Garuda Purana · Chapter 1.183

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe dvyāśītyadhikaśatatamo 'dhyāyaḥ
śrīgaruḍamahāpurāṇam- 183
hariruvāca /
maricaṃ śṛṅgaveraṃ ca kuṭajatvacameva ca /
pānācca grahaṇī naśyecchaśāṅkāṅkitaśekhara !

pippalī pippalīmūlaṃ maricaṃ tagaraṃ vacā /
devadārurasaṃ pāṭhāṃ kṣīreṇa saha peṣayet

anenaiva prayogeṇa hyatisāro vinaśyati /
marīcatilapuṣpābhyā mañjanaṃ kāmalāpaham

harītakī samaguḍā madhunā saha yojitā /
virecanakarī rudra ! bhavatīti na saṃśayaḥ

triphalā citrakaṃ citraṃ tathā kaṭukarohiṇī /
urustambhaharaṃ hyetaduttamantu virecanam

harītakī śṛṅgaveraṃ devadāru ca candanam /
kvāthayecchāgadugdhena apāmārgasya mūlakam /
ūrustambhaṃ jayantyā vā saptarātreṇa nāśayet

anantāśṛṅgaverasya sūkṣmacūrṇāni kārayet /
guggulaṃ guḍatulyaṃ ca guṭikāmupayujyaca /
vāyuḥ snāyugataṃ caiva agnimāndyaṃ ca nāśayet

saṅkhapuṣpīntu puṣpeṇa samuddhṛtya sapatrikām /
samūlāṃ chāgadugdhena apasmāraharaṃ pibet

aśvagandhābhaye caiva udakena samaṃ pibet /
raktapittaṃ vinaśyettu nātra kāryā vicāraṇā

harītakīkuṣṭhacūrṇaṃ kṛtvā āsyaṃ ca pūrayet /
śītaṃ pītvātha pānīyaṃ sarvacchardinivāraṇam

gaḍūcīpadmakāriṣṭadhānyākaṃ raktacaṃndanam /
pittaśleṣmajvaracchardidāhatṛṣṇāghnamagnikṛt /
oṃ huṃ nama iti

śrotre baddhvā śaṅkhapuṣpīṃ jvaraṃ mantreṇa vai haret /
oṃ jambhinī stambhinī mohaya sarvavyādhīnme vajreṇa ṭhaḥ ṭhaḥ sarvavyādhīnme vajreṇa phaṭ iti

puṣpamaṣṭaśataṃ japtvā haste dattvā nakhaṃ spṛśet /
cāturthiko jvaro rudra anye caiva jvarāstathā

jmbūphalaṃ haridrā ca sarpasyaiva tu kañcukam /
sarvajvarāṇāṃ dhūpo 'yaṃ haraścāturthikasya ca

karavīraṃ bhṛṅgapatraṃ lavaṇaṃ kuṣṭhakarkaṭe /
caturguṇena mūtreṇa pacettailaṃ harecca tat /
pāmāṃ vicarcikāṃ kuṣṭhamabhyaṅgāddhi vraṇāni vai

pippalīmadhupānācca tathā madhurabhojanāt /
plīhā vinaśyate rudra tathā sūraṇasevanāt

pippalīñca haridrāñca gomūtreṇa samanvitām /
prakṣipecca gudadvāre arśāṃsi vinivārayet

ajādugdhamārdrakañca pītaṃ plīhādināśanam /
saindhavañca viḍaṅgāni somarājī tu sarṣapāḥ

rajanī dve viṣañcaiva gomūtreṇaiva peṣayet /
kuṣṭhanāśaśca tallepānnimbapatrādinā tathā