Garuda Purana · Chapter 1.228

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe bhagavadbhaktivivaraṇaṃ nāma saptaviṃśatyadhikadviśatatamo 'dhyāyaḥ
śrīgaruḍamahāpurāṇam- 228
sūtauvāca /
muktihetumanādyantamajamavyayamakṣayam /
yo namet sarvalokasya namasyo jāyate naraḥ

viṣṇumānandamadvaitaṃ vijñānaṃ sarvagaṃ prabhum /
praṇamāmi sadā bhaktyā cetasā hṛdayālayam

yo 'ntastiṣṭhannaśeṣasya paśyatīśaḥ śubhāśubham /
taṃ sarvasākṣiṇaṃ viṣṇuṃ namasye parameśvaram

śaktenāpi namaskāraḥ prayuktaścakrapāṇaye /
saṃsāratṛṇavargāṇāmudvejanakaro hi saḥ

kṛṣṇe sphurajjaladharodaracārukṛṣṇe lokādhikārapuruṣe paramaprameye /
eko hi bhāvaguṇamātradṛḍhapraṇāmaḥ sadyaḥ śvapākamapi sādhayituṃ saśaktaḥ

praṇamya daṇḍabadbhūmau namaskāreṇa yor'cayet /
sa yāṃ gatimavāpnoti na tāṃ kratuśatairapi

durgasaṃsārakāntārākūpāre 'pi pradhāvatām /
ekaḥ kṛṣṇe namaskāro muktyā tāṃstārayiṣyati

āsīno vā śayāno vātiṣṭhan vā yatra tatra vā /
namo nārāyaṇāyeti mantraikaśaraṇo bhavet

nārāyaṇeti śabdo 'sti vāgasti vaśavartinī /
tathāpi narake mūḍhāḥ patantīti kimadbhutam

caturmukho vā yadi koṭivaktro bhavennaraḥ kopi viśuddhacetāḥ /
sa vai guṇānāmayutaikadeśaṃ vadenna vā devavarasya viṣṇoḥ

vyāsādyā munayaḥ sarve stuvanto madhusūdanam /
matikṣayānnivartante na govindaguṇakṣayāt

avaśenāpi yannāmni kīrtite sarvapātakaiḥ /
pumān vimucyate sadyaḥ siṃhatrasto mṛgā yathā /
baddhaḥ parikarastena mokṣāya gamanaṃ prati

svapne 'pi nāma spṛśato 'pi puṃsaḥ kṣayaṃ karotyakṣayapāparāśim /
pratyakṣataḥ kiṃ punaratra puṃsā prakīrtite nāmni janārdanasya

namaḥ kṛṣṇācyutānantavāsudevetyudīritam /
yairbhāvabhāvitairviprana te yamapuraṃ yayuḥ

kṣayo bhavedyathā vahnestamaso bhāskarodaye /
tathaiva kaluṣaughasya nāmasaṃkīrtanāddhareḥ

kva nākapṛṣṭhagamanaṃ punarāyāti na kṣayam /
gacchatāṃ dūramadhvānaṃ kṛṣṇamūrchitacetasām

pātheyaṃ puṇḍarīkākṣanāmasaṃkīrtanaṃ hareḥ /
saṃsārasarpasaṃdaṣṭaviṣaceṣṭaikabheṣajam /
kṛṣṇeti vaiṣṇavaṃ kṣāntaṃ japtvā mukto bhavennaraḥ

dhyāyan kṛte japenmantraistretāyāṃ dvāparer'cayan /
yadāpnoti tadāpnoti tadāpnoti kalau saṃsmṛtyakeśavam

jihvāgre vartate yasya harirityakṣaradvayam /
saṃsārasāgaraṃ tīrtvā sa gacchedvaiṣṇavaṃ padam

vijñātaduṣkṛtisahasrasamāvṛto 'piśreyaḥ parantu pariśuddhima bhīpsamānaḥ /
spapnāntare na hi punaśca bhavaṃ sa paśyennārāyaṇastutikathāparamo manuṣyaḥ