Garuda Purana · Chapter 1.175

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe brāhmīghṛtādivarṇanaṃ nāma catuḥ saptatyuttaraśatatamo 'dhyāyaḥ
śrīgaruḍamahāpurāṇam- 175
rudra uvāca /
evaṃ dhanvantarirviṣṇuḥ suśrutādīnuvāca ha /
hariḥ punarharāyāha nānāyogānrugardanān

hariruvāca /
sarvajvareṣu prathamaṃ kāryaṃ śaṅkara laṅghanam /
kvathitodakapānaṃ ca tathā nirvātasevanam

agnisvedājjvarāstvevaṃ nāśamāyāntihīśvara /
vātajvaraharaḥ kvātho guḍūcyā mustakena ca

durālabhaiścaiva ghṛtaṃ pittajvaraharaḥ śṛṇu /
śuṇṭhīparpaṭamustaiśca bālakośīracandanaiḥ

sājyaḥ kvāthaḥ śleṣmajaṃ tu saśuṇṭhiḥ sadurālabhaḥ /
savālakaḥ sarvajjvaraṃ saśuṇṭhiḥ sahaparpaṭaḥ

kirātatiktairnārīguḍūcīśuṇṭhimustakaiḥ /
pittajvaraharaḥ syācca śṛṇvanyaṃ yogamuttamam

vālakośīrapāṭhābhiḥ kaṇṭakārikamustakaiḥ /
jvaranucca kṛtaḥ kvāthastathā vai suradāruṇā

dhanyākanimbamustānāṃ samadhuḥ sa tu śaṅkara /
paṭolapatrayuktastu guḍūcītriphalāyutaḥ

pīto 'khilajvaraharaḥ kṣudhākṛdvātanuttvidam /
harītakīpiplīnāmāmalīcitrakodbhavam

cūrṇaṃ jvaraṃ ca kvathitaṃ dhānya (dhanyā) kośīrapaparpaṭaiḥ /
āmalakyā guḍūcyā ca madhuyuktaṃ sacandanam

samastajvaranucca syātsannipātaharaṃ śṛṇu /
haridrānimbatriphalāmustakairdevadāruṇā

kaṣāyaṃ kaṭurohiṇyā sapaṭolaṃ sapatrakam /
tridoṣajvaranuccasyātpītaṃ tu kvathitaṃ jalam

kaṇṭakāryā nāgarasya guḍūcyā puṣkareṇa ca /
jagdhvā nāgabalācūrṇaṃ śvasakāsādinudbhavet

kaphavātajvare deyaṃ jalamuṣṇaṃ pipāsine /
viśvaparpaṭakośīramustacandanasādhitam

dadyātsuśītalaṃ vāri tṛṭchardijvaradāhanut /
bilvādipa pañcamūlasya kvāthaḥ syādvātike jvare

pācanaṃ pippalīmūlaṃ guḍṛcīviśvabheṣajam /
vātajvare tvayaṃ kvātho dattaḥ śāntikaraḥ paraḥ

pittajvaraghnaḥ samadhuḥ kvāthaḥ parpaṭanimbayoḥ /
vidhāne kriyamāṇe 'pi ysaya saṃjñā na jāyate

pādayostu lalāṭe vā dahellauhaśalākayā /
tiktā pāṭhā parpaṭāśca viśālā triphalā trivṛt /
sakṣīro bhedanaḥ kvāthaḥ sarvajvaraviśodhanaḥ