali) statra na kartavyo vipradisarvajātiṣu /
dīyate na jalaṃ tatra aśubhaṃ jāyate dhruvam /
lokayātrā na kartavyā duḥ khārtaḥ svajano yadi

pañcakānantaraṃ tasya kartavyaṃ sarvamanyathā /
putrāṇāṃ gotriṇāṃ tasya santāpo 'pyupajāyate

gṛhe hānirbhavettasya ṛkṣeṣveṣu mṛtaśca yaḥ /
athavā ṛkṣamadhye 'pi dāhastasya vidhīyate

kriyate mānuṣāṇāntu sadya āhutikāraṇāt /
sadyāhutikaraṃ puṇyaṃ tīrthe taddāha uttamaḥ

viprairniyamataḥ kāryaḥ samantro vidhipūrvakaḥ /
śavasya ca samīpe tu kṣipyante puttalāstataḥ

darbhamayāśca catvāro viprā mantrābhimantritāḥ /
tato dāhaḥ prakartavyaḥ taiśca puttalakaiḥ saha

sūtakānte tataḥ putraḥ kuryācchāntikamuttamam

pañcakeṣu mṛto yo 'sau na gatiṃ labhate naraḥ /
tilān gāśca suvarṇaṃ ca tamuddiśya ghṛtaṃ dadet

viprāṇāṃ dīyate dānaṃ sarvopadravanāśanam /
sūtakānte ca satputraiḥ sa preto labhate gatim

bhājanopānahau cchatraṃ hemamudrāca vāsasī /
dakṣiṇā dīyate vipra sarvapātakamocanī

bālavṛddhāturāṇāñca mṛtānāṃ pañcakeṣu hi /
vidhānaṃ yo na kurvīta vighnastasya prajāyate

aṣṭādaśaiva vastūni pretaśrāddhe vivarjayet /
āśiṣo dviguṇān darbhān praṇavān naikapiṇḍatām

agnaukaraṇamucchiṣṭaṃ śrāddhaṃ vai vaiśvadaivikam /
vikiraṃ ca svadhākāraṃ pitṛśabdaṃ na coccaret

anuśabdaṃ na kurvīta nāvāhanamatholmukam /
āsīmāntaṃ na kurvīta pradakṣiṇavisarjanam

na kuryāt tilahomañca dvijaḥ pūrṇāhutiṃ tathā /
na kuryādvaiśvadevaṃ cetkartā gacchatyadhogatim

malinaśrāddhasaṃjñānaṃ pūrvaṣoḍaśakaṃ tathā /
sthāne dvāre cārdhamārge citāyāṃ śavahastake

śmaśānavāsibhūtebhyaḥ pañcamaṃ prativeśyakam /
ṣaṣṭhaṃ sañcayane proktaṃ daśa piṇḍā daśāhikāḥ /
śrāddhaṣoḍaṣakañcaitat prathamaṃ parikīrtitam

anyacca ṣoḍaśaṃ madhye dvitīyaṃ tārkṣya me śṛṇu /
kartavyānīha vidhinā śrāddhānyekādaśaiva tu

brahmaviṣṇuśivādyañca tathānyacchrāddhapañcakam /
evaṃ ṣoḍaśakaṃ prāhuretat tattvavido janāḥ

dvādaśa pratimāsyāni śrāddhamekādaśe tathā /
tripakṣasambhavañcaiva dve rikte khaga ṣoḍaśa

ādyaṃ śavaviśuddhyarthaṃ kṛtvānyacca triṣoḍaśam /
pitṛpāṅktiviśuddhyarthaṃ śatāddhaiṃna tu yojayet

śatārdhena vihīno yo militaḥ paṅktibhāṅna hi /
catvāriṃśat tathaivāṣṭaśrāddhaṃ pretatvanāśanam

sakṛdūnaśatārdhena sambhavet paṅktisannidhaḥ /
melanīyaḥ śatārdhena sandhiḥ śrāddhena tattvataḥ

(atha śavāvidhiḥ) /
śavasya śibikāyāṃ karacaraṇabandhanaṃ tatra kartavyam /
evaṃ cenna vidhānaṃ vidhīyate tatpiśācaparibhavanam

saṃjāyate rajanyāñca śavanirgamane rāṣṭraṃ bhayaśūnyam /
śavaṃ na muñceta mucyate cet duḥ sparśāddurgatirbhavet

grāmamadhye sthite prete śrute bhuṅkte yadṛcchayā /
tadannaṃ māṃsavajjñeyaṃ tattoyaṃ rudhiropamam

tāmbūlaṃ dantakāṣṭhañca bhojanaṃ ṛtusevanam /
grāmamadhye sthite prete varjayet piṇḍapātanam

(35.44)
snānaṃ dānaṃ japo homastarpaṇaṃ surapūjanam /
grāmamadhye sthite prete śuddhyarthaṃ jñātidharmataḥ

(35.45)
jñātisambandhināmevaṃ vyavahāraḥ khageśvara /
vilupya jñātidharmañca pretapāpena lipyate