ગરુડ પુરાણ · અધ્યાય 1.202

ઇતિ શ્રીગારુડે મહાપુરાણે પૂર્વખણ્ડે પ્રથમાંશાખ્યે આચારકાણ્ડે ગજાશ્વાયુર્વેદનિરૂપણં નામૈકાધિકદ્વિશતતમો ઽધ્યાયઃ
શ્રીગરુડમહાપુરાણમ્- 202
હરિરુવાચ ।
એકં પુનર્નવામૂલમપામાર્ગસ્ય વા શિવ ।
સરસં યોનિનિઃ ક્ષિપ્તં વરાઙ્ગસ્ય વ્યથાં હરેત્ ।
પ્રસૂતિવેદનાઞ્ચૈવ તરુણીનાં વ્યથાં હરેત્

ભૂમિ કૂષ્માણ્ડમૂલં વૈ શાલિચૂર્ણમથાપિ વા ।
સપ્તાહં દુગ્ધપીતં સ્યાત્સ્ત્રીણાં બહુપયસ્કરમ્

રુદ્રેન્દ્રવારુણીમુલં લેપાત્સ્ત્રીસ્તનવેદના ।
નશ્યેત ઘૃતપક્વા ચ કાર્યાવશ્યન્તુ પોલિકા

ભક્ષિતા સા મહેશાન યોનિશૂલં વિનાશયેત્ ।
પ્રલેપિતા કારવેલ્લમૂલેનૈવ વિનિર્ગતા

યોનિઃ પ્રવેશમાયાતિ નાત્ર કાર્યા વિચારણા ।
નીલીપટોલમૂલાનિ સાજ્યાનિ તિલવારિણા

પિષ્ટાન્યેષાં પ્રલેપો વૈ જ્વાલાગર્દભરાગનત્ ।
પાઠામૂલં રુદ્ર પીતં પિષ્ટં તણ્ડુલવારિણા

પાપરોગહરં સ્યાચ્ચ કુષ્ઠપાનં તથૈવ ચ ।
વાસ્યોદકઞ્ચ સમધુ પીતમન્તર્ગતસ્ય વૈ

પાપરોગસ્ય સન્તાપનિવૃક્તિં કુરુતે શિવ ।
ઘૃતતુલ્યા રુદ્ર લાક્ષા પીતા ક્ષીરેણ વૈ સહ

પ્રદરં હરતે રોગં નાત્ર કાર્યા વિચારણા ।
દ્વિજયષ્ટી ત્રિકટુકં ચૂર્ણં પીતં હરેચ્છિવ

તિલક્વાથેન સંયુક્તં રક્તગુલ્મં સ્ત્રિયા હર ।
કુસુમસ્ય નિબદ્ધઞ્ચ તરુણીનાં મહેશ્વર

રક્તોત્પલસ્ય વૈ કન્દં-શર્કરાતિલસંયુતમ્ ।
પીતં સશર્કરં સ્ત્રીણાં ધારયેદ્ગર્ભપાતનમ્

રક્તસ્ત્રાવસ્ય નાશઃ સ્યાચ્છીતોદકનિષેવણાત્ ।
પીતન્તુ કાઞ્જિક રુદ્ર ક્વથિતં શરપુઙ્ખયા

હિઙ્ગુસ્ત્રૈન્ધવસંયુક્તં શીઘ્રં સ્ત્રીણાં પ્રસૂતિકૃત્ ।
માતુલુઙ્ગસ્ય વૈ મૂલં કટિબદ્ધં પ્રસૂતિકૃત્

અપામાર્ગસ્ય વૈ મૂલે ગર્ભવત્યાસ્તુ નામતઃ ।
ઉત્પાટ્યમાને સકલે પુત્ત્રઃ સ્યાદાન્યથા સુતા

અપામાર્ગસ્ય વૈ મૂલે નારીણાં શિરસિ સ્થિતે ।
ગર્ભશૂલં વિનશ્યેત નાત્ર કાર્યા વિચારણા

કર્પૂર-મદનફલ-મધુકૈઃ પૂરિતઃ શિવ ।
યોનિઃ સુભા સ્યાદ્વૃદ્ધાયા યુવત્યાઃ કિં પુનર્હર

યસ્ય બાલસ્ય તિલકઃ કૃતો ગૌરોચનાખ્યયા ।
શર્કરા-કુષ્ઠપાનઞ્ચ દત્તં સ સ્યાચ્ચ નિર્ભયઃ ।
વિષ-ભૂત-ગ્રહાદિભ્યો વ્યાધિભ્યો બાલકઃ શિવ

શઙ્ખ-નાભિ-વચા-કુષ્ઠ-લોહાનાં ધારણં સદા ।
બાલાનામુપસર્ગેભ્યો રુદ્ર રક્ષાકરં ભવેત્

પલાશચૂર્ણં સમધુ ગવ્યાજ્યામલકાન્વિતમ્ ।
સવિડઙ્ગં પીતમાત્રં નરં કુર્યાન્મહામતિમ્

માસૈકેન મહાદેવ જરા-મરણવર્જિતઃ

પલાશબીજં સઘૃતં તિલ-મધ્વન્વિતં સમમ્ ।
સપ્તાહં ભક્ષિતં રુદ્ર જરાં નયતિ સંક્ષયમ્

રુદ્રામલકચૂર્ણં વૈ મધુ-તૈલ ઘૃતાન્વિતમ્ ।
જગ્ધ્વા માસં યુવા સ્યાચ્ચ નરો વાગીશ્વરી ભવેત્

શિવામલકચૂર્ણં વૈ મધુના ઉદકેન વા ।
બલાનિ કુર્યાન્નાસાયાઃ પ્રત્યૂષે ભક્ષિતં શિવ

કુષ્ઠચૂર્ણં સાજ્ય-મધુ પ્રાતર્જગ્ધ્વા ભવેન્નરઃ ।
સાક્ષાત્સુરભિદેહો વૈ જીવેદ્વર્ષસહસ્રકમ્

માષસ્ય વિદલાન્યે વિતુષાણિ મહેશ્વર ।
ઘૃતભાવિતશુષ્કાણિ પયસા સાધિતાનિ વૈ

સમાધ્વાજ્યપયોભિશ્ચ ભક્ષયિત્વા ચ કામયેત્ ।
સ્ત્રીણાં શતં મહાદેવ તત્ક્ષણાન્નાત્ર સંશયઃ

રસશ્ચૈરણ્ડતૈલેન ગન્ધકેન શુભો ભવેત્ ।
ત્રિકાલોદકસંઘુષ્ટો બલકૃદ્ભક્ષણાદ્ભવેત્

દુગ્ધં વિતુષમાષૈશ્ચ શિમ્બાબીજૈશ્ચ સાધિતમ્ ।
અપામાર્ગસ્ય તૈલેન પીતં સ્ત્રીશતકામકૃત્