Garuda Purana · Chapter 2.30

iti śrīgāruḍe mahāpurāṇe uttarakhaṇḍe dvitīyāṃśe pretakalpe dharmakāṇḍe śrīkṛṣṇagaruḍasaṃvāde aurdhvadehikakarmaṇi putradarbhatilatulasīgobhūlepatāmrapātradānā dīnāmāvaśyakatvanirūpaṇaṃ nāmaikonatriśo 'dhyāyaḥ
śrīgaruḍamahāpurāṇam- 30
śrīkṛṣṇa uvāca /
śṛṇu tārkṣya paraṃ guhyaṃ dānānāṃ dānamuttamam /
paramaṃ sarvadānānāṃ paraṃ gopyaṃ divaukasām

deyamekaṃ mahādānaṃ kārpāsaṃ cottamottamam /
yena dattena prīyante bhūrbhuvaḥ svariti kramāt

brahmādyā devatāḥ sarvāḥ kāryācca prītimāpnuyuḥ /
deyametanmahādānaṃ pretoddharaṇahetave

ciraṃ vasedrudraloke tato rājā bhavediha /
rūpavānsubhago vāgmī śrīmānatula vikramaḥ /
yamalokaṃ vinirjitya svargaṃ tākṣya sa gacchati

gāṃ tilāṃśca kṣitaṃ hema yo dadāti dvijanmane /
tasya janmārjirta pāpaṃ tatkṣaṇādevanaśyati

tilā gāvo mahādānaṃ mahāpātakanāśanam /
taddvayaṃ dīyate vipre nānyavarṇe kadācana

kalpitaṃ dīyate dānaṃ tilā gāvaścamedinī /
anyeṣu naiva varṇeṣu poṣyavarge kadācana

poṣyavarge tathā strīṣu dānaṃ deyamakalpitam /
āture voparāge ca dvayaṃ dānaṃ viśiṣyate /
āture dīyate dānaṃ tatkāle copatiṣṭhati

jīvatastu punardattamupatiṣṭhatyasaṃskṛtam /
satyaṃsatyaṃ punaḥ satyaṃ yaddattaṃ vikalendriye

yaccānu modate putrastacca dānamanantakam /
ato dadyāt sa putro vā yāvajjīvatsasau ciram /
ativāhastathā preto bhogāṃśca labhate yataḥ

asvasthā turakāle tu dehapāte kṣitisthite /
dehe tathātivāhasya parataḥ prīṇanaṃ bhavet

paṅgāvandhe ca kāṇe ca hyardhonmīlitalocane /
tileṣu darbhānsaṃstīrya dānamuktaṃ tadakṣayam

tilā lauhaṃ hiraṇyañca kārpāsaṃ lavaṇaṃ tathā /
saptadhānyaṃ kṣitirgāva ekaikaṃ pāvanaṃ smṛtam

lohadānādyamastuṣyeddharma rājastilārpaṇāt /
lavaṇe dīyamāne tu na bhayaṃ vidyate yamāt

karpāsasya tu dānena na bhūtebhyo bhayaṃ bhavet /
tārayanti naraṃ gāvastrividhāścaiva pātakāt

hemadānātsukhaṃ svarge bhūmidānānnṛpo bhavet /
hemabhūmipradānācca na pīḍā narake bhavet

sarve 'pi yamadūtāśca yamarūpā vibhīṣaṇāḥ /
sarve te varadā yānti saptadhānyena prīṇitāḥ

viṣṇoḥ smaraṇamātreṇa prāpyate paramā gatiḥ /
etatte sarvamākhyātaṃ martyairyā gatirāpyate

tasmāt putraṃ praśaṃsanti dadāti piturājñayā /
bhūmiṣṭhaṃ pitaraṃ dṛṣṭvā hyardhonmīlitalocanam

tasmin kāle suto yastu sarvadānāni dāpayet /
gayāśrāddhādviśiṣyeta sa putraḥ kulanandanaḥ

svasthānāccalitaścāsau vikalasya pitustadā /
putrairyatnena kartavyā pitaraṃ tārayanti te

kiṃ dattairbahubhirdānaiḥ piturantyeṣṭimācaret /
aśvamedho mahāyajñaḥ kalāṃ nārhati ṣoḍaśīm

dharmātmā sa nu putro vaidevairapi supūjyate /
dāpayedyastu dānāni hyāturaṃ pitaraṃ bhuvi

lohadānañca dātavyaṃ bhūmiyuktena pāṇinā /
yamaṃ bhīmañca nāpnoti na gacchet tasya veśmani

kuṭhāro musalo daṇḍaḥ khaḍgaśca cchurikā tathā /
etāni yamahasteṣu dṛśyāni pāpakarmiṇām

tasmāllohasya dānantu brāhmaṇāyāturo dadet /
yamāyudhānāṃ santuṣṭyai dānametadudāhṛtam

garbhasthāḥ śiśavo ye ca yuvānaḥ sthavirāstathā /
ebhirdānaviśeṣaistu nirdaheyuḥ svapātakam

churiṇaḥ śyāmaśabalau ṣaṇḍāmarkā udumbarāḥ /
śabalā śyāmadūtā ye lohadānena prīṇitāḥ

putrāḥ pautrāstathā bandhuḥ sagotrāḥ suhahṛdastathā /
dadate nāture dānaṃ brahmaghnaistu samā hi te

pañcatve bhūmiyuktasya śṛṇu tasya ca yā gatiḥ /
ativāhaḥ punaḥ pretovarṣordhvaṃ sukṛtaṃ labhet

agnitrayaṃ trayo lokāstrayo vedāstrayo 'marāḥ /
kālatrayaṃ trisandhyaṃ ca trayo varṇāstriśaktayaḥ

pādādūrdhvaṃ kaṭiṃ yāvat tāvadbrahyādhitiṣṭhati /
grīvāṃ yāvaddharirnābheḥ śarīre manujasya ca

mastake tiṣṭhatīśāno vyaktāvyakto maheśvaraḥ /
ekamūrtestrayo bhāgā brahmā viṣṇuheśvarāḥ

ahaṃ prāṇaḥ śarīrastho bhūtagrāmacatuṣṭaye /
dharmādharme matiṃ dadyāt sukhaduḥkhe kṛtākṛte

jantorvuddhiṃ samāsthāya pūrvamarmādhivāsitām /
ahameva tathā jīvānprerayāmi ca karmasu /
svargaṃ ca narakaṃ mokṣaṃ prayānti prāṇino dhruvam

svargasthaṃ narakasthaṃ vā śrāddhe vāpyāyanaṃ bhavet /
tasmācchrāddhāni kurvīta trividhāni vicakṣaṇaḥ

matsyaṃ karmaṃ ca vārāhaṃ nārasiṃhañca vāmanam /
rāmaṃ rāmaṃ ca kṛṣṇaṃ ca buddhaṃ caiva sakalkinam /
etāni daśa nāmāni smartavyāni sadā budhaiḥ

svargaṃ jīvāḥ sukhaṃ yānti cyutāḥ svargācca mānavāḥ /
labdhvā sukhaṃ ca vittaṃ ca dayādākṣiṇyasaṃyutāḥ /
putrapautrairdhanairāḍhyā jīveyuḥ śaradāṃ śatam

āture ca dadeddānaṃ viṣṇupūjāñca kārayet /
aṣṭākṣaraṃ tathā mantraṃ japedvā dvādaśākṣaram

pūjayecchuklapuṣpaiśca naivedyairghṛtapācitaiḥ /
tathā gandhaiśca dhūpaiśca śrutismṛtimanūditaiḥ

viṣṇurmātā pitā viṣṇurviṣṇuḥ svajanabāndhavāḥ /
yatra viṣṇuṃ na paśyāmi tena vāsena kiṃ mama

jale viṣṇuḥ sthale viṣṇurviṣṇuḥ parvatamastake /
jvālāmālākule viṣṇuḥ sarvaṃ viṣṇumayaṃ jagat

vayamāpo vayaṃ pṛthvī vayaṃ darbhā vayaṃ tilāḥ /
vayaṃ gāvo vayaṃ rājā vayaṃ vāyurvayaṃ prajāḥ

vayaṃ hema vayaṃ dhānyaṃ vayaṃ madhu vayaṃ ghṛtam /
vayaṃ viprā vayaṃ devā vayaṃ śambhuśca bhūrbhuvaḥ

ahaṃ dātā ahaṃ grāhī ahaṃ yajvā ahaṃ kratuḥ /
ahaṃ hartā ahaṃ dharmo ahaṃ pṛthvī hyahaṃ jalam

dharmādharme matiṃ dadyāṃ karmabhistu śubhāśubhaiḥ /
yat karma kriyate kvāpi pūrvajanmārjitaṃ khaga

dharme matimahaṃ dadyāmadharme 'pyahameva ca /
yātanāṃ kurute so 'pi dharme muktiṃ dadāmyaham

manujānāṃ hitā tārkṣya ante vaitaraṇī smṛtā /
tayāvamatya pāpaughaṃ viṣṇulokaṃ sa gacchati

bālatve yacca kaumāre yacca pariṇatau ca yat /
sarvāvamthākṛtaṃ pāpaṃ yacca janmāntareṣvapi

yanniśāyāṃ tathā prātaryanmadhyāhnāparāhnayoḥ /
sandhyayoryat kṛtaṃ karma karmaṇā manasā girā

dattvā varāṃ sakṛdapi kapilāṃ sarvakāmikām /
uddharedantakāle sa ātmānaṃ pāpasañcayāt

gāvo mamāgrataḥ santu pṛṣṭhataḥ pārśvatastathā /
gāvo me hṛdaye santu gavāṃ madhye vasāmyaham

yā lakṣmīḥ sarvabhūtānāṃ yā ca deve vyavasthitā /
dhenurūpeṇa sā devī mama pāpaṃ vyapohatu