Garuda Purana · Chapter 1.143

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe daśāvatāradṛ nāma dvicatvāriṃśaduttaraśatatamo 'dhyāyaḥ
śrīgaruḍamahāpurāṇam- 143
brahmovāca /
rāmāyaṇamato vakṣye śrutaṃ pāpavināśanam /
viṣṇunābhyabjato brahmā marīcistatsuto 'bhavat

marīceḥ kaśyapastasmādravistasmānmanuḥ smṛtaḥ /
manorikṣvākurasyābhūdvaṃśe rājā raghuḥ smṛtaḥ

raghorajastato jāto rājā daśaratho balī /
tasya putrāstu catvāro mahābalaparākramāḥ

kausalyāyāma bhūdrāmo bharataḥ kaikayīsutaḥ /
sutau lakṣmaṇaśakṣughnau sumitrāyāṃ babhūvatuḥ

rāmo bhaktaḥ piturmāturviśvāmitrādavāptavān /
astragrāmaṃ tato yakṣīṃ tāṭakāṃ prajaghāna ha

viśāvamitrasya yajñe vai subāhuṃ nyavadhīdbalī /
janakasya kratuṃ gatvā upayeme 'tha jānakīm

ūrmilāṃ lakṣmaṇo vīro bharato māṇḍavīṃ sutām /
śatrughno vai kīrtimatīṃ kuśadhvajasute ubhe

pitrādibhirayodhyāyāṃ gatvā rāmādayaḥ sthitāḥ /
yudhājitaṃ mātulañca śatrughnabharatau gatau

gatayornṛpavaryo 'sau rājyaṃ dātuṃ samudyataḥ /
sa rāmāya tatputrāya kaikeyyā prārthitastadā

caturdaśasamāvāso vanerāmasya vāñchitaḥ /
rāmaḥ pitṛhitārthañca lakṣmaṇena ca sītayā

rājyañca tṛṇavattyaktvā śṛṅgaverapuraṃ gataḥ /
rathaṃ tyaktvā prayāgañca citrakūṭagiriṃ gataḥ

rāmasya tu viyogena rājā svargaṃ samāśritaḥ /
saṃskṛtya bharataścāgādrāmamāha balānvitaḥ

ayodhyāntu samāgatya rājyaṃ kuru mahāmate /
sa naicchatpāduke dattvā rājyāya bharatāya tu

visarjito 'tha bharato rāmarājyamapālayat /
nandigrāme sthito bhakto hyayodhyāṃ nāviśadvratī

rāmo 'pi citrakūṭācca hyatrerāśramamāyayau /
natvā sutīkṣṇaṃ cāgastyaṃ daṇḍakāraṇyamāgataḥ

tatra śūrpaṇakhā nāma rākṣasī cāttumāgatā /
nikṛtya karṇo nāse ca rāmeṇāthāpavāritā

tatpreritaḥ kharaścāgāddūṣaṇastriśirāstathā /
caturdaśasahasreṇa rakṣasāntu balena ca

rāmo 'pi preṣayāmāsa bāṇairyamapurañca tān /
rākṣasyā prerito 'bhyāgādrāvaṇo haraṇāya hi

mṛgarūpaṃ sa mārīcaṃ kṛtvāgre 'tha tridaṇḍadhṛk /
sītayā prerito rāmo mārīcaṃ nijaghāna ha

mriyamāṇaḥ sa ca prāha hā sīte ! lakṣmaṇoti ca /
sītokto lakṣmaṇo 'thāgādrāmaścānudadarśa tam

uvāca rākṣasī māyā nūnaṃ sītā hṛteti saḥ /
rāvaṇo 'ntaramāsādya hyaṅkenādāya jānakīm

jaṭāyuṣaṃ vinirbhidya yayau laṅkāṃ tato balī /
aśokavṛkṣacchāyāyāṃ rakṣitāṃ tāmadhārayat

āgatya rāmaḥ sūnyāñca parṇaśālāṃ dadarśa ha /
śokaṃ kṛtvātha jānakyā mārgaṇaṃ kṛtavānprabhuḥ

jaṭāyuṣañca saṃskṛtya tadukto dakṣiṇāṃ diśam /
gatvā sakhyaṃ tataścakre sugrīveṇa ca rāghavaḥ

sapta tālānvinirbhidya śareṇānataparvaṇā /
vālinañca vinirbhidya kiṣkindhāyāṃ harīśvaram

sugrīvaṃ kṛtavānrāma ṛśyamūke svayaṃ sthitaḥ /
sugrīvaḥ preṣayāmāsa vānarānparvatopamān

sītāyā mārgaṇaṃ kartuṃ pūrvādyāśāsu sotsavān /
pratīcīmuttarāṃ prācīṃ diśaṃ gatvā samāgatāḥ

dakṣiṇāntu diśaṃ ye ca mārgayanto 'tha jānakīm /
vanāni parvatāndvīpānnadīnāṃ pulināni ca

jānakīnte hyapaśyanto maraṇe kṛtaniścayāḥ /
sampātivacanājjñātvā hanūmānkapikuñjaraḥ

śatayojanavistīrṇaṃ pupluve makarālayam /
apaśyajjānakīṃ tatra hyaśokavanikāsthitām

bhartsitāṃ rākṣasībhiśca rāvaṇena ca rakṣasā /
bhava bhāryeti vadatā cintayantīñca rāghavam

aṅgulīyaṃ kapirdattvā sītāṃ kauśalyamabravīt /
rāmasya tasya dūto 'haṃ śokaṃ mā kuru maithili

svābhijñānañca me dehi yena rāmaḥ smariṣyati /
tacchrutvā pradadau sītā veṇīratnaṃ hanūmate

yathā rāmo nayecchīghraṃ tathā vācyaṃ tvayā kape /
tathetyuktvā tu hanumānvanaṃ divyaṃ babhañja ha

hatvākṣaṃ rākṣasāṃścānyānbandhanaṃ svayamāgataḥ /
sarvairindrajito bāṇairdṛṣṭvā rāvaṇamabravīt

rāmadūto 'smi hanumāndehi rāmāya maithilīm /
etacchrutvā prakupito dīpayāmāsa pucchakam

kapirjvalitalāṅgūlo laṅkāṃ dehe' mahābalaḥ /
dagdhvā laṅkāṃ samāyāto rāmapārśvaṃ sa vānaraḥ

jagdhvā phalaṃ madhuvane dṛṣṭā sītatyavedayat /
veṇīratnañca rāmāya rāmo laṅkāpurrī yayau

sasugrīvaḥ sa hanumānsāṃgadaśca salakṣmaṇaḥ /
vibhīṣaṇo 'pi samprāptaḥ śaraṇaṃ rāghavaṃ prati

laṅkaiśvaryeṣvabhyaṣiñcadrāmastaṃ rāvaṇānujam /
rāmo nalena setuñca kṛtvābdhau cottatāra tam

suvelāvasthitaścaiva purīṃ laṅkāṃ dadarśaha /
atha te vānarā vīrā nīlāṅgadanalādayaḥ

dhūmradhūmrākṣavīrendrā jāmbavatpramukhāstadā /
maindadvividamukhyāste purīṃ laṅkāṃ babhañjire

rākṣasāṃśca mahākāyānkālāñjanacayopamān /
rāmaḥ salakṣmaṇo hatvā sakapiḥ sarvarākṣasān

vidyujjihvañca dhūmrākṣaṃ devāntakanarānta kau /
mahodaramahāpārśvāvatikāyaṃ mahābalam

kumbhaṃ nikumbhaṃ mattañca makarākṣaṃ hyakampanam /
prahastaṃ vīramunmattaṃ kumbhakarṇaṃ mahābalam

rāvaṇiṃ lakṣmaṇo 'cchinta hyastrādyai rāghavo balī /
nikṛtya bāhucakrāṇi rāvaṇantu nyapātayan

sītāṃ śuddhāṃ gṛhītvātha vimāne puṣpake sthitaḥ /
savānaraḥ samāyāto hyayodhyāṃ pravarāṃ purīm

tatra rājyaṃ cakārātha puttravatpālayanprajāḥ /
daśāśvamedhānāhṛtya gayāśirasi pātanam

piṇḍānāṃ vidhivatkṛtvā dattvā dānāni rāghavaḥ /
putrau kuśalavau dṛṣṭvā tau ca rājye 'bhyaṣecayat

ekādaśasahasrāṇi rāmo rājyamakārayat /
śatrughno lavaṇaṃ jaghne śailūṣaṃ bhatastataḥ

agastyādīnmunīnnatvā śrutvotpattiñca rakṣasām /
svargaṃ gato janaiḥ sārdhamayodhyāsthaiḥ kṛtārthakaḥ