Garuda Purana · Chapter 1.137

aghaughasaṃkṣayaṃ kṛtvā sarvasaukhyaprado bhava /
prīyatāṃ devadeveśo viprebhyaḥ kalaśāndadet /
nadyastīre 'yaḥ vā kuryātsarvānkāmānavāpnuyāt // GarP_1,136. 12 //
iti śrīgāruḍe mahāpurāṇe purvakhaṇḍe prathamāṃśākhye ācārakāṇḍe śravaṇadvādaśīvratanirūpaṇaṃ nāma ṣaṭtriṃśaduttaraśatatamo 'dhyāyaḥ
śrīgaruḍamahāpurāṇam- 137
brahmovāca /
kāmadevatrayodaśyāṃ pūjyo damanakādibhiḥ /
ratiprītisamāyukto hyasoko maṇibhūṣitaḥ

(iti madanakatrayodaśīvratam) /
caturdaśyāṃ tathāṣṭabhyāṃ pakṣyoḥ śuklakṛṣṇayoḥ /
yo 'bdamekaṃ na bhuñjīta muktibhāk śivapūjanāt

(iti śivacaturdaśyaṣṭamīvratam) /
trirātropoṣito dadyātkārtikyāṃ bhavanaṃ śubham /
sūryalokamavāpnoti dhāmavratamidaṃ śubham

amāvasyāṃ pitṝṇāṃ ca dattaṃ jalāditadakṣayam /
naktābhyāśī vāranāmnā yajanvārāṇi sarvabhāk

(iti vāravratāni) /
dvādaśarkṣāṇi viprarṣe ! pratimāsaṃ tu yāni vai /
tannāmnānte 'tacyutaṃ teṣu samyak saṃpūjayennaraḥ

keśavaṃ mārgaśīrṣe tu ityādau kṛtikādike (kā) /
ghṛtahomaścaturmāsaṃ kṛsarañca nivedayet

āṣāḍhādau pāyasaṃ tu viprāṃstenaiva bhojayet /
pañcāvyajalasnānanaivedyairnaktamācaret

arvāgvisarjanāddravyaṃ naivedyaṃ sarvamucyate /
visarjite jagannāthe nirmālyaṃ bhavati kṣaṇāt

pāñcarātravido mukhyā naivedyaṃ bhuñjate svayam /
evaṃ saṃvatsarasyānte viśeṣeṇa prapūjayet

namonamaste 'cyuta ! saṃkṣayo 'stu pāpasya vṛddhiṃ samupaitu puṇyam /
aiśvaryavittādi sadākṣayaṃ me tathāstu me santatirakṣayaiva

yathācyuta !tvaṃ parataḥ parasmātsa brahmabhūtaḥ parataḥ parasmāt /
tathācyutaṃ me kuru vāñchitaṃ sadā mayā kṛtaṃ pāpaharāprameya

acyutānanta ! govinda ! prasīda yadabhīpsitam /
tadakṣayamameyātmankuruṣva puruṣottama

kuryādvai sapta varṣāṇi āyuḥ śrīsadgatīrnaraḥ /
upoṣyaikādaśībdamaṣṭamīṃ ca caturdaśīm

saptamīṃ pūjayedviṣṇuṃ durgāṃ śambuṃ raviṃ kramāt /
teṣāṃ lokaṃ samāpnoti sarvakāmāṃśca nirmalaḥ

ekabhaktena naktena tathaivāyācitena ca /
upavāsena śākādyaiḥ pūjayantasarvadevatāḥ

sarvaḥ sarvāsu tithiṣu bhuktiṃ muktimavāpnuyāt /
dhanado 'gniḥ pratipadi nāsatyo dastra arcitaḥ

śrīryamaśca dvitīyāyāṃ pañcamyā pārvatī śriyā /
nāgāḥ ṣaṣṭhyāṃ kārtikeyaḥ saptamyāṃ bhāskaror'thadaḥ

durgāṣṭamyāṃ mātaraśca navamyāmatha takṣakaḥ /
indro daśamyāṃ dhanada ekādaśyāṃ munīśvarāḥ

dvādaśyāṃ ca hariḥ kāmastrayodaśyāṃ maheśvaraḥ /
caturdaśyāṃ pañcadaśyāṃ brahmā ca pitaro 'pare