Garuda Purana · Chapter 1.145

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe harivaṃśavarṇanaṃ nāma catuścātvāriṃśaduttaraśatatamo 'dhyāyaḥ
śrīgaruḍamahāpurāṇam- 145
brahmovāca /
bhārataṃ saṃpravakṣyāmi bhārāvataraṇaṃ bhuvaḥ /
cakre kṛṣṇo yudhyamānaḥ pāṇḍavādinimittataḥ

viṣṇunābhyabjato brahmā brahmaputro 'triratritaḥ /
somastato budhastasmādilāyāṃ ca purūravāḥ

tasyāyustatra vaṃśe 'bhūdyayātirbharataḥ kuruḥ /
śantanustasya vaṃśe 'bhūdgaṅgāyāṃ śantanoḥ sutaḥ

bhīṣmaḥ sarvaguṇaiyukto brahmavaivartapāragaḥ

śantanoḥ satyavatyāṃ ca dvau putrau saṃbabhūvatuḥ /
citrāṅgadantu gandharvaḥ putraṃ citrāṅgado 'vadhīt

anyo vicitravīryo 'bhūtkāśīrājasutāpatiḥ /
vicitravīrye svaryāte vyāsāttatkṣetrato 'bhavat

dhṛtarāṣṭo 'mbikāputraḥ pāṇḍurāmbālikāsutaḥ /
bhujiṣyāyāntu viduro gāndhāryāṃ dhṛtarāṣṭrataḥ

duryodhanapradhānāstu śatasaṃkhyā mahābalāḥ /
pāṇḍoḥ kuntyāñca mādyāṃ ca pañca putrāḥ prajajñire

yudhiṣṭhiro bhīmaseno hyarjuno nakulastathā /
sahadevaśca pañcaite mahābalaparākramāḥ

kurupāṇḍavayorvairaṃ daivayo gādbabhūva ha /
duryodhanenādhīreṇa pāṇḍavāḥ samupadrutāḥ

dagdhā jatugṛhe vīrāste muktāḥ svadhiyāmalāḥ

tatastadekacakrāyāṃ brāhmaṇasya niveśane /
viviśuste mahātmāno nihatya bakarākṣasam

tataḥ pāñcālaviṣayedraupadyāste svayaṃvaram /
vijñāya vīryaśulkāntāṃ pāṇḍavā upayemire

droṇabhīṣmānumatyā tu dhṛtarāṣṭraḥ samānayat /
ardvarājyaṃ tataḥ prāptā indraprasthe purottame

rājasūyantataścakruḥ sabhāṃ kṛtvā yatavratāḥ /
arjuno dvāravatyāntu subhadrāṃ prāptavānpriyām /
vāsudevasya bhaginīmanumatyā muradviṣaḥ

nandighoṣaṃ rathaṃ divyamagnerghanuranuttamam /
gāṇḍīvaṃ nāma taddivyaṃ triṣu lokeṣu viśrutam /
akṣayānsāyakāṃścaiva tathābhedyañca daṃśanam

sa tena dhanuṣā vīraḥ pāṇḍavo jātavedasam /
kṛṣṇadvitīyo bībhatsuratarpayata vīryavān

nṛpāndigvijaye jitvā ratnānyādāya vai dadau /
yudhiṣṭhirāya mahate bhrātre nītivide mudā

yudhiṣṭhiro 'pi dharmātmā bhrātṛbhiḥ parivāritaḥ /
jito duryodhanenaiva māyādyūtena pāpinā /
karṇaduḥ śāsanamate sthitena śakunermate

atha dvādaśa varṣāṇi vane tepurmahattapaḥ /
sadhaumyā draupadīṣaṣṭhā munivṛndābhisaṃvṛtāḥ

yayurvirāṭanagaraṃ guptarūpeṇa saṃśritāḥ /
varṣamekaṃ mahāprājñā gograhāttamapālayan

tate yātāḥ svakaṃ rāṣṭraṃ prārthayāmāsurādṛtāḥ /
pañcagrāmānardharājyādvīrā duryodhanaṃ nṛpam

nāptavantaḥ kurukṣetre yuddhañcakrurbalānvitāḥ /
akṣauhiṇībhirdivyābhiḥ saptabhiḥ parivāritāḥ

ekādaśabhirudyuktā yuktā duryodhanādayaḥ /
āsīdyuddhaṃ saṃkulaṃ ca devāsuraraṇopamam

bhīṣmaḥ senāpatirabhūdādau dauryodhane bale /
pāṇḍavānāṃ śikhaṇḍī ca tayoryuddhaṃ babhūva ha /
śastrāśastri mahāghoraṃ dhasarātraṃ śarāśari

śikhaṇḍyarjunabāṇaiśca bhīṣmaḥ śaraśataiścitaḥ /
uttarāyaṇamāvīkṣya dhyātvā devaṃ gadādharam

uktvā dharmānbahuvidhāṃstarpayitvā pitṝnbahūn /
ānande tu pade līno vimale muktakilbiṣe

tato droṇo yayau yoddhuṃ dhṛṣṭadyumnena bīryavān /
dināni pañca tadyuddhamāsītparamadāruṇam

yatra te pṛthivīpālā hatāḥ pārthena saṃgare /
śokasāgaramāsādya droṇo 'pi svargamāptavān

tataḥ karṇā yayau yoddhumarjunena mihātmanā /
dinadvayaṃ mahāyuddhaṃ kṛtvā pārthāstrasāgare /
nimagnaḥ sūryalokantu tataḥ prāpa sa vīryavān

tataḥ śalyo yayau yoddhuṃ dharmarājena dhīmatā /
dinārdhena hataḥ śalyo bāṇairjvalanasannibhaiḥ

duryodhano 'tha vegena gadāmādāya vīryavān /
abhyadhāvata vai bhībhaṃ kālāntakayamopamaḥ

atha bhīmena vīreṇa gadayā vinipātitaḥ /
aśvatthāmā gato drauṇiḥ suptasainyaṃ tato niśi

jaghāna bāhuvīryeṇa piturvadhamanusmaran /
dhṛṣṭadyumnaṃ jaghānātha draupadeyāṃśca vīryavān

draupadyāṃ rudyamānāyāmaśvatthāmnaḥ śiromaṇim /
aiṣikāstreṇa taṃ jitvā jagrāhārjuna uttamam

yudhiṣṭhiraḥ samāśvāsya strījanaṃ śokasaṃkulam /
snātvā santarpya devāṃśca pitṝnatha pitāmahān

āśvāsito 'tha bhīṣmeṇa rājyañcaivākaronmahat /
viṣṇumīje 'śvamedhena vidhivaddakṣiṇāvatā

rājye parīkṣitaṃ sthāpya yādavānāṃ vināśanam /
śrutvā tu mausale rājā japtvā nāmasahasrakam

viṣṇoḥ svargaṃ jagāmātha bhīmādyairbhrātṛbhiryutaḥ /
vāsudevaḥ punarbuddha-saṃmohāya suradviṣām

kalkirviṣṇuśca bhavitā śaṃbhalagrāmake punaḥ /
aśvārūḍho 'khilāṃllokāṃstadā bhasmīkariṣyati

devādīnāṃ rakṣaṇāya hyadharmahāraṇāya ca /
duṣṭānāñca vadhārthāya hyavatāraṃ karoti ca

yathā dhanvantarirvaṃśe jātaḥ kṣīrodamanthane /
devādīnāṃ jīvanāya hyāyurvedamuvāca ha

viśvāmitrasutāyaiva śuśrutāya mahātmane /
bhāratāṃścāvatārāṃśca śrutvā svargaṃ vrajennaraḥ