Garuda Purana · Chapter 1.200
iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe navanavatyadhikaśatatamo 'dhyāyaḥ
śrīgaruḍamahāpurāṇam- 200
bhairava uvāca /
vakṣye vāyujayaṃ devi jayā jayavideśakam /
vāyvagnijalaśakrākhyaṃ maṅgalānāñcatuṣṭayam
vāmadakṣiṇasaṃsthaśca vāyuśca bahulo bhavet /
ūrdhvavāhī bhavedagniradhastu varuṇo bhavet
mahendro madhyasaṃsthastu śuklapakṣe tu vāmagaḥ /
kṛṣṇapakṣe dakṣiṇaga udayasya tryahantryaham
vahetpratipadādye ca viparīte bhavennatiḥ /
udayaḥ sūryamārgeṇa candreṇāstamayo yadi
vardhante guṇasaṃghātā anyathā vighnamaucitam /
saṃkrāntyaḥ ṣoḍaśaproktā divā rātrau varānane
yadā ca saṃkramedvāyurardhārdhaprahare sthitaḥ /
svāsthyāhānistadā jñeyā vāyurbhramati dehiṣu
dakṣiṇe ca puṭe vāyurhito bhojanamaithune /
khaḍgahasto jayedyuddhe ripūnkāmasamanvitaḥ
vāmeva gamanaṃ śreṣṭhaṃ sarvakāryeṣu bhūṣitam /
vāyurvahati tatrasthaḥ praśro bhūtasya śobhanaḥ
māhendre vāruṇe vāte ko 'pi doṣo na jāyate /
anāvṛṣṭirdakṣavāhe vṛṣṭiḥ syādvāmavāhake
Original text: Garuḍapurāṇa · Edition: Bombay : Venkatesvara Steam Press (or a reprint thereof) · Data entry members of the Sansknet Project · GRETIL (Göttingen) · CC BY-NC-SA 4.0