Garuda Purana · Chapter 2.29

iti śrīgāruḍe mahāpurāṇe uttarakhaṇḍe dvitīyāṃśe dharmakāṇḍe pretakalpe śrīkṛṣṇagaruḍasaṃvāde aurdhvadahikakarmakālakriyamāṇanānādānādiphalapraśranirūpaṇaṃ nāmāṣṭāviṃśo 'dhyāyaḥ
śrīgaruḍamahāpurāṇam- 29
śrīkṛṣṇa uvāca /
sādhu pṛṣṭaṃ tvayā bhadra mānuṣāṇāṃ hitāya vai /
śṛṇuṣvāvahito bhūtvā sarvamevaurdhvadaihikam

kamyagvibhedarahitaṃ śrutismṛtisamuddhṛtam /
yanna dṛṣṭaṃ suraiḥ sendrairyogibhiryogacintakaiḥ

guhyādguhyataraṃ vatsa nākhyātaṃ kasyacitkvacit /
bhaktastvaṃ hi mahābhāga sarvaṃ te kathayāmyaham

aputrasya gatirnāsti svargo naiva ca naiva ca /
yena kenāpyupāyena kāryaṃ janma sutasya ca

tārayennarakātputro yadi mokṣo na vidyate /
dāhaḥ putreṇa kartavyo deyaḥ pautreṇa pāvakaḥ

tilairdarbhaiśca bhūmyāṃ vai kuṭī dhātumatī bhavet /
pañcaratnāni vaktre tu yena jīvaḥ prarohati

lipyāttu gomayairbhūmiṃ tilāndarbhāṃśca niḥ kṣipet /
tasyāmevāturo muktaḥ sarvaṃ dahati pātakam

darbhamūlīnayetsvargaṃ saṃsthitaṃ nātra saṃśayaḥ /
darbhāṃstatra hi ye bhūmyāṃ tilayuktāna saṃśayaḥ

sarvatra vasudhā pūtā yatra lepo na vidyate /
yatra lepaḥ sthitastatra punarlepena śudhyati

yātudhānāḥ piśācāśca rākṣasāḥ krūrakarmiṇaḥ /
alipte āturaṃ muktaṃ viśantyete na saṃśayaḥ

nityahomaṃ tathā śrāddhaṃ viprāṇāṃ pādaśodhanam /
maṇḍalena vinā bhūmyāṃ kurvantyetacca niṣphalam

āturo mucyate naiva maṇḍalena vinā bhuvi /
brahmā rudraśca viṣṇuśca śrīrhutāśana eva ca /
maṇḍale copatiṣṭhantastasmātkurvīta maṇḍalam

anyathā mriyate yastu bālo vṛddho yuvāpi vā /
yonyantaraṃ sa vai gacchetkrīḍate vāyunā saha

miśritaṃ lohatāmraṃ tu tathaiva janma jāyate /
tasmaivaṃ vāyubhūtasya na śrāddhaṃ nodaka kriyā

mama svedasamudbhūtāstilāstārkṣya pavitrakāḥ /
asurā dānavā daityāstṛpyanti tiladānataḥ

tilāḥ śvetāstilāḥ kṛṣṇāstilā gomūtrasannibhāḥ /
te me dahantu pāṣāni śarīreṇa kṛtāni ca

eka eva tiladroṇo hemadroṇatilaiḥ samaḥ /
tarpaṇe dānahome ca datto bhavati cākṣayaḥ

darbhā mallomasambhūtāstilāḥ svedasamudbhavāḥ /
tṛptāḥ syurdevatā dānaiḥ śrāddhena pitarastathā /
prayogavidhinā brahmā viśvañcāpyupajīvanāt

savyayajñopavītena brahmādyāstṛptimānpuyuḥ /
apasavyena tṛpyanti pitaro dividevatāḥ

apasavyādito brahmā darbhamadhye tu keśavaḥ /
darbhāgre śaṅkaraṃ vidyāttrayo devāḥ kuśe sthitāḥ

viprā mantrāḥ kuśā vahnistulasī ca khageśvara /
naite nirmālyatāṃ yānti kriyamāṇāḥ punaḥ punaḥ

kuśāḥ piṇḍeṣu nirmālyāḥ brāhmaṇāḥ pretabhojane /
mantrāḥ śūdreṣu patitāścitāyāśca hutāśanaḥ

tulasī brāhmaṇā gāvo viṣṇurekādaśī khaga /
pañca pravahaṇānyeva bhavābdhau majjatāṃ satām

viṣṇurekādaśī gītā tulasīvipradhenavaḥ /
apāre durgasaṃkāre ṣaṭpadī muktidāyinī

tilāḥ pavitrāstrividhā darbhāśca tulasīdālam /
nivārayanti caitāni durgatiṃ yāntamāturam

hastābhyāmuddhṛtairdarbhaistoyena prokṣayedbhuvam /
mṛtyukāle kṣipeddarbhānāturasya karadvaye

darbheṣu kṣipyate yo 'sau dabhastu pariveṣṭitaḥ /
viṣṇulokaṃ sa vai yāti mantrahīno 'pi mānavaḥ

darbhamūlīgato bhūmau darbhapāṇistu yo mṛtaḥ /
prāyaścittaviśuddho 'sau saṃsārepārasāgare

gomayenopalipte tu darbhasyāstaraṇe sthitaḥ /
tatra dattena dānena sarvaṃ pāpaṃ vyapohati

lavaṇaṃ tadrasaṃ divyaṃ sarvakāmapradaṃ nṛṇām /
yasmādannarasāḥ sarve notkaṭā lavaṇaṃ vinā

pitṝṇāṃ ca priyaṃ bhavyaṃ tasmātsvargapradaṃ bhavet /
viṣṇudehasamudbhūto yato 'yaṃ lavaṇo rasaḥ

viśeṣāllavaṇaṃ dānaṃ tena śaṃsanti yoginaḥ /
brāhmaṇa kṣattriyaviśāṃ strīṇāṃ śūdrajanasya ca

āturāṇāṃ yadā prāṇāḥ prayānti vasudhātale /
lavaṇaṃ tu tadā deyaṃ dbārasyoddhāṭanaṃ divaḥ