Garuda Purana · Chapter 1.232

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe nṛsiṃhastotraṃ nāmaikatriṃśaduttaradviśatatamo 'dhyāyaḥ
śrīgaruḍamahāpurāṇam- 232
sūta uvāca /
kulāmṛtaṃ pravakṣyāmi stotraṃ yattu haro 'bravīt /
pṛṣṭaḥ śrīnāradenaiva nāradāya tathā śṛṇu

nārada uvāca /
yaḥ saṃkāre sadā dvandvaiḥ kāmakrodhaiḥ śubhāśubhaiḥ /
śabdādiviṣayairbaddhaḥ pīḍyamānaḥ sa durmatiḥ

kṣaṇaṃ vimucyate janturmṛtyusaṃsārasāgarāt /
bhagavañchrotumicchāmi tvatto hi tripurāntaka

tasya tadvacanaṃ śrutvā nāradasya trilocanaḥ /
uvāca tamṛṣiṃ śambhuḥ prasannavadano haraḥ

maheśvara uvāca /
jñānāmṛtaṃ paraṃ guhyaṃ rahasyamṛṣisattama /
vakṣyāmi śṛṇu duḥ khaghnaṃ bhavabandhabhayāmaham

tṛṇādi caturāsyāntaṃ bhūtagrāmaṃ caturvidham /
carācaraṃ jagatsarvaṃ prasuptaṃ yasya māyayā

tasya viṣṇo prisādena yadi kaścitprabudhyate /
sa nistarati saṃsāraṃ devānāmapi dustaram

bhogaiśvaryamadonmattastatattvajñānaparāṅmukhaḥ /
putradārakuṭumbeṣu mattāḥ sīdantijantavaḥ

sarva ekārṇave magnā jīrṇā vanagajā iva /
yastvānanaṃ nibadhnāti durmatiḥ kośakāravat

tasya muktiṃ na paśyāmi janmakoṭiśatairapi /
tasmānnārada sarveṣāṃ devānāṃ devamavyayam /
ārādhayetsadā samyagadhyāyedviṣṇuṃ mudānvitaḥ

yastu viśvamanādyantamajamātmani saṃsthitam /
sarvajñamacalaṃ viṣṇuṃ sadā dhyāyetsamucyate

devaṃ garbhocitaṃ viṣṇuṃ sadā dhyāyanvimucyate /
aśirīraṃ vidhātāraṃ sarvajñānamanoratim /
acalaṃ sarvagaṃ viṣṇuṃ sadā dhyāyanvimucyate

nirvikalpaṃ nirābhāsaṃ niṣprapañcaṃ nirāmayam /
vāsudevaṃ guruṃ viṣṇuṃ sadā dhyāyanvimucyate

sarvātmakañca vai yāvadātmacaitanyarūpakam /
śubhamekākṣaraṃ viṣṇuṃ sadā dhyāyanvimucyate

vākyātītaṃ trikālajñaṃ viśveśaṃ lokasākṣiṇam /
sarvasmāduttamaṃ viṣṇuṃ sadā dhyāyanvimucyate

brahmādidevagandharvairmunibhiḥ siddhacāraṇaiḥ /
yogibhiḥ sevitaṃ viṣṇuṃ sadā dhyāyanvimucyate

saṃsārabandhanāmuktimicchaṃlloko hyaśeṣataḥ /
stutvaivaṃ varadaṃ viṣṇuṃ sadā dhyāyanvimucyate

saṃsārabandhanātko 'pi muktimicchansamāhitaḥ /
anantamavyayaṃ devaṃ viṣṇaṃ viśvapratiṣṭhitam /
viśveśvaramajaṃ viṣṇuṃ saṃdā dhyāyanvimucyate

sūta uvāca /
nāradena purā pṛṣṭa evaṃ sa vṛṣabhadhvajaḥ /
yettena tasmai vyākhyātaṃ tanmayā kathitaṃ tava

tameva satatandhyāyannirvyayaṃ brahma niṣkalam /
avāpsyasi dhruvaṃ tāta ! śāśvataṃ padamavyayam

aśvamedhasahasrāṇi vājapeyaśatāni ca /
kṣaṇamekāgracittasya kalāṃ nārhanti ṣoḍaśīm

śrutvā suraṛṣirviṣṇoḥ prādhānyamidamīśvarāt /
sa viṣṇuṃ samyagārādhya siddhaḥ padamavāptavān

yaḥ paṭhecchṛṇuyādvā pi nityameva stavottamam /
koṭijanmakṛtaṃ pāpamapi tasya praṇaśyati

viṣṇoḥ stavamidaṃ divyaṃ mahādevena kīrtitam /
prayatnādyaḥ paṭhennitya mamṛtatvaṃ sa gacchati