Garuda Purana · Chapter 1.181

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe aśītyadhikaśatatamo 'dhyāyaḥ
śrīgaruḍamahāpurāṇam- 181
hariruvāca /
tāmbūlañca ghṛtaṃ kṣaudraṃ lavaṇaṃ tāmrabhājane /
tathā payaḥ samāyuktaṃ cakṣuḥ śūlaharaṃ param

harītakī vacā kuṣṭhaṃ vyoṣaṃ hiṅgu manaḥ śilā /
kāse śvāse ca hikkāyāṃ lihyātkṣaudraṃ ghṛplutam

pippalītriphalācūrṇaṃ madhunā lehayennaraḥ /
naśyate pīnasaḥ kāsaḥ śvāsaśca balavattaraḥ

samūlacitrakaṃ bhasmapippalīcūrṇakaṃ lihet /
śvāsaṃ kāsañca hikkāñca madhumiśraṃ vṛṣadhvaja !

nīlotpalaṃ śarkarā ca madhukaṃ padmakaṃ samam /
taṇḍulodakasaṃmiśraṃ praśamedraktavikriyāḥ

śuṇṭhī ca śarkarā caiva tathā kṣaudreṇa saṃyutā /
kokilasvara eva syādguṭikā bhuktimātrataḥ

haritālaṃ śaṅkhacūrṇaṃ kadalīdalabhasmanā /
etaddravyeṇa codvartya lomaśātanamuttamam

lavaṇaṃ haritālañca tumbinyāśca phalāni ca /
lākṣārasasamāyuktaṃ lomaśātanamuttam

sudhā ca haritālañca śaṅkhabhasma manaḥ śilā /
saindhavena sahaikatra chāgamūtreṇa peṣayet

tatkṣaṇodvartanādeva lomaśātanamuttamam /
śaṅkhamāmalakaṃ patraṃ dhātakyāḥ kusumāni ca

piṣṭvā tatpayasā sārdhaṃ saptāhaṃ dhārayenmukhe /
snigdhāḥ śvetāśca dantāśca bhavanti vimalaprabhāḥ