Garuda Purana · Chapter 1.229

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe viṣṇubhaktivivaraṇaṃ nāmāṣṭāviṃśatyuttaradviśatatamo 'dhyāyaḥ
śrīgaruḍamahāpurāṇam- 229
sūta uvāca /
aśeṣalokanāthasya sāramārādhanaṃ hareḥ /
dadyātu puruṣasūkteṇa yaḥ puṣpāṇyapa eva ca

arcitaṃ syājjagadidaṃ tena sarvaṃ carācaram /
yo na pūjayate viṣṇuṃ taṃ vidyādbrahmaghātakam

yataḥ pravṛttirbhūtānāṃ yena sarvamidaṃ tatam /
taṃ yo na dhyāyate viṣṇuṃ sa viṣṭhāyāṃ krimirbhavet

narake pacyamānastu yamena paribhāṣitaḥ /
kintvayā nārcito devaḥ keśavaḥ kleśanāśanaḥ

udakenāpyabhāvena dravyāṇāmarcitaḥ prabhuḥ /
yo dadāti svakaṃ lokaṃ sa tvayā kiṃ na cārcitaḥ

na tatkaroti sā mātā na pitā nāpi bāndhavaḥ /
yatkaroti hṛṣīkeśaḥ santuṣṭaḥ śraddhayārcitaḥ

varṇāśramācāravatā puruṣeṇa paraḥ pumān /
viṣṇurārādhyate panthā nānyastattoṣakārakaḥ

na dānairvividhairdattairna puṣpairnānulepanaiḥ /
toṣameti mahātmāsau yathā bhaktyā janārdanaḥ

sampadaiśvaryamāhātmyaiḥ santatyā na ca karmaṇā /
vimuktaiścaikatā labhyā mūlamārādhanaṃ hareḥ