Garuda Purana · Chapter 1.230

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe viṣṇupūjānirūpaṇaṃ nāmaikonatriśaduttaradviśatatamo 'dhyāyaḥ
śrīgaruḍamahāpurāṇam- 230
sūta uvāca /
ālokya sarvaśāstrāṇi vicārya ca punaḥ punaḥ /
idamekaṃ suniṣpannaṃ dhyeyo nārāyaṇaḥ sadā

kiṃ tasya dānaiḥ kintīrthaiḥ kiṃ tapobhiḥ kimadhvaraiḥ /
yo nityaṃ dhyāyate devaṃ nārāyaṇamananyadhīḥ

ṣaṣṭistīrthasahasrāṇi ṣaṣṭistīrthaśatāni ca /
nārāyaṇapraṇāmasya kalāṃ nārhanti ṣoḍaśīm

prayaścittānyaśeṣāṇi tapaḥ karmāṇi yāni vai /
viddhi teṣāmaśeṣāṇāṃ kṛṣṇānusmaraṇaṃ param

kṛtapāpe 'nuraktiśca yasya puṃsaḥ prajāyate /
prāyaścittantu tasyaikaṃ hareḥ saṃsmaraṇaṃ param

muhūrtamapi yo dhyāyennārāyaṇamatandritaḥ /
so 'pi svargatimāpnoti kiṃ punastatparāyaṇaḥ

jāgratsvapnasuṣupteṣu yogasthasya ca yoginaḥ /
yā kācinmanaso vṛttiḥ sā bhavatyacyutāśrayāt

uttiṣṭhannipatanviṣṇuṃ pralapanviviśaṃstathā /
bhuñjañjāgracca govindaṃ mādhavaṃ yaśca saṃsmaret

svesve karmaṇyabhirataḥ kuryāccittaṃ janārdane /
eṣā śāstrānusāroktiḥ kimanyairbahubhāṣitaiḥ

dhyānameva paro dharmo dhyānameva paraṃ tapaḥ /
dhyānameva paraṃ śaucaṃ tasmāddhyānaparo bhavet

nāsti viṣṇoḥ paraṃ dhtheyaṃ tapo nānaśanātparam /
tasmātpradhānamatroktaṃ vāsudevasya cintanam

yaddurlabhaṃ paraṃ prāpyaṃ manaso yanna gocaram /
tadapyaprārthitaṃ dhyāto dadāti madhusūdanaḥ

pramādātkurvatāṃ karma pracyavetādhvareṣu yat /
smaraṇādeva tadviṣṇoḥ saṃpūrṇaṃ syāditi śrutiḥ

dhyānena sadṛśo nāsti śodhanaṃ pāpakarmaṇām /
āgāmidehahetūnāṃ dāhako yogapāvakaḥ

viniṣpannasamādhistu muktimatraiva janmani /
prāpnoti yogī yogāgnidagdhakarmā ca yo 'cirāt

yathāgnirudyataśikhaḥ kakṣaṃ dahati vānilaḥ /
tathā cittasthite viṣṇau yoginā sarvakilbiṣam

yathāgniyogātkanakamamalaṃ saṃprajāyate /
saṃpluṣṭo vāsudevena manuṣyāṇāṃ sadā malaḥ

gaṅgāsnānasahasreṣu puṣkarasnānakoṭiṣu /
yatpāpaṃ nilayayāti smṛte naśyati taddharau

prāṇāyāmasahasnaistu yatpāpaṃ naśyati dhruvam /
kṣaṇamātreṇa tatpāpaṃ harerdhyānātpraṇaśyati

kaliprabhāvādduṣṭoktiḥ pāṣaṇḍānāṃ tathoktayaḥ /
na krāmenmānasaṃ tasya yasya cetasi keśavaḥ

sā tithistadahorātraṃ sa yogaḥ sa ca candramāḥ /
lagnaṃ tadeva vikhyātaṃ yatra saṃsmaryate hariḥ

sā hānistanmahacchidraṃ sā cārthajaḍamūkatā /
canmuhūrtaṃ kṣaṇo vāpi vāsudevo na cintyate

kalau kṛta yugaṃ tasya kalistasya kṛte yuge /
hṛdi no yasya govindo yasya cetasi nācyutaḥ

yasyāgratastathā pṛṣṭhe gacchatastiṣṭhato 'pi vā /
govinde niyataṃ cetaḥ kṛtakṛtyaḥ sadaiva saḥ

vāsudeve mano yasya japahomārcanādiṣu /
tasyāntarāyo maitreya vevendratvādikaṃ phalam

asaṃtyajya ca gārhasthayaṃ sa taptvā ca mahattapaḥ /
chinatti pauruṣīṃ māyāṃ keśavārpitamānasaḥ

kṣamāṃ kurvanti kruddheṣu dayāṃ mūrkheṣu mānavāḥ /
mudañca dharmaśīleṣu govinde hṛdayasthite

dhyāyennārāyaṇaṃ devaṃ snānadānādikarmasu /
prāyaściteteṣu sarveṣu duṣkṛteṣu viśeṣataḥ

lābhasteṣāṃ jayasteṣāṃ kutasteṣāṃ parābhavaḥ /
yeṣāmindīvaraśyāmo hṛdayastho janārdanaḥ

kīṭapakṣigaṇānāñca harau saṃnyastacetasām /
ūrdhvā hyeva gatiścāsti kiṃ punarjñānināṃ nṛṇām

vāsudevatarucchāyā nātiśītātitāpadā /
narakadvāraśamanī sā kimarthaṃ na sevyate

na ca durvāsasaḥ śāpo rājyañcāpi śacīpateḥ /
hantuṃ samarthaṃ hi sakhe hṛtkṛte madhusūdane

vadatastiṣṭhato 'nyadvā svecchayā karma kurvataḥ /
nāpayāti yadā cintā siddhāṃ manyeta dhāraṇām

dhyeyaḥ sadā savitṛmaṇḍalamadhyavarto nārāyaṇaḥ sarasijāsanasanniviṣṭaḥ /
keyūravānmakarakuṇḍalavānkirīṭī hārī hiraṇmayavapurdhṛtaśaṅkhacakraḥ

na hi dhyānena sadṛśaṃ pavitramiha vidyate /
śvapacānnāni bhuñjāno pāpī naivātra lipyate

sadā cittaṃ samāsaktaṃ jantorviṣayagocare /
yadi nārāyaṇe 'pyevaṃ ko na mucyeta bandhanāt

sūta uvāca /
viṣṇubhaktiryasya citte kaṃ vā jīvo nametsadā /
sa tārayati cātmānaṃ tadaiva duritārṇavāt

tañjñānaṃ yatra govindaḥ sā kathā yatra kāśavaḥ /
tatkarma yattadarthāya kimanyairbahubhāṣitaiḥ

sā jihvā yā hariṃ stauti taccittaṃ yattadarpitam /
tāveva kevalau ślāghyau yau tatpūjākarau karau

praṇāmamīśasya śiraḥ phalaṃ vidustadarcanaṃ pāṇiphalaṃ divaukasaḥ /
manaḥ phalaṃ tadguṇakarmacintanaṃ vacastu govindaguṇastutiḥ phalam

merumandaramātro 'pi rāśiḥ pāpasya karmaṇaḥ /
keśavasmaraṇādeva tasya sarvaṃ vinaśyati

yatkiñcitkurute karma puruṣaḥ sādhvasādhu vā /
sarvaṃ nārāyaṇe nyasya kurvannapi na limpati

tṛṇādicaturāsyāntaṃ bhūtagrāmaṃ caturvidham /
carācaraṃ jagatsarvaṃ prasuptaṃ māyayā tava

yasminnyastamatirna yāti narakaṃ svargo 'pi yaccintane vighno yatra navā viśetkathamapi brāhmo 'piloko 'lpakaḥ /
muktiñcetasi saṃsthito jaḍadhiyāṃ puṃsāṃ dadātyavyayaḥ kiñcitraṃ yadayaṃ prayāti vilayaṃ tatrācyute kīrtite

agnikāryaṃ japaḥ snānaṃ viṣṇordhyānañca pūjanam /
gantuṃ duḥ khodadheḥ kuryurye ca tatra naranti te

rāṣṭrasya śaraṇaṃ rājā pitaro bālakasya ca /
dharmaśca sarvamartyānāṃ sarvasya śaraṇaṃ hariḥ

ye namanti jagadyoniṃ vāsudevaṃ sanātanam /
na yebhyo vidyate tīrthamadhikaṃ munisattam

anargharatnapūjāñca kuryātsvādhyāyameva ca /
tamevoddiśya govindaṃ dhyāyannityamatandritaḥ

śūdraṃ vā bhagavadbhaktaṃ niṣādaṃ śvapacaṃ tathā /
dvijajāti samaṃmanyo na yāti narakaṃ naraḥ

ādareṇa sadā stauti dhanavantaṃ dhanecchayā /
tathā viśvasya kartāraṃ ko na mucyeta bandhanāt

yathā prāptavano vahnirdahatyārdramapīndhanam /
tathāvidhaḥ sthito viṣṇuryogināṃ sarvakilviṣam

ādīptaṃ parvataṃ yadvannāśrayanti mṛgādayaḥ /
tadvatpāpani sarvāṇi yogābhyāsarataṃ naram

yasya yāvāṃśca viśvāsastasya siddhistu tāvatī /
etavāneva kṛṣṇasya prabhāvaḥ parimīyate

vidveṣādapi govindaṃ damaghoṣātmajaḥ smaran /
śiśupālo gatastattvaṃ kiṃ punastatparāyaṇaḥ