ગરુડ પુરાણ · અધ્યાય 1.137

અઘૌઘસંક્ષયં કૃત્વા સર્વસૌખ્યપ્રદો ભવ ।
પ્રીયતાં દેવદેવેશો વિપ્રેભ્યઃ કલશાન્દદેત્ ।
નદ્યસ્તીરે ઽયઃ વા કુર્યાત્સર્વાન્કામાનવાપ્નુયાત્ ॥ ગર્પ્_1,136. 12 ॥
ઇતિ શ્રીગારુડે મહાપુરાણે પુર્વખણ્ડે પ્રથમાંશાખ્યે આચારકાણ્ડે શ્રવણદ્વાદશીવ્રતનિરૂપણં નામ ષટ્ત્રિંશદુત્તરશતતમો ઽધ્યાયઃ
શ્રીગરુડમહાપુરાણમ્- 137
બ્રહ્મોવાચ ।
કામદેવત્રયોદશ્યાં પૂજ્યો દમનકાદિભિઃ ।
રતિપ્રીતિસમાયુક્તો હ્યસોકો મણિભૂષિતઃ

(ઇતિ મદનકત્રયોદશીવ્રતમ્) ।
ચતુર્દશ્યાં તથાષ્ટભ્યાં પક્ષ્યોઃ શુક્લકૃષ્ણયોઃ ।
યો ઽબ્દમેકં ન ભુઞ્જીત મુક્તિભાક્ શિવપૂજનાત્

(ઇતિ શિવચતુર્દશ્યષ્ટમીવ્રતમ્) ।
ત્રિરાત્રોપોષિતો દદ્યાત્કાર્તિક્યાં ભવનં શુભમ્ ।
સૂર્યલોકમવાપ્નોતિ ધામવ્રતમિદં શુભમ્

અમાવસ્યાં પિતૄણાં ચ દત્તં જલાદિતદક્ષયમ્ ।
નક્તાભ્યાશી વારનામ્ના યજન્વારાણિ સર્વભાક્

(ઇતિ વારવ્રતાનિ) ।
દ્વાદશર્ક્ષાણિ વિપ્રર્ષે ! પ્રતિમાસં તુ યાનિ વૈ ।
તન્નામ્નાન્તે ઽતચ્યુતં તેષુ સમ્યક્ સંપૂજયેન્નરઃ

કેશવં માર્ગશીર્ષે તુ ઇત્યાદૌ કૃતિકાદિકે (કા) ।
ઘૃતહોમશ્ચતુર્માસં કૃસરઞ્ચ નિવેદયેત્

આષાઢાદૌ પાયસં તુ વિપ્રાંસ્તેનૈવ ભોજયેત્ ।
પઞ્ચાવ્યજલસ્નાનનૈવેદ્યૈર્નક્તમાચરેત્

અર્વાગ્વિસર્જનાદ્દ્રવ્યં નૈવેદ્યં સર્વમુચ્યતે ।
વિસર્જિતે જગન્નાથે નિર્માલ્યં ભવતિ ક્ષણાત્

પાઞ્ચરાત્રવિદો મુખ્યા નૈવેદ્યં ભુઞ્જતે સ્વયમ્ ।
એવં સંવત્સરસ્યાન્તે વિશેષેણ પ્રપૂજયેત્

નમોનમસ્તે ઽચ્યુત ! સંક્ષયો ઽસ્તુ પાપસ્ય વૃદ્ધિં સમુપૈતુ પુણ્યમ્ ।
ઐશ્વર્યવિત્તાદિ સદાક્ષયં મે તથાસ્તુ મે સન્તતિરક્ષયૈવ

યથાચ્યુત !ત્વં પરતઃ પરસ્માત્સ બ્રહ્મભૂતઃ પરતઃ પરસ્માત્ ।
તથાચ્યુતં મે કુરુ વાઞ્છિતં સદા મયા કૃતં પાપહરાપ્રમેય

અચ્યુતાનન્ત ! ગોવિન્દ ! પ્રસીદ યદભીપ્સિતમ્ ।
તદક્ષયમમેયાત્મન્કુરુષ્વ પુરુષોત્તમ

કુર્યાદ્વૈ સપ્ત વર્ષાણિ આયુઃ શ્રીસદ્ગતીર્નરઃ ।
ઉપોષ્યૈકાદશીબ્દમષ્ટમીં ચ ચતુર્દશીમ્

સપ્તમીં પૂજયેદ્વિષ્ણું દુર્ગાં શમ્બું રવિં ક્રમાત્ ।
તેષાં લોકં સમાપ્નોતિ સર્વકામાંશ્ચ નિર્મલઃ

એકભક્તેન નક્તેન તથૈવાયાચિતેન ચ ।
ઉપવાસેન શાકાદ્યૈઃ પૂજયન્તસર્વદેવતાઃ

સર્વઃ સર્વાસુ તિથિષુ ભુક્તિં મુક્તિમવાપ્નુયાત્ ।
ધનદો ઽગ્નિઃ પ્રતિપદિ નાસત્યો દસ્ત્ર અર્ચિતઃ

શ્રીર્યમશ્ચ દ્વિતીયાયાં પઞ્ચમ્યા પાર્વતી શ્રિયા ।
નાગાઃ ષષ્ઠ્યાં કાર્તિકેયઃ સપ્તમ્યાં ભાસ્કરોર્ઽથદઃ

દુર્ગાષ્ટમ્યાં માતરશ્ચ નવમ્યામથ તક્ષકઃ ।
ઇન્દ્રો દશમ્યાં ધનદ એકાદશ્યાં મુનીશ્વરાઃ

દ્વાદશ્યાં ચ હરિઃ કામસ્ત્રયોદશ્યાં મહેશ્વરઃ ।
ચતુર્દશ્યાં પઞ્ચદશ્યાં બ્રહ્મા ચ પિતરો ઽપરે