Garuda Purana · Chapter 1.202

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe gajāśvāyurvedanirūpaṇaṃ nāmaikādhikadviśatatamo 'dhyāyaḥ
śrīgaruḍamahāpurāṇam- 202
hariruvāca /
ekaṃ punarnavāmūlamapāmārgasya vā śiva /
sarasaṃ yoniniḥ kṣiptaṃ varāṅgasya vyathāṃ haret /
prasūtivedanāñcaiva taruṇīnāṃ vyathāṃ haret

bhūmi kūṣmāṇḍamūlaṃ vai śālicūrṇamathāpi vā /
saptāhaṃ dugdhapītaṃ syātstrīṇāṃ bahupayaskaram

rudrendravāruṇīmulaṃ lepātstrīstanavedanā /
naśyeta ghṛtapakvā ca kāryāvaśyantu polikā

bhakṣitā sā maheśāna yoniśūlaṃ vināśayet /
pralepitā kāravellamūlenaiva vinirgatā

yoniḥ praveśamāyāti nātra kāryā vicāraṇā /
nīlīpaṭolamūlāni sājyāni tilavāriṇā

piṣṭānyeṣāṃ pralepo vai jvālāgardabharāganat /
pāṭhāmūlaṃ rudra pītaṃ piṣṭaṃ taṇḍulavāriṇā

pāparogaharaṃ syācca kuṣṭhapānaṃ tathaiva ca /
vāsyodakañca samadhu pītamantargatasya vai

pāparogasya santāpanivṛktiṃ kurute śiva /
ghṛtatulyā rudra lākṣā pītā kṣīreṇa vai saha

pradaraṃ harate rogaṃ nātra kāryā vicāraṇā /
dvijayaṣṭī trikaṭukaṃ cūrṇaṃ pītaṃ harecchiva

tilakvāthena saṃyuktaṃ raktagulmaṃ striyā hara /
kusumasya nibaddhañca taruṇīnāṃ maheśvara

raktotpalasya vai kandaṃ-śarkarātilasaṃyutam /
pītaṃ saśarkaraṃ strīṇāṃ dhārayedgarbhapātanam

raktastrāvasya nāśaḥ syācchītodakaniṣevaṇāt /
pītantu kāñjika rudra kvathitaṃ śarapuṅkhayā

hiṅgustraindhavasaṃyuktaṃ śīghraṃ strīṇāṃ prasūtikṛt /
mātuluṅgasya vai mūlaṃ kaṭibaddhaṃ prasūtikṛt

apāmārgasya vai mūle garbhavatyāstu nāmataḥ /
utpāṭyamāne sakale puttraḥ syādānyathā sutā

apāmārgasya vai mūle nārīṇāṃ śirasi sthite /
garbhaśūlaṃ vinaśyeta nātra kāryā vicāraṇā

karpūra-madanaphala-madhukaiḥ pūritaḥ śiva /
yoniḥ subhā syādvṛddhāyā yuvatyāḥ kiṃ punarhara

yasya bālasya tilakaḥ kṛto gaurocanākhyayā /
śarkarā-kuṣṭhapānañca dattaṃ sa syācca nirbhayaḥ /
viṣa-bhūta-grahādibhyo vyādhibhyo bālakaḥ śiva

śaṅkha-nābhi-vacā-kuṣṭha-lohānāṃ dhāraṇaṃ sadā /
bālānāmupasargebhyo rudra rakṣākaraṃ bhavet

palāśacūrṇaṃ samadhu gavyājyāmalakānvitam /
saviḍaṅgaṃ pītamātraṃ naraṃ kuryānmahāmatim

māsaikena mahādeva jarā-maraṇavarjitaḥ

palāśabījaṃ saghṛtaṃ tila-madhvanvitaṃ samam /
saptāhaṃ bhakṣitaṃ rudra jarāṃ nayati saṃkṣayam

rudrāmalakacūrṇaṃ vai madhu-taila ghṛtānvitam /
jagdhvā māsaṃ yuvā syācca naro vāgīśvarī bhavet

śivāmalakacūrṇaṃ vai madhunā udakena vā /
balāni kuryānnāsāyāḥ pratyūṣe bhakṣitaṃ śiva

kuṣṭhacūrṇaṃ sājya-madhu prātarjagdhvā bhavennaraḥ /
sākṣātsurabhideho vai jīvedvarṣasahasrakam

māṣasya vidalānye vituṣāṇi maheśvara /
ghṛtabhāvitaśuṣkāṇi payasā sādhitāni vai

samādhvājyapayobhiśca bhakṣayitvā ca kāmayet /
strīṇāṃ śataṃ mahādeva tatkṣaṇānnātra saṃśayaḥ

rasaścairaṇḍatailena gandhakena śubho bhavet /
trikālodakasaṃghuṣṭo balakṛdbhakṣaṇādbhavet

dugdhaṃ vituṣamāṣaiśca śimbābījaiśca sādhitam /
apāmārgasya tailena pītaṃ strīśatakāmakṛt