Garuda Purana · Chapter 1.227

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍeṣṭāṅgayogakathanaṃ nāma ṣaḍviṃśatyadhikadviśatatamo 'dhyāyaḥ
śrīgaruḍamahāpurāṇam- 227
sūta uvāca /
viṣṇubhaktiṃ pravakṣyāmi yayā sarvamavāpyate /
yathā bhaktyā haristuṣyettathā nānyena kenacit

mahataḥ śreyaso mūlaṃ prasavaḥ puṇyasantateḥ /
jīvitasya phalaṃ svādu niyataṃ smaraṇaṃ hareḥ

tasmātsevā budhaiḥ proktā bhaktisādhanabhūyasī /
te bhaktā lokanāthasya nāmakarmādikīrtane

muñcantyaśrūṇi saṃharṣādye prahṛṣṭanūruhāḥ /
jagaddhāturmaheśasya divyājñācaraṇā vayam

iha nityakriyāḥ kuryuḥ snigdhā ye vaiṣṇavāstu te /
brahmākṣaraṃ na śṛṇvanvai tayā bhagavateritam

praṇāmapūrvakaṃ bhaktyā yo vadedvaiṣṇavo hi saḥ /
tadbhaktajanavātsalyaṃ pūjanaṃ cānumodanam

tatkathāśravaṇe prītiraśrunetrāṅgavikriyāḥ /
yena sarvātmanā viṣṇau bhaktyā bhāvo niveśitaḥ

viprebhyaśca kṛtātmatvānmahābhāgavato hi saḥ /
viśvopakaraṇaṃ nityaṃ tadarthaṃ saṅgavarjanam /
svayamabhyarcanañcaiva yo viṣṇuñcopajīvati

bhaktiraṣṭavidhā hyeṣā yasminmleccho 'pi vartate /
sa viprendro muniḥ śrīmānsa yāti paramāṃ gatim

tasmai deyaṃ tato grāhyaṃ sa ca pūjyo yathā hariḥ /
smṛtaḥ saṃbhāṣito vāpi pūjito vā dvijottamaḥ /
punāti bhagavadbhaktaścaṇḍālo 'pi yadṛcchayā

dayāṃ kuru prapannāya tavāsmīti ca yo vadet /
abhayaṃ sarvabhūtebhyo dadyādetad vrataṃ hareḥ

mantrajāpisahasrebhyaḥ sarvavedāntapāragaḥ /
sarvavedāntavitkoṭyāṃ viṣṇubhakto viśiṣyate

ekāntinaḥ svavapuṣā gacchanti paramaṃ padam /
ekāntena samo viṣṇustasmādeṣāṃ parāyaṇaḥ

yasmādekāntinaḥ proktāstadbhāgavatacetasaḥ /
priyāṇāmapi sarveṣāṃ devadevasya supriyaḥ

āpatsvapi sadā bhasya bhaktiravyabhicāriṇā /
yā prītiradhikā viṣṇorviṣayeṣvanapāyinī

viṣṇuṃ saṃsmarataḥ sā me hṛdayānnopasarpati /
dṛḍhabhakto 'pi vedādisarvaśāstrārthapāragaḥ

yo na sarveśvare bhaktastaṃ vidyātpuruṣādhamam /
nādhītavedaśāstro 'pi na kṛto 'dhvarasambhavaḥ /
yo bhaktiṃ vahate viṣṇau tena sarvaṃ kṛtaṃ bhavet

yajvānaḥ kratumukhyānāṃ vedānāṃ pāragā api /
na tāṃ yānti gatiṃ bhaktā yāṃ yānti munisattamāḥ

yaḥ kaścidvaiṣṇavo loke mithyācāro 'pyanāśramī /
punāti sakalāṃllokānsahasrāṃśurivoditaḥ

ye nṛśaṃsā durātmānaḥ pāpācararatāstathā /
te 'pi yānti paraṃ sthānaṃ nārāyaṇaparāyaṇāḥ

dṛḍhā janārdane bhaktiryadaivāvyabhicāriṇī /
tadā kiyatsvargasukhaṃ saiva nirvāṇahetukā

bhrāmyatāṃ tatra saṃsāre narāṇāṃ kurmadurgame /
hastāvalambane hyekaṃ yena tuṣyejjanārdanaḥ /
na śṛṇoti guṇāndivyāndevadevasya cakriṇaḥ /
sa maro badhiro jñeyaḥ sarvadharmabahiṣkṛtaḥ

nāmni saṃkīrtite viṣṇoryasya puṃso na jāyate /
śarīraṃ pulakodbhāsi tadbhavetkuṇapopamam

yasminbhaktirdvijaśreṣṭha muktirapyacirādbhavet /
niviṣṭamanasāṃ puṃsāṃ sarvathā vṛjinakṣayaḥ

svapuruṣamabhivīkṣya pāśahastaṃ vadati yamaḥ kila tasya karṇamūle /
parihara madhusūdanaprāpannanprabhurahamanyanṛṇāṃ na vaiṣṇavānām

api cetsudurācāro bhajate māmananyabhāk /
sādhureva sa mantavyaḥ samyagavyavasito hi saḥ

kṣipraṃ bhavati dharmātmā śaśvacchāntiṃ sa gacchati /
viprendra pratijānīhi viṣṇubhakto na naśyati

dharmārthakāmaḥ kiṃ tasya muktistasya kare sthitā /
samastajagatāṃ mūlaṃ yasya bhaktiḥ sthirā harau

daivī hyeṣā guṇamayī harermāyā duratyayā /
tameva ye prapadyante māyāmetāṃ taranti te

kiṃ yajñārādhane puṃsā śiṣyate harimedhasām /
bhaktyaivārādhyate viṣṇurnānyattatropakārakam

na dānairvividhairdattaiḥ puṣpairnaivānulepanaiḥ /
toṣameti mahātmāsau yathā bhaktyā janārdanaḥ

saṃsāraviṣavṛkṣasya dve phale hyamṛtopame /
kadācitkeśave bhaktistadbhaktairvā samāgamaḥ

patreṣu puṣpeṣu phaleṣu toyeṣvakaṣṭalabhyeṣu sadaiva satsu /
bhaktyaikalabhye puruṣe purāṇe muktyaikalābhe kriyate prayatnaḥ

āsphoṭayanti pitaraḥ pranṛtyanti pitāmāhaḥ /
vaiṣṇavosmatkule jātaḥ sa naḥ santārayiṣyati

ajñāninaḥ sukhare samadhikṣipanto yatpāpino 'pi śiśupālasuyodhanādyāḥ /
muktiṃ gatāḥ smaraṇamātravidhūtapāpāḥ kaḥ saṃśayaḥ paramabhaktimatāṃ janānām

śaramaṃ taṃ prapannā ye dhyānayogavivarjitāḥ /
te 'pi mṛtyumatikramya yānti tadvaiṣṇavaṃ padam

bhavodbhavakleśaśatairhatastathā paribhramannindriyarandhrakairhayaiḥ /
niyamyatāṃ mādhava ! me manohayastvadaṅghriśaṅkau dṛḍhabhaktibandhane

viṣṇureva paraṃ brahma tribhedamiha paṭhyate /
vedasiddhāntamārgeṣu tanna jānanti mohitāḥ