Garuda Purana · Chapter 1.233

iti śrīgāruḍe mahāpurāṇe kulāmṛtastotraṃ nāma dvātriṃśaduttaradviśatatamo 'dhyāyaḥ
śrīgaruḍamahāpurāṇam- 233
sūta uvāca /
stotraṃ tatsaṃ pravakṣyāmi mārkaṇḍeyana bhāṣitam /
dāmodaraṃ prapanno 'smi kinno mṛtyuḥ kariṣyati

śaṅkhacakradharaṃ devaṃ vyaktarūpiṇamavyayam /
adho 'kṣajaṃ prapannosmi kinno mṛtyuḥ kariṣyati

varāhaṃ vāmanaṃ viṣṇuṃ nārasiṃhaṃ janārdanam /
mādhavaṃ ca prapanno 'smi kinno mṛtyuḥ kariṣyati

puruṣaṃ puṣkarakṣetrabījaṃ puṇyaṃ jagatpatim /
lokanāthaṃ prapanno 'smi kinno mṛtyuḥ kariṣyati

sahasraśirasaṃ devaṃ vyaktāvyaktaṃ sanātanam /
mahāyogaṃ prapanno 'smi kinno mṛtyuḥ kariṣyati

bhūtātmānaṃ mahātmānaṃ yajñayonimayonijam /
viśvarūpaṃ prapanno 'smi kinno mūtyuḥ kariṣyati

ityudīritamākarṇya stotraṃ tasya mahātmanuḥ /
apayātastato mṛtyurviṣṇudūtaiḥ prapīḍitaḥ

iti tena jito mṛtyurmārkaṇḍeyena dhīmatā /
prasanne puṇḍarīkākṣe nṛsiṃhe nāstidurlabham

mṛtyvaṣṭakamidaṃ puṇyaṃ mṛtyupraśamanaṃ śubham /
mārkaṇḍeyahitārthāya svayaṃ viṣṇuruvāca ha

idaṃ yaḥ paṭhate bhaktyā trikālaṃ niyataṃ śuciḥ /
nākāle tasya mṛtyuḥ syānnarasyācyutacetasaḥ

hṛtpadmamadhye puruṣaṃ purāṇaṃ nārāyaṇaṃ śāśvatamaprameyam /
vicintya sūryādatirājamānaṃ mṛtyuṃ sa yogi jitavāṃstathaiva