Garuda Purana · Chapter 1.144

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe rāmāyaṇavarṇanaṃ nāma tricatvāriṃśaduttaraśatatamo 'dhyāyaḥ
śrīgaruḍamahāpurāṇam- 144
brahmovāca /
harivaṃśaṃ pravakṣyāmi kṛṣṇamāhātmyamuttamam /
vasudevāttu devakyāṃ vāsudevo balo 'bhavat

dharmādirakṣaṇārthāya hyadharmādivinaṣṭaye /
kṛṣṇaḥ pītvā stanau gāḍhaṃ pūtanāmanayatkṣayam

śakaṭaḥ parivṛtto 'tha bhagnau ca yamalārjunau /
damitaḥ kāliyo nāgo dhenuko vinipātitaḥ

dhṛto govardhanaḥ śaila indreṇa paripūjitaḥ /
bhārāvataraṇaṃ cakre pratijñāṃ kṛtavānhariḥ

rakṣaṇāyārjunādeśca hyariṣṭādirnipātitaḥ /
keśī vinihato daityo gopādyāḥ paritoṣitāḥ

cāṇūro muṣṭiko mallaḥ kaṃso mañcānnipātitaḥ /
rukmiṇīsatyabhāmādyāḥ hyaṣṭau patnyo hareḥ parāḥ

ṣoḍhaśa strīsahasrāṇi hyanyānyāsa mahātmanaḥ /
tāsāṃ putrāśca pautrādyāḥ śataśo 'tha sahasraśaḥ

rukmiṇyāñcaiva pradyumno nyavadhīcchaṃbarañca yaḥ /
tasya putro 'niruddho 'bhūduṣābāṇasutāpatiḥ

hariśakarayoryatra mahāyuddhaṃ babhūva ha /
bāṇabāhusahasrañca cchinnaṃ bāhudvayaṃ hyabhūt

narako nihato yena pārijātaṃ jahāra yaḥ /
balaśca śisupālaśca hataśca dvividaḥ kapiḥ

aniruddhādabhūdvajraḥ sa ca rājā gate harau /
sandīpaniṃ guruñcakre saputrañca cakāra saḥ /
mathurāyāṃ cograsenaṃ pālanaṃ ca divaukasām