Garuda Purana · Chapter 1.153

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe yakṣmanidānā nāma dvipañcāśaduttaraśatatamo 'dhyāyaḥ
śrīgaruḍamahāpurāṇam- 153 /
dhanvantarirudāca /
arocakanidānte vakṣye 'haṃ suśrutādhunā /
arocako bhaveddoṣairjihvāhṛdayasaṃśrayaiḥ

sannipātena manasaḥ santāpena ca pañcamaḥ /
kaṣāyatiktamadhuraṃ vātādiṣu mukhaṃ kramāt

sarvaṃ vītarasaṃ śokakrodhādiṣu yathā manaḥ /
chardidoṣaiḥ pṛthaksarvairduṣṭairanyaiśca pañcamaḥ

udāno 'dhikṛtāndoṣānsarvaṃ sandhyarhamasyati /
āśu kleśo 'sya lāvaṇyaprasekārucayaḥ kramāt

nābhipṛṣṭhaṃ rujatyāśu pārśve cāhāramutkṣipet /
tato vicchrinnalpālpakaṣāyaṃ phenilaṃ vamet

śabdodgarayutaḥ kṛcchramanukṛcchreṇa vegavat /
kāsāsyaśoṣakaṃ vātātsvarapīḍāsamanvitam

pittātkṣārodakanibhaṃ dhūmraṃ haritapītakam /
sāsṛgamlaṃ kaṭutiktaṃ tṛṇmūrchādāhapākavat

kaphātsnigdhaṃ ghanaṃ pītaṃ śleṣmatastu samākṣikam /
madhuraṃ lavaṇaṃ bhūri prasaktaṃ lomaharṣaṇam

makhaśvayathumādhuryatandrāhṛllāsakāsavān /
sarvairliṅgaiḥ samāpannastyājyo bhavati sarvathā

sarvaṃ yasya ca vidviṣṭaṃ darśanaśravaṇādibhiḥ /
vātādinaiva saṃkruddhakṛmiduṣṭānnaje gade /
śūlavepatuhṛllāso viśeṣātkṛmije bhavet