Garuda Purana · Chapter 1.182

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe ekāśītyadhikaśatatamo 'dhyāyaḥ
śrīgaruḍamahāpurāṇam- 182
hariruvāca /
śaradgrīṣmavasanteṣu prāyaśo dadhi garhitam /
hemante śiśire caiva varṣāsu dadhi śasyate

bhukte tu śarkarā pītā navanītena buddhikṛt /
guḍasya tu purāṇasya palamekantu bhakṣayet /
strīsahasrañca saṃgacchetpumānbalayuto hara !

kuṣṭhaṃ saṃcūrṇitaṃ kṛtvā ghṛtamākṣikasaṃyutam /
bhakṣayetsvapnavelāyāṃ balīpalitanāśanam

atasīmāṣagodhūmacūrṇaṃ kṛtvā tu pippalī /
ghṛtena lepayedgatramobhiḥ sārdhaṃ vicakṣaṇaḥ /
kandarpasadṛśo martyo nityaṃ bhavati śaṅkara !

yavāstilāśvagandhā ca muśalī saralā guḍam /
ebhiśca racitāṃ jagdhvā taruṇo balavānbhavet

hiṅgu sauvarcalaṃ śuṇṭhīṃ pītvā tu kvathitodakaiḥ /
pariṇāmākhyaśūlañca ajīrṇañcaiva naśyati

dhātakīṃ somarājīñca kṣīreṇa saha peṣayet /
durbalaśca bhavetsthūlo nātra kāryā vicāraṇā

śarkarāmadhusaṃyuktaṃ navanītaṃ balī lihet /
kṣīrāśī ca kṣayī puṣṭiṃ medhāñcaivātulāṃ vrajet

kulīracūrṇaṃ sakṣīraṃ pītañca kṣayareganut /
bhallātakaṃ viḍaṅgañca yavakṣārañca saindhavam

manaḥ śilā śaṅkhacūrṇaṃ tailapakvaṃ tathaiva ca /
lomāni śātayatyeva nātra kāryā vicāraṇā

mālūrasya rasaṃ gṛhya jalaukāṃ tatra peṣayet /
hastau saṃlepayettena tvagnistambhanamuttamam

śālmalīrasamādāya kharamūtre nidhāya tam /
agnayādau vikṣipettena hyagnistambhanamuttamam

vāyasyā udaraṃ gṛhya maṇḍūkavasayā saha /
guṭikāṃ kārayettena tato 'gnau saṃkṣaipetsudhīḥ /
evametatprayogeṇa hyagnistambhanamuttamam

muṇḍītvakca vacā mustaṃ maricaṃ tagaraṃ tathā /
carvitvā ca tvimaṃ sadyo jihvayā jvalanaṃ lihet

gorocanāṃ bhṛṅgarājaṃ cūrṇokṛtyaghṛtaṃ samam /
divyāmbhasaḥ stambhanaṃ syānmantreṇānena vai tathā /
oṃ agnistambhanaṃ kuru kuru

oṃ namo bhagavate jalaṃ stambhaya saṃ saṃ saṃ keka kekaḥ caracara /
jalastambhanamantro 'yaṃ jalaṃ stambhayate śiva !

gṛdhrāsthiñca gavāsthiñca tathā nirmālyameva ca /
areryo nikhaneddvāre pañcatvamu payāti saḥ

pañcaraktāni puṣpāṇi pṛthagjātyā samālabhet /
kuṅkumena samāyuktamātmaraktasamanvitam

puṣpeṇa tu samaṃ piṣṭvā rocanāyāḥ palaikataḥ /
striyā puṃsā kṛto rudra ! tilako 'yaṃ vaśīkaraḥ

brahmadaṇḍī tu puṣyeṇa bhakṣye pāne vaśīkaraḥ /
yaṣṭi madhu palaikena pakvamuṣṇodakaṃ pibet

viṣṭambhikāñca hṛcchūlaṃ haratyeva maheśvara ! /
oṃ hrūṃ jaḥ /
mantro 'yaṃ harate rudra ! sarvavṛścikajaṃ viṣam

pippalī navanītañca śṛṅgaveraṃ ca saindhavam /
maricaṃ dadhi kuṣṭhañca nasye pāne viṣaṃ haret

triphalārdrakakuṣṭhaṃ ca candanaṃ ghṛtasaṃyutam /
etatpānācca lepācca viṣanāśo bhavecchiva !

pārāvatasya cākṣīṇi haritālaṃ manaḥ śilā /
etadyogādviṣaṃ hanti vainateya ivoragān

saindhavaṃ tryūṣaṇaṃ caiva dadhimadhvājyasaṃyutam /
vṛścikasya viṣaṃ hanti lepo 'yaṃ vṛṣabhadhvaja !

brahmadaṇḍītilānkvāthya cūrṇaṃ trikaṭukaṃ pibet /
nāśayedrudra ! gulmāni niruddhaṃ raktameva ca

pītvā kṣīraṃ kṣaudrayutaṃ nāśayedasṛjaḥ strutim /
āṭarūpakamūlena bhagaṃ nābhiṃ ca lepayet /
sukhaṃ prasūyate nārī nātra kāryā vicāraṇā

śarkarāṃ madhusaṃyuktāṃ pītvā taṇḍulavāriṇā /
raktātisāraśamanaṃ bhavatīti vṛṣadhvaja !